ប្រសិនបើនិយាយអំពីប្រភេទភេសជ្ជៈជំនួយដល់ការគេង បងប្អូនភាគច្រើនមែនទែន គិតឃើញទៅដល់ទឹកដោះគោក្តៅឧណ្ហសម្រាប់ញុំាមុនចូលគេង ដើម្បីទាញបានប្រសិទ្ធិភាពជួយឱ្យឆាប់គេងលក់ គេងលក់បានស្កប់ស្កល់ និងជះផលកាន់តែល្អជំនួយដល់អារម្មណ៍នាក្នុងអំឡុងពេលព្រឹក។
យ៉ាងណាមិញ ក្រោមប្រធានបទជួយសុខភាពរាងកាយ ជួយដល់ដំណើរគេងឱ្យឆាប់លក់នឹងដែរ ក្នុងប្រធានបទថ្ងៃនេះ Healthy Cambodia សូមលើកយកនូវភេសជ្ជៈល្អៗបន្ថែមចំនួន ៤មុនទៀត ដែលមានប្រយោជន៍មិនត្រឹមតែជួយមុខងារខួរក្បាល ធ្វើឱ្យគេងលក់ស្កប់ស្កល់ល្អនោះទេ គឺអាចបំប៉នដល់ស្បែកបានផងដែរ៖
១. ទឹកដោះគោអាល់មុន៖ ទឹកដោះគោអាល់ម៉ុន ជួយដោយសារចិញ្ចឹមសំខាន់ៗ និងសារធាតុរ៉ែដែលមានមុខងារជំរុញការគេងដូចជា tryptophan, melatonin និងម៉ាញ៉េស្យូម។ ដោយអត្ថប្រយោជន៍ទាំងនេះ វាល្អបំផុតជួយខួរក្បាលឱ្យស្ងប់ គេងលក់បានលឿន។ ទន្ទឹមនឹងនេះ ប្រភពដ៏អស្ចារ្យនៃវីតាមីន E ដែលមានក្នុងទឹកដោះគោអាល់មុននឹងផងដែរ វាមានសារៈសំខាន់ ជួយក្នុងការបង្កើតកោសិកា, ទប់ស្កាត់បញ្ហារលាក និងធ្វើឱ្យស្បែកភ្លឺថ្លាល្អបន្ថែម១កម្រិតទៀត។
២. ទឹកដោះគោល្មៀត៖ ទឹកដោះគោមានសមាសធាតុជម្រុញការគេងចំនួន ៤គឺទ្រីប៉ូតូផាន កាល់ស្យូម វីតាមីនD និងមេឡាតូនីន ចំណែកឯម្សៅល្មៀត មានសារធាតុប្រឆាំងអុកស៊ីតកម្មខ្ពស់ ជួយដោះស្រាយបញ្ហារលាក និងវិបត្តិគេងមិនលក់។ ការទទួលទានទឹកដោះគោលល្មៀតក្តៅៗមួយពែង មុនពេលចូលគេងជាវិធីជួយបន្ធូរអារម្មណ៍ពេលនៅយប់ ខួរក្បាលបានស្កប់ ធ្វើឱ្យដំណើរការនៃការគេងឆាប់លង់លក់។
៣. Herbal Tea (តែធ្វើចេញពីរុក្ខជាតិ)៖ តែរុក្ខជាតិដូចជា chamomile, ginger និង mint ត្រូវបានគេរកឃើញនូវសារជាតិចិញ្ចឹមដ៏សម្បូរបែបនៅខាងក្នុងវា ជាពិសេសនោះសារធាតុប្រឆាំងអុកស៊ីតកម្ម សារជាតិចិញ្ចឹមទាំងអស់នេះ មានលក្ខណៈពិសេសជួយលើកកម្ពស់ការគេង បង្កើនគុណភាពដំណេក ប្រសិនបើបានញុំាក្តៅៗមុនចូលគេងកន្លះម៉ោងទៅ១ម៉ោងទៀត រឹតតែមានប្រសិទ្ធិជួយដល់ខួរក្បាលឱ្យបានសម្រាក និងរក្សាសំណើមឱ្យស្បែក។
៤. ទឹកសណ្តែក៖ នៅសារចិញ្ចឹមនៅក្នុងទឹកសណ្តែក ក៏មានប្រយោជន៍មិនចាញ់ទៅនឹងទឹកដោះគោប៉ុន្មានដែរ ព្រោះមានការសិក្សាស្រាវជ្រាវមួយចំនួនបានបង្ហាញថា ទឹកដោះគោសណ្តែក អាចជំរុញឱ្យមានប្រសិទ្ធិភាព sedative ធម្មជាតិ ដោយធ្វើឱ្យប្រសើរឡើងនូវកម្រិត Melatonin របស់រាងកាយ កាត់បន្ថយភាពតានតឹង ជំរុញដល់វដ្តនៃការគេងឱ្យកាន់តែមានគុណភាព៕