តើអាហារមានឥទ្ធិពលដល់ខួរក្បាលទេ? ចម្លើយពិតជាមាន។ ពេលអ្នកផឹកស្រាអស់ពេលជាច្រើន វាធ្វើឱ្យប៉ះពាល់ដល់កោសិកាខួរក្បាលចុះថយ។ ដូចជាពាក្យលេងសើចមួយបាននិយាយថា ផឹកស្រាបំឡប់ទុក្ខ តែផឹកយូរៗ ទៅ ឡាប់តែអ្នកផឹក។ ទោះបីលេងសើចបន្តិចមែនវាបញ្ជាក់ថា ស្រាប៉ះពាល់ដល់អង្គចងចាំក្នុងខួរក្បាល មានអ្នកខ្លះគាត់ឆាប់ភ្លេចព្រោះតែស្រានេះឯង។ មានអាហារផ្សេងៗ នាំឱ្យប៉ះពាល់ដល់ខួរក្បាលដែរ។ នៅខាងក្រោមនេះ យើងមានអាហារ ៣ជួយខួរក្បាលបានល្អកុំឱ្យកើតជំងឺវង្វេង។

១. ផ្លែពោត៖ នៅស្រុកខ្មែរក៏មានសម្បូរពោតលក់ដែរ។ បើអ្នកញ៉ាំពោតមួយថ្ងៃមួយផ្លែឬពីរផ្លែពិតជាជំនួយដល់សុខភាពខួរក្បាលល្អណាស់។ វេជ្ជបណ្ឌិត Annie Yessaian បានឲ្យដឹងថា ពោតមានសារធាតុចិញ្ចឹមខ្ពស់ និងល្អខ្លាំងណាស់សម្រាប់សុខភាពបេះដូង ភ្នែក ស្បែក ការរំលាយអាហារ ជាពិសេសខួរក្បាល។ នេះក៏ព្រោះតែពោតមានបរិមាណ Folate វីតាមីន B9 និង Thiamin វីតាមីន B1 ខ្ពស់។ វីតាមីន B1 នៅក្នុងពោតផ្តល់សារធាតុ Acetylcholine ជាអ្នកនាំសារនៅក្នុងសរសៃប្រសាទ ធ្វើឲ្យមុខងារខួរក្បាលកាន់តែល្អ និងការចងចាំប្រសើរឡើង។

២. គ្រាប់ធញ្ញជាតិជួយខួរក្បាល៖ គ្រាប់ធញ្ញជាតិគឺមានដូចជាគ្រាប់អាល់ម៉ុន គ្រាប់ស្វាយចន្ទី គ្រាប់ល្ពៅជាដើម គ្រាប់ទាំងនេះគឺមានប្រយោជន៍ជួយខួរក្បាល ធ្វើឱ្យខួរក្បាលរបស់ចងចាំល្អ បង្ការបញ្ហាភ្លេចភ្លាំងច្រើន។ នេះក៏ព្រោះតែក្នុងគ្រាប់ធញ្ញជាតិសម្បូរដោយអាស៊ីតខ្លាញ់អូមេហ្គា៣ដែល ជាប្រភេទអាស៊ីតខ្លាញ់ខួរក្បាលចូលចិត្ត​ ហើយត្រូវការប្រើប្រាស់បំផុត។ ហើយគ្រាប់ធញ្ញជាតិទាំងអស់នេះពិតជាមានឥទ្ធិពលលើខួរក្បាលកុំឱ្យកើតជំងឺវង្វេងផងដែរ។

៣. កាហ្វេមានឥទ្ធិពលដល់ប្រព័ន្ធខួរក្បាល៖ កាហ្វេជាភេសជ្ជៈមួយដែលគេនិយមផឹកជាប្រចាំថ្ងៃនៅខ្មែរយើងក៏មានអ្នកចូលចិត្តច្រើនឡើងដែរ។ បើយោងតាមការស្រាវជ្រាវដែលចុះផ្សាយដោយគេហទំព័រHealthline បានចុះផ្សាយថា កាហ្វេជួយបង្កើនការចង់ចាំរបស់ខួរក្បាលបានល្អ។ វាជួយកាត់បន្ថយជំងឺ Alzheimer Disease (ជំងឺភ្លេចភ្លាំង) និង Parkinson Disease (ជំងឺញ័រដៃ ញ័រជើង)ការផឹកកាហ្វេបានល្អចាប់ពី២-៤ពែងក្នុងមួយថ្ងៃត្រូវបានផ្សារភ្ជាប់នឹងការថយជំងឺដាច់សរសៃឈាមខួរក្បាលបាន ២៥%។ ចូរអ្នកផឹកកាហ្វេមួយថ្ងៃ ២កែវជាការល្អបំផុត៕ អត្ថបទដោយ៖ ទ្រ សុភាព