១. បង្កើនហានិភ័យនៃជំងឺទឹកនោមផ្អែម៖ មនុស្សជាច្រើនគិតថាជំងឺនេះកើតឡើង មកពីការញ៉ាំអាហារដែលមានជាតិផ្អែមពេក ប៉ុន្តែការសិក្សាបានបង្ហាញថា ទម្លាប់គេងមិនទៀងទាត់ ឬគេងយូរពេកក៏អាចធ្វើឱ្យដំណើរការប្រើប្រាស់ស្ករនៅក្នុងរាងកាយមានបញ្ហាដែរ។ វាបណ្តាលឱ្យកម្រិតជាតិស្ករក្នុងឈាមខូចប្រក្រតី ហើយបន្ថែមហានិភ័យនៃជំងឺទឹកនោមផ្អែមប្រភេទទី ២។

២. ធ្វើឱ្យឡើងទម្ងន់ ឬធាត់លឿន៖ ការសិក្សាច្រើនបង្ហាញថា មនុស្សដែលគេងប្រហែល ៩ ដល់ ១០ ម៉ោងក្នុងមួយយប់ មានហានិភ័យធាត់ខ្ពស់ជាងមនុស្សដែលគេងត្រឹម ៧ ឬ ៨ ម៉ោង។ វាអាចបណ្តាលមកពីការប្រែប្រួលនៃសារធាតុអ័រមូនដែលគ្រប់គ្រងការរៀបរៀងធ្វើឱ្យមនុស្សមានចំណង់ចង់ញ៉ាំច្រើន ឬញ៉ាំអាហារមិនទៀងទាត់។

៣. បណ្តាលឱ្យឈឺក្បាលជារឿយៗ៖ មនុស្សខ្លះមានប្រតិកម្មខុសប្រក្រតីជាមួយសារធាតុ serotonin នៅក្នុងខួរក្បាល ពេលដែលគេងលើសពីធម្មតា។ ការគេងយូរពេកអាចធ្វើឱ្យសារធាតុនេះរំខាន ហើយបណ្តាលឱ្យមានការឈឺក្បាល ឬមានអារម្មណ៍ថាចង់គេងគ្រប់ពេល។ ជាពិសេសអ្នកដែលចូលចិត្តគេងពេលថ្ងៃ ធ្វើឱ្យប៉ះពាល់ដល់ការគេងនៅពេលយប់ ហើយបង្កឱ្យមានការឈឺក្បាលនៅពេលព្រឹក។

៤. ជំងឺធ្លាក់ទឹកចិត្ត៖ ដូចដែលមនុស្សជាច្រើនបានដឹងហើយថា ការគេងមិនលក់អាចនាំឱ្យមានអារម្មណ៍អស់កម្លាំង ឬបាក់ទឹកចិត្ត។ ប៉ុន្តែការសិក្សាថ្មីមួយបានបង្ហាញថា ការគេងច្រើនពេកក៏អាចប៉ះពាល់ដូចគ្នា។ វាអាចធ្វើឱ្យសភាពអារម្មណ៍បាក់ទឹកចិត្តកាន់តែធ្ងន់ធ្ងរ ព្រោះបណ្តាលឱ្យដំណើរការគ្រប់គ្រងអារម្មណ៍ និងសារធាតុគីមីនៅក្នុងខួរក្បាលរំខាន។

៥. បង្កឱ្យមានបញ្ហាបេះដូង និងសរសៃឈាម៖ ការសិក្សាមួយដែលធ្វើលើស្ត្រីជាង ៧២,០០០ នាក់បានរកឃើញថា ស្ត្រីដែលគេងចន្លោះពី ៩ ដល់ ១១ ម៉ោងក្នុងមួយយប់ មានហានិភ័យឆាប់ជួបជំងឺសរសៃឈាមបេះដូងប្រហែល ៣៨% ខ្ពស់ជាងស្ត្រីដែលគេងប្រហែល ៧ ម៉ោង។ ទោះបីមិនទាន់ដឹងមូលហេតុពិតប្រាកដក៏ដោយ ប៉ុន្តែអ្នកស្រាវជ្រាវជឿថា វាអាចពាក់ព័ន្ធនឹងការបាក់ទឹកចិត្ត និងការគេងមិនមានគុណភាពល្អ។

ដោយសារហេតុទាំងនេះ ការគេងឱ្យបានគ្រប់គ្រាន់គឺពិតជាសំខាន់ណាស់សម្រាប់សុខភាព។ ពេលយប់គួរគេងឱ្យបានពេញ ៧ ដល់ ៨ ម៉ោង បិទអេក្រង់ទូរស័ព្ទមុនគេង ធ្វើឱ្យបន្ទប់ស្ងប់ស្ងាត់ និងកុំញ៉ាំអាហារពេលយប់ជ្រៅពេក។ ពេលរាងកាយបានសម្រាកគ្រប់គ្រាន់ អ្នកនឹងមានកម្លាំង មានថាមពល និងអារម្មណ៍ល្អសម្រាប់ការចាប់ផ្តើមនៅថ្ងៃថ្មី។ សារសំខាន់គឺ ការគេងឱ្យបានគ្រប់គ្រាន់ជាប្រភពនៃសុខភាពល្អ ប៉ុន្តែការគេងច្រើនពេកអាចក្លាយជាមូលហេតុនៃជំងឺ។ យើងគួរតែគោរពតាមតម្រូវការរបស់រាងកាយ ដោយគេងឱ្យត្រឹមត្រូវ និងទៀងទាត់ជារៀងរាល់ថ្ងៃ៕

អត្ថបទដោយ៖ សារួ