១.ដំឡូងជ្វា៖ ការញ៉ាំដំឡូងជ្វា ១-២ ផ្លែ អាចកាត់បន្ថយ ២០-២៥% នៃកាឡូរីក្នុងរាងកាយ បើប្រៀបធៀបទៅនឹងការទទួលទានបាយ ១-២ ចាន។ បើប្រៀបធៀបទៅនឹងអង្ករ ដំឡូងជ្វាមានមាតិកាខារ៉ូទីនខ្ពស់ អាហារប្រភេទនេះក៏សម្បូរជាតិសរសៃនាំឱ្យអារម្មណ៍ឆ្អែតបានយូរ ល្អសម្រាប់ប្រព័ន្ធរំលាយអាហារ ការពារទល់លាមកនិងដុតខ្លាញ់។

២. ផ្លែចេកដុតខ្លាញ់បានលឿន ល្អដល់ក្រពះទៀត៖ តាមគេហទំព័រ The Times of India បានចុះផ្សាយថា ផ្លែចេកបានរួមចំណែកដល់ការសម្រកគីឡូបានលឿន ព្រោះវាមានសារធាតុប្រឆាំងអុកស៊ីតកម្ម និងជាតិសរសៃយ៉ាងល្អ។ សម្រាប់ផ្លែឈើនេះមានជាតិប៉ូតាស្យូមខ្ពស់ និងមានកាបូអ៊ីដ្រាតដែលមានសុខភាពល្អឲ្យអ្នកហូបឆ្អែតបានយូរហើយផ្តល់ថាមពលឱ្យអ្នកគ្រប់គ្រាន់សម្រាប់សកម្មភាពកិច្ចការជាប្រចាំថ្ងៃផងដែរ។

៣. ផ្លែឪឡឹកមានជាតិទឹកច្រើន ល្អដល់ការសម្រកគីឡូ៖ បើយោងតាមគេហទំព័រ healthline បានចុះផ្សាយថា  ចំពោះផ្លែឪឡឹកនេះសម្បូរទៅដោយជាតិទឹកមានសារធាតុប្រឆាំងអុកស៊ីតកម្ម និងជាតិសរសៃជួយសម្រួលការសម្រកគីឡូបានល្អ។ ហើយផ្លែឈើនេះមានកាឡូរីទាបត្រឹម ៤៦.៥ កាឡូរី រួមមានកាបូអ៊ីដ្រាត ១២ ក្រាម ស្ករ ១០ ក្រាម និងជាតិសរសៃ។ ការហូបផ្លែឪឡឹកនេះទប់ស្កាត់ការឃ្លាន ហើយធ្វើឱ្យអ្នកស្រកគីឡូបានលទ្ធផលលឿន។

៤. ការហូបបន្លែច្រើនជួយសម្រកគីឡូ។ មនុស្សមួយចំនួនពេលស្រ្តេសគិតមិនចេញចេះតែហូបអាហារមិនគិតលើរបបអាហារផ្អែមៗនិងខ្លាញ់ច្រើន នាំឱ្យធាត់លើសដើម។ ការហូបបន្លែច្រើនដែលផ្តល់សារធាតុចិញ្ចឹមឱ្យរាងកាយដើម្បីប្រយុទ្ធប្រឆាំងនឹងជំងឺបេះដូង និងជំងឺទឹកនោមផ្អែមប្រភេទទី២ មានបន្លែដូចជា ប្រូខូលី ស្ពៃ​ស្ពីណាច ការ៉ុត ផ្កាខាត់ណា ប៉េងប៉ោះ ត្រសក់ ទំពាំងបារាំង សណ្តែក ស្ពៃចង្កឹះ... សម្រាប់ការសម្រកគីឡូព្រោះវាសម្បូរទៅដោយជាតិសរសៃ និងវីតាមីន A, K និង Cដល់រាងកាយឱ្យមានថាមពលផងដែរ ។

៥. .ស៊ុបផ្សិត៖ យោងតាមរយៈលោក ​​Julieanna Hever ដែលជាអ្នកនិពន្ធសៀវភៅ The Vegiterranean Diet បាននិយាយបញ្ជាក់ឱ្យដឹងថា ការទទួលទានស៊ុបមុនចាប់ផ្ដើមញុំាអាហារគឺអាចជួយកាត់បន្ថយកម្រិតញុំារបស់អ្នកបានច្រើន ជួយសម្រកគីឡូ​​ ប្រភេទស៊ុបអាចញុំាបានមានដូចជាស៊ុបសាច់មាន់ ស៊ុប​ផ្សិតសុទ្ធជាដើម។ដូច្នេះអាចសាកល្បងញុំាស៊ុបមុនញុំាអាហារតាមក្រោយដើម្បីជួយសម្រកគីឡូ៕ អត្ថបទដោយ៖ ទ្រ សុភាព