យើងបានដឹងខ្លះៗ មកហើយថាផ្លែឈើដូចជា ផ្លែប័រ និងផ្លែប៉ោម សុទ្ធតែជួយខួរក្បាលគិតបានល្អ។ ចុះបន្លែប្រភេទអស្ចារ្យសម្រាប់ខួរក្បាល? សូម្បីលោក Albert Einstein ជាបិតារូបវិទ្យាក៏ចូលចិត្តហូបបន្លែ១នេះច្រើនជាងគេដែរ។ នៅខ្មែរយើង ក៏មានការផលិតលក់បន្លែអស្ចារ្យ ១នេះ នៅតាមទីផ្សារ មិនខ្វះលក់នោះទេ។

តាមការស្រាវជ្រាវពីក្រុមនាយកដ្ឋានវេជ្ជសាស្ត្រផ្លូវចិត្ត និងជីវគីមីនៅក្នុងសាលាវេជ្ជសាស្ត្រ Yong Loo Lin នៃសាកលវិទ្យាល័យជាតិសិង្ហបុរី (NUS) ដែលបានចំណាយពេល ៦ឆ្នាំ មានចំនួនមនុស្សចាស់ ៦០០នាក់ មានអាយុលើសពី ៦០ឆ្នាំ បានរកឃើញថា គ្រាន់តែអ្នកហូបបន្លែផ្សិតចំនួន ២ដងក្នុងមួយសប្តាហ៍អាចជួយកាត់បន្ថយការភ្លេច ៥០% ឬបង្កើនអង្គចងចាំខួរក្បាលបានល្អ។ នេះជាការដឹកនាំចេញពីលោកសាស្រ្តាចារ្យ​​ Lei Feng ។

សូម្បីលោកវេជ្ជបណ្ឌិត Irwin Cheah ជាអ្នកស្រាវជ្រាវជាន់ខ្ពស់ជានាយកដ្ឋានជីវគីមី NUS បានមានប្រសាសន៍ថា យើងចាប់អារម្មណ៍ចំពោះសមាសធាតុមួយហៅថា Ergothioneine (ET)។ ព្រោះវា(ET) ជាសារធាតុប្រឆាំងអុកស៊ីតកម្ម និងប្រឆាំងនឹងការរលាកតែមួយគត់ ដែលមនុស្សយើងមិនអាចសំយោគដោយខ្លួនឯងបានទេ មានតែប្រភពចេញពីអាហារសំខាន់ គឺផ្សិតនេះឯង។

តាមលោក Walter Isaacson ជានាយកប្រតិបត្តិសារព័ត៌មាន CNN និងជានិពន្ធនាយកកាសែត Time បានចុះផ្សាយក្នុងសៀវភៅលោកថា លោកស្រី Herta Waldow ធ្លាប់ជាស្រ្តីមេផ្ទះរបស់លោកអាញស្តាញ បាននិយាយពីលោកអាញស្តាញ បានញ៉ាំអាហារពេលព្រឹកជាមួយស៊ុតចៀនចំនួនពីរគ្រាប់ ហើយចូលចិត្តហូបជាងគេផ្សិត និងទឹកឃ្មុំថែមទៀត។ ព្រោះវាមានសារធាតុចិញ្ចឹមខួរក្បាលឱ្យគាត់មានថាមពលគិតបានលឿន។

ហើយតាមសារព័ត៌មាន Medicalnewstoday ក៏បានបន្ថែមចុះផ្សាយពីអត្ថប្រយោជន៍របស់ផ្សិតដែរថា នៅក្នុងផ្សិតនេះ មានផ្ទុកទៅដោយបរិមាណដ៏ច្រើន មានជាតិសរសៃអាហារ សារធាតុប្រឆាំងអុកស៊ីតកម្ម និងប្រូតេអ៊ីន ព្រមទាំងវីតាមីនច្រើនប្រភេទ និងសារធាតុរ៉ែផងដែរ។

ដូចនេះ យើងអាចសរុបឱ្យខ្លីថា ការហូបមួយសប្តាហ៍ឱ្យបានច្រើនដង (២ទៅ៤ដង) បើមនុស្សចាស់ជួយការពារខួរក្បាល។ បើវ័យក្មេង ជួយបង្កើតអង្គចងចាំ រៀនឆាប់ចាំ និងវជួយបង្កើនខួរក្បាលឱ្យមាន IQ ខ្ពស់គិតបានអស្ចារ្យមិនខានឡើយ៕ អត្ថបទដោយ៖ ទ្រ សុភាព