យោងតាមសាកលវិទ្យាល័យ Harvard បានធ្វើការពិសោធន៍រកឃើញថា អ្នកហូបគ្រាប់ផ្លែឈើ ឬគ្រាប់ធញ្ញជាតិជាប្រចាំថ្ងៃអាចជួយពន្យារអាយុជីវិតរបស់មនុស្សរស់នៅបានយូរ។ ព្រោះអាហារសម្រន់ដ៏សាមញ្ញមួយ មានអត្ថប្រយោជន៍គួរឱ្យចាប់អារម្មណ៍ក្នុងការកាត់បន្ថយជំងឺកាចៗ ជួយបញ្ចុះកូឡេស្តេរ៉ុល ឱ្យសម្រកគីឡូ។ ព្រោះនៅក្នុងគ្រាប់ធញ្ញជាតិមានជាតិសរសៃ ខ្លាញ់សុខភាពល្អ វីតាមីន សារធាតុរ៉ែ និងសារធាតុ phytochemicals ជាលក្ខណៈសម្បត្តិជួយការពារលំហូរឈាមចរន្តទៅកាន់បេះដូង ប្រឆាំងមហារីក ប្រឆាំងនឹងការរលាក និងមានសារធាតុប្រឆាំងអុកស៊ីតកម្មផងដែរ។ 

តាមលោកវេជ្ជបណ្ឌិត Frank Hu ជាសាស្ត្រាចារ្យផ្នែកអាហារូបត្ថម្ភនៅ Harvard ក៏បានលើកឡើងថា អ្នកញ៉ាំគ្រាប់ធញ្ញជាតិជារៀងរាល់ថ្ងៃ ជួយឱ្យរស់នៅបានយូរជាងអ្នកមិនបរិភោគគ្រាប់ធញ្ញជាតិអ្វីសោះ។ ហើយតាមរបាយការណ៍បានបោះពុម្ពផ្សាយនៅ New England Journal of Medicine បានបង្ហាញថាអ្នកញ៉ាំគ្រាប់ធញ្ញជាតិទំនងជាមិនសូវស្លាប់ដោយសារជំងឺមហារីក និងជំងឺបេះដូងនោះទេ។

គ្រាប់ធញ្ញជាតិទាំងអស់នេះមានដូចជា គ្រាប់ផ្កាឈូករ័ត្ន គ្រាប់ល្ង គ្រាប់ល្ពៅ គ្រាប់អាភៀន គ្រាប់ស្វាយចន្ទី សណ្តែកដី គ្រាប់អង្គាដី  គ្រាប់អាល់ម៉ុន (Almond) គ្រាប់កៅឡាក់...។ អ្នកអាចញ៉ាំគ្រាប់ធញ្ញជាតិម្តងក្នុងមួយអាទិត្យ និង២ឬ៣ដងក្នុងមួយថ្ងៃ តាមការស្រាវជ្រាវរយៈពេល ៣០ឆ្នាំ ជា​លទ្ធផលអ្នកញ៉ាំ ​២៨​ក្រាម​ក្នុង​មួយ​ថ្ងៃ​ៗ វានឹង​កាត់​បន្ថយការ​ស្លាប់​បាត់បង់​ជីវិត​ចំនួន ២០% ដែល​បណ្តាល​មក​ពី​កត្តា​ដូចជា ជំងឺមហារីក​ជំងឺ ជំងឺបេះដូង និងបញ្ហា​ផ្លូវដង្ហើម​ជាដើម៕ អត្ថបទដោយ៖ ទ្រ សុភាព