២. ផឹកទឹកតែពេលស្រេក៖ ផឹកទឹកកុំចាំដល់តែពេលស្រេកខ្លាំងទើបផឹក ព្រោះបើចាំដល់ពេលនោះ មានន័យថារាងកាយរបស់អ្នកបានធ្លាក់ចូលស្ថានភាពខ្វះជាតិទឹកតិចតួចរួចហើយ។ វាអាចបណ្តាលឱ្យអ្នកមានអារម្មណ៍អស់កម្លាំង ងងុយគេង មិនអាចផ្តោតអារម្មណ៍បានល្អ ថែមទាំងអាចបង្កឱ្យមានការទល់លាមក ជាដើម។ ដើម្បីបង្កើតទម្លាប់ល្អ អ្នកគួរផឹកទឹករៀងរាល់ ១ ទៅ ២ ម៉ោង ម្ដង ទោះបីជាមិនស្រេកក៏ដោយ។ 

៣. ផឹកទឹកត្រជាក់ភ្លាមៗបន្ទាប់ពីញ៉ាំអាហារ៖ បន្ទាប់ពីញ៉ាំអាហាររួច ជាធម្មតាយើងចូលចិត្តផឹកទឹកត្រជាក់ ឬទឹកកក ដើម្បីឱ្យមានអារម្មណ៍ស្រស់ស្រាយ។ ប៉ុន្តែការធ្វើបែបនេះអាចធ្វើឱ្យដំណើរការប្រព័ន្ធរំលាយអាហារធ្លាក់ចុះ ដំណើរការយឺតជាងមុន។ ព្រោះទឹកត្រជាក់បណ្ដាលឱ្យសាច់ដុំក្រពះកន្ត្រាក់ និងបន្ថយប្រសិទ្ធភាពនៃអង់ស៊ីមរំលាយអាហារ។ សម្រាប់អ្នកដែលមានក្រពះងាយប្រតិកម្ម វាអាចធ្វើឱ្យមិនស្រួលពោះ ឬឈឺពោះតែម្ដង។ ប្រសិនបើអាច បន្ទាប់ពីញុំាអាហាររួចគួរតែផឹកទឹកក្ដៅឧណ្ឌៗដើម្បីជំនួយដល់ប្រព័ន្ធរំលាយអាហារឱ្យដំណើរការបានល្អ តែបើសិនជាអ្នកមិនទម្លាប់ ហើយនៅតែចង់ផឹកទឹកត្រជាក់គួររង់ចាំប្រហែល ៣០ នាទីបន្ទាប់ពីញុំាអាហាររួចចាំផឹក ដើម្បីឱ្យរាងកាយមានពេលរំលាយអាហារបានស្រួលជាមុនសិន។

៤. ប្រើភេសជ្ជៈជំនួសទឹក៖ មនុស្សមួយចំនួនគិតថា ភេសជ្ជៈដូចជា តែ កាហ្វេ ទឹកដោះគោ ឬភេសជ្ជៈប៉ូវកម្លាំង អាចជំនួសទឹកបាន។ តែជាក់ស្តែង ភេសជ្ជៈទាំងនេះភាគច្រើនមានជាតិស្ករ កាឡូរី និងសារធាតុរក្សាទុក។ ប្រសិនបើផឹកជាញឹកញាប់ អាចបណ្តាលឱ្យឡើងទម្ងន់ ឬបង្កើនហានិភ័យនៃជំងឺទឹកនោមផ្អែម។ ដូច្នេះ បើចង់បានសុខភាពល្អគួរផឹកទឹកស្អាតឱ្យបានច្រើនឬផឹកភេសជ្ជៈធម្មជាតិដូចជាទឹកដូង ឬតែរុក្ខជាតិគ្មានជាតិផ្អែម៕

អត្ថបទដោយ៖ សារួ