ធម្មតាក្រោយពេលសម្រាលកូនរួច អរម៉ូនម៉ាក់ៗប្រែប្រួលខ្លាំងវាអាចប៉ះពាល់ដល់ស្បែក អាចធ្វើឱ្យស្បែកម៉ាក់ៗកាន់តែស្ងួតខ្លាំងថែមទៀត។ សំណួរដែលម៉ាក់ៗតែងតែសួរគឺ សម្រាលហើយប៉ុន្មានខែទើបអាចលាបឡេ ហាត់ប្រាណថែរាងបាន។
ចំពោះការលាបឡេ ចំពោះម៉ាក់ៗដែលគាត់មិនបំបៅដោះកូន គឺគាត់អាចចាប់ផ្តើមលាបឡេបានភ្លាមនៅក្រោយពេលសម្រាលកូន ប៉ុន្តែឡេដែលបងប្អូនគួរលាបគឺជាប្រភេទឡេផ្តល់សំណើមដល់ស្បែក កុំទាន់លាបឡេធ្វើឱ្យស្បែកស បើយល់ល្អគួរលាបឡេសម្រាប់អ្នកមានផ្ទៃពោះបន្តទៀតសិនក៏បាន។ ហើយចំពោះម៉ាក់ៗដែលគាត់បំបៅកូនដោយទឹកដោះ គឺគួរកុំទាន់លាបឡេអី ជាពិសេសគឺឡេដែលធ្វើឱ្យស្បែកស ឡេជាតិកាត់ ឡេលាយ ម៉ាក់ៗអត់គួរលាបនៅអំឡុងពេលដែលកំពុងបំបៅដោះកូននោះទេ។
មួយទៀតចំពោះការហាត់ប្រាណថែរាងក្រោយពេលសម្រាល ប្រសិនបើម៉ាក់ៗសម្រាលកូនដោយធម្មជាតិ គឺក្រោយពេលសម្រាល ១សប្តាហ៍ទៅ២សប្តាហ៍ អាចចាប់ផ្តើមហាត់ប្រាណបានហើយ ដូចជាការដើរ ហាត់ប្រាណបែបយូហ្គាស្រាលៗ។
ប៉ុន្តែចំពោះម៉ាក់ៗដែលសម្រាលដោយការវះកាត់វិញទ្រូវរងចាំបាច់ពី៦សប្តាហ៍ឡើងទៅទើបអាចហាត់ប្រាណបាន ម៉ាក់ៗត្រូវប្រាកដថាខ្លួនឯងជាមុខរបួសសិនចាំហាត់ប្រាណ ព្រោះប្រសិនបើហាត់អំឡុងពេលរបួសមិនទាន់ជា វាអាចធ្វើឱ្យដាច់ថ្នេររបួសបាន៕