អាហារចំនួន៣មុខ ដែលស្រ្តីមានផ្ទៃពោះភាគច្រើនតែងតែចូលចិត្តនិយមញ៉ាំតៗគ្នា ថាជួយធ្វើឱ្យសាច់ស្អាត កូនសុខភាពល្អ ម៉ាក់ៗសុខភាពរឹងមាំ ប៉ុន្តែបើតាមក្បួនវេជ្ជសាស្រ្តអាហារចំនួន៣នេះគឺគេហាមមិនឱ្យស្រ្តីមានផ្ទៃពោះញ៉ាំតែម្តង។
យោងតាមការសម្ភាសន៍ផ្ទាល់ជាមួយ វេជ្ជបណ្ឌិត ហួត អាលីស ជាវេជ្ជបណ្ឌិតឯកទេសសម្ពពនិងរោគស្ត្រី ប្រចាំការនៅមន្ទីរពហុព្យាបាល និងសម្ភពសោភា បានបញ្ជាក់ថា ស្រ្តីមានផ្ទៃពោះគ្រប់រូបត្រូវប្រុងប្រយ័ត្ន ចំពោះរបបអាហារឱ្យបានខ្ពស់។ ពីព្រោះប្រសិនជាអ្នកព្យាយាមញ៉ាំនេះញ៉ាំនោះតាមតែចិត្ត ញ៉ាំតាមជំនឿដែលណែនាំមកតាមៗគ្នាដោយគ្មានការណែនាំពីវេជ្ជបណ្ឌិតជំនាញឱ្យបានច្បាស់លាស់ អ្នកងាយនឹងប្រឈមបំផុតជាមួយការទាស់ធ្លាក់ឈាមគ្រោះថ្នាក់នៅក្រោយសម្រាល។ ជាមួយគ្នានេះដែរមានអាហារ៣ដែលស្រ្តីមានផ្ទៃពោះគ្រប់រូបត្រូវចៀសវាងឱ្យបានក្នុងអំឡុងពេលមានផ្ទៃ ដើម្បីការពារការទាល់ធ្លាក់ឈាមនៅក្រោយសម្រាកគ្រោះថ្នាក់មានដូចជា៖
១. ថ្នាំខ្មែរនិងចិនសែរ៖ មកទល់បច្ចុប្បន្នជឿថានៅមានស្រ្តីមានផ្ទៃពោះមួយចំនួនគាត់នៅប្រកាន់ខ្ជាប់ជាមួយនិងទម្លាបញ៉ាំថ្នាំខ្មែរឬថ្នាំចិនសែរក្នុងអំឡុងពេលពពោះ។ គាត់ជឿថាការញ៉ាំបែបនេះគឺជួយជំនួយទៅដល់ការសម្រាលកូនរបស់គាត់ស្រួល មិនឈឺពោះខ្លាំង កូនកើតមកជ្រះខ្លួនល្អ។ ប៉ុន្តែពួកគាត់ភ្លេចគិតថា ពពួកថ្នាំខ្មែរឬថ្នាំចិនសែរដែលផ្សំមកពីធម្មជាតិវាមានផ្ទុកជាមួយជាតិជ័រ កម្ទេចកម្ទីតូចៗនៃសាច់ថ្នាំ វាបង្កនៅក្នុងពោះ ហើយអាចបណ្តាលឱ្យស្រ្តីមានការធ្លាក់ឈាមក្រោយសម្រាល។ ដូច្នេះជម្រើសល្អបំផុត អ្នកគួរផឹកតែទឹកធម្មតា១ថ្ងៃឱ្យបាន៣លីត្របានហើយ។
២. គ្រាប់ជី៖ គ្រាប់ជីលាយជាមួយទឹកដោះគោស្រស់ ជាប្រភេទអាហារសម្រន់ដែលស្រ្តីភាគច្រើនគាត់ចូលចិត្តញ៉ាំ ដោយគាត់បានដឹងតៗគ្នាថា ការញ៉ាំគ្រាប់ជី១កែវក្នុងមួយថ្ងៃ គឺជួយសម្រួលទៅដល់ប្រព័ន្ធរំលាយអាហារ ជួយឱ្យត្រជាក់ក្នុងពោះ។ បើចំពោះអ្នកគ្មានផ្ទៃពោះគឺគ្មានបញ្ហាអ្វីនោះទេបើញ៉ាំគ្រាប់ជី១ថ្ងៃ១កែវ ប៉ុន្តែសម្រាប់ស្រ្តីមានផ្ទៃពោះគឺមានបញ្ហា នឹងធ្វើឱ្យគាត់ធ្លាក់ឈាមក្រោយសម្រាល ស្អិតសុកកូនជាប់ក្នុងពោះមិនធ្លាក់។
៣. ទឹកដូងទុំ៖ ជឿថានៅតាមតំបន់មួយចំនួន ជាពិសេសនៅតាមបណ្តាខេត្ត ចាស់ៗជំនាន់ដើមគាត់តែងមានជំនឿថាស្រ្តីមានផ្ទៃពោះគេឱ្យផឹកទឹកដូងទុំឱ្យបានច្រើនដើម្បីជំនួយសុខភាព សម្រាលកូនស្រួល មិនឈឺពោះខ្លាំង។ តាមពិតទៅទឹកដូងទុំខុសពីដូងខ្ចី ពេលមានផ្ទៃពោះបើផឹកទឹកដូងខ្ចីមិនមានបញ្ហាអ្វីនោះទេ ប៉ុន្តែបើផឹកទឹកដូងទុំ ១០០% នៅពេលស្រ្តីសម្រាលកូនរួចនឹងធ្លាក់ឈាម ខ្សោះខ្លួន ខ្សោយអស់ពីខ្លួន កូនអាចសម្រាលលើសថ្ងៃមិនងាយឈឺពោះ៕