សុខភាពឆ្អឹងពិតជាសំខាន់ណាស់ចំពោះកុមារ ដើម្បីបង្ការការពារជំងឺពុកឆ្អឹងនៅថ្ងៃក្រោយ។ ការមានឆ្អឹងដែលមានសុខភាពល្អពីក្មេង គឺជួយឱ្យឆ្អឹងកូនរបស់របស់អ្នករឹងមាំពេញមួយជីវិតពីក្មេងដល់ចាស់។ ការស្រាវជ្រាវក៏បានបង្ហាញផងដែរថា មនុស្សដែលមានសុខភាពឆ្អឹងខ្សោយ និងផុយស្រួយក្នុងវ័យចំណាស់ដោយសារកង្វះវីតាមីនកាលពីវ័យក្មេង។
ជាការពិតណាស់ ដើម្បីឱ្យសុខភាពឆ្អឹងរបស់កូនរឹងមាំល្អ លូតលាស់បានលឿន អ្នកជំនាញផ្នែកចំណីអាហារ Franziska Spritzler បានណែនាំទៅកាន់ម៉ាក់ប៉ា គួរតែរៀបចំរបបអាហារឱ្យកូនញ៉ាំឱ្យគ្រប់វីតាមីនទាំង៤ដូចខាងក្រោម៖
១. កាល់ស្យូម៖ សារធាតុកាល់ស្យូមក៏ដើរតួយ៉ាងសំខាន់សម្រាប់ទ្រទ្រង់ប្រព័ន្ធរាងកាយ ដូចជាសុខភាព និងមុខងារនៃសរសៃប្រសាទ ឆ្អឹង និងជាលិកាសាច់ដុំ។ កាល់ស្យូមត្រូវបានរកឃើញនៅក្នុងអាហារជាច្រើនប្រភេទរួមមាន៖ ទឹកដោះគោ ទឹកដោះគោជូរ ត្រីសាឌីន ឬត្រីសាលម៉ុង និងទឹកសណ្តែក។ ប្រសិនបើអ្នកគិតថាកូនរបស់អ្នកប្រហែលជាមិនទទួលបានកាល់ស្យូមគ្រប់គ្រាន់ដែលពួកគេត្រូវការដើម្បីគាំទ្រដល់ការលូតលាស់ឆ្អឹងរបស់ពួកគេនោះ សូមអ្នកឱ្យកូនផឹកទឹកគោដែលមានផ្ទុកជាតិកាល់ស្យូម ឱ្យកូនញ៉ាំសណ្តែក និងញ៉ាំសាច់ត្រីឱ្យបានច្រើន។
២. វីតាមីនD៖ មានសារៈសំខាន់ខ្លាំងណាស់ សម្រាប់កុមារក្នុងការធ្វើឱ្យការលូតលាស់របស់ឆ្អឹងមានសុខភាពល្អតាំងពីវ័យកុមារភាព។ ប្រភពអាហារវីតាមីនD មានដូចជាត្រីសាលម៉ុន ធូណា ត្រីស្បៃកា ផលិតផលទឹកដោះគោ ទឹកសណ្ដែក ទឹកក្រូច ស៊ុតលឿង ឈីស ថ្លើមគោ...។ លើពីនេះទៀតអ្នកអាចឱ្យកូនរបស់អ្នកញ៉ាំថ្នាំគ្រាប់វីតាមីនD កុមារដែលមានអាយុចាប់ពី៤ឆ្នាំឡើងគួរញ៉ាំវីតាមីនD៦០០IU ក្នុងមួយថ្ងៃ។
៣. វីតាមីនK៖ មានតួនាទីជាច្រើននៅក្នុងរាងកាយប៉ុណ្ណោះទេ ថែមទាំងមានតួនាទីដល់ការទ្រទ្រង់ឆ្អឹង ឱ្យមានសុខភាពល្អផងដែរ។ សារៈសំខាន់នៃវីតាមីនខេ គឺជម្រុញនៃមុខងាររបស់ថ្លើម ជួយដល់សុខភាពឆ្អឹង និងបេះដូងផងដែរ។ ប្រភពនៃវីតមីន ខេ ដែលសំបូរជាងគេគឺមាននៅឈីស និងសណ្តែកសៀង។
៤. វីតាមីនសំខាន់ទី៤គឺជាវីតាមីនដែលទាញចេញការហាត់ប្រាណ៖ សម្រាប់សុខភាពឆ្អឹងរឹងមាំ ការធ្វើលំហាត់ប្រាណគឺជាវិធីមួយដ៏ល្អសម្រាប់កុមារ ក្នុងការរក្សាទម្ងន់របស់ពួកគេ។ ចំពោះកុមារចាប់ពីអាយុ ៦ ទៅ១៧ឆ្នាំ ត្រូវបានណែនាំឱ្យហាត់ប្រាណរាងកាយដោយការរត់ ដើរ លេងកីឡាបញ្ចេញញើសយ៉ាងតិចណាស់ ៣០នាទីជារៀងរាល់ថ្ងៃ។ ក្មេងតូចៗគួរតែត្រូវបានលើកទឹកចិត្តឱ្យលេងយ៉ាងសកម្មច្រើនដងក្នុងមួយថ្ងៃផងដែរ៕
ប្រភព៖ Healthline
អត្ថបទដោយ៖ គន្ធា
