វីតាមីន គឺជាសារធាតុចិញ្ចឹមដ៏សំខាន់និងចាំបាច់បំផុតសម្រាប់រាងកាយរបស់មនុស្សគ្រប់វ័យ វីតាមីនជួយឱ្យកុមារលូតលាស់ល្អ ឆ្អឹងរឹងមាំ ជួយឱ្យមនុស្សពេញវ័យមានសុខភាពល្អ មិនងាយឆ្លងជំងឺផ្តេសផ្តាស ជួយ​ដល់មនុស្សចាស់ឱ្យមានការចងចាំល្អ មិនឆាប់កោងឆ្អឹង មិនបាក់កម្លាំង និងជាពិសេសជួយសម្រស់ឱ្យនៅក្មេងជាងវ័យ ស្បែកភ្លឺថ្លាថែមទៀតផង។

ជាការពិតណាស់ យោងតាមការបញ្ជាក់ពីគេហទំព័រ healthline បានឱ្យដឹងថា សុខផាពស្បែក និងសម្រស់ នៅស្ថិតថែ និងស្អាតបានយូរលុះត្រាតែនៅក្នុងរាងកាយរបស់មនុស្សមានវីតាមីនគ្រប់គ្រាន់ ហើយវីតាមីនដែលស្បែកត្រូវការបំផុតមានដូចជា៖

វីតាមីន D

វីតាមីន D មានសារសំខាន់ណាស់សម្រាប់ស្បែក វីតាមី D ភាគច្រើនត្រូវបានបង្កើតឡើងដោយពន្លឺព្រះអាទិត្យដែលស្រូបយកដោយស្បែករបស់អ្នក។ ស្បែករបស់អ្នកចាំបាច់ត្រូវតែប៉ះជាមួយពន្លឺព្រះអាទិត្យឱ្យបាន ១០ នាទីក្នុងមួយថ្ងៃនៅពេលដែលស្បែករបស់អ្នកទៅប៉ះជាមួយពន្លឺព្រះអាទិត្យ កោសិកាថ្លើម និងតម្រងនោម វានឹងទៅទាញយកវីតាមីន D ហើយដឹកជញ្ជូនទូទាំងរាងកាយ ជាពិសេសជួយឱ្យស្បែកមានសុខភាពល្អ។ មួយវិញទៀតពន្លឺព្រះអាទិត្យដែលល្អហើយមិនធ្វើឱ្យប៉ះពាល់ដល់ស្បែកគឺពន្លឺព្រះអាទិត្យនៅពេលព្រឹក។ បន្ថែមពីលើនេះទៀត ដើម្បីទទួលបានវីតាមីន D កាន់តែច្រើននៅក្នុងរាងកាយអ្នកអាចទទួលទាន អាហារដូចជា គ្រាប់ធញ្ញជាតិជាអាហារពេលព្រឹក ញ៉ាំទឹកក្រូច ទឹកដោះគោជូរ ត្រីសាម៉ុង ត្រី ធូណា និងត្រីខ ជាដើម។

វីតាមីន C

វីតាមីន C ត្រូវបានរកឃើញនៅកម្រិតខ្ពស់នៅក្នុង epidermis (ស្រទាប់ខាងក្រៅនៃស្បែក) ក៏ដូចជា dermis (ស្រទាប់ខាងក្នុងនៃស្បែក)។ លក្ខណៈសម្បត្តិរបស់វីតាមីន Cគឺប្រឆាំងមហារីក សារធាតុប្រឆាំងអុកស៊ីតកម្ម និងផលិតកូឡាជែន ជួយរក្សាស្បែករបស់អ្នកឱ្យមានសុខភាពល្អ។

ការទទួលទានវីតាមីន C ដោយផ្ទាល់មាត់អាចបង្កើនប្រសិទ្ធភាពខ្លាំង ដោយវីតាមីន C​ វាដលរតួនាទីជា ឡេការពារកម្តៅថ្ងៃដើម្បីការពារស្បែកពីកាំរស្មី UV កាត់បន្ថយការខូចខាតកោសិកា។ វីតាមីន C ក៏អាចជួយការពារសញ្ញានៃភាពចាស់ផងដែរ ដោយសារតែតួនាទីសំខាន់របស់វាក្នុងការសំយោគកូឡាជែនធម្មជាតិរបស់រាងកាយ។ វាជួយព្យាបាលស្បែកដែលខូច កាត់បន្ថយស្នាមជ្រួញ។ អ្នកជំនាញណែនាំឱ្យប្រើវីតាមីន C ១០០០ មីលីក្រាមក្នុងមួយថ្ងៃ។ អ្នកអាចទាញវីតាមីន C ចូលទៅក្នុងស្បែករបស់អ្នកបានតាមរយៈ ញ៉ាំ​អាហារ ​ញ៉ាំក្រូចឆ្មារ ស្ត្របឺរី ប្រូខូលី ស្ពៃ ផឹកទឹកក្រូច លេបថ្នាំគ្រាប់វីតាមីនC ជាដើម។

វីតាមីន E

វីតាមីន E គឺជាសារធាតុប្រឆាំងអុកស៊ីតកម្មមានមុខងារចម្បងក្នុងការថែរក្សាស្បែកគឺការពារប្រឆាំងនឹងការបំផ្លាញពីពន្លឺព្រះអាទិត្យ។ ជាធម្មតា រាងកាយផលិតវីតាមីន E តាមរយៈសេប៊ុម ដែលជាសារធាតុខ្លាញ់ដែលបញ្ចេញតាមរន្ធញើសរបស់ស្បែក។ នៅក្នុងសមតុល្យដ៏ត្រឹមត្រូវ សេប៊ុមជួយរក្សាសភាពស្បែក និងការពារភាពស្ងួត។ ប្រសិនបើអ្នកមានស្បែកស្ងួត វីតាមីន E អាចជួយ ព្យាបាលការរលាកស្បែកផងដែរ។ មនុស្សពេញវ័យភាគច្រើនត្រូវការវីតាមីន E ប្រហែល ១៥ mg ក្នុងមួយថ្ងៃ។ អ្នកអាចទាញវីតាមីន Eចូលទៅក្នុងស្បែករបស់អ្នកបានតាមរយៈ ញ៉ាំគ្រាប់អាល់ម៉ុន គ្រាប់ hazelnuts គ្រាប់​ផ្កាឈូករ័ត្ន លេបថ្នាំគ្រាប់វីតាមីន E ។

វីតាមីន K

វីតាមីន K មានសារសំខាន់ក្នុងការជួយដល់ដំណើរការនៃការកកឈាមរបស់រាងកាយ ជួយព្យាបាលរបួស ស្នាមជាំ និងតំបន់ដែលរងផលប៉ះពាល់ដោយការវះកាត់។ យោងតាម សាកលវិទ្យាល័យ Florida បានឱ្យដឹងថា មនុស្សពេញវ័យត្រូវការវីតាមីន K ចន្លោះពី ៩០ ទៅ ១២០ ug ក្នុងមួយថ្ងៃ។ អ្នកអាចបង្កើនការទទួលទានរបស់អ្នកដោយការញ៉ាខាត់ណា spinach សាឡាត់ ស្ពៃក្តោប ស​ណ្តែ​ក​ខៀវ៕

អត្ថបទដោយ៖ មឿន គន្ធា