បច្ចុប្បន្នបើនិយាយពីរឿងវិបត្តិក្នុងការគេង គឺកើតមានច្រើនណាស់មិនថាទៅលើមនុស្សចាស់ ឬក្មេងៗទើបតែពេញវ័យនោះទេ។ ទន្ទឹមនឹងនេះទៀតសោត បញ្ហាគេងមិនលក់ គេងមិនស្កប់នេះ វាអាចបង្កជាផលប៉ះពាល់ច្រើនមែនទែនទៅដល់សុខភាព ដោយសារតែវិបត្តិគុណភាពដំណេកនេះ នឹងងាយធ្វើឱ្យមនុស្សប្រឈមមុខជាមួយជំងឺបេះដូង ជំងឺថប់បារម្ភ លើសសម្ពាធឈាម ជំងឺធាត់ ខ្សោយតម្រងនោម និងជំងឺទឹកនោមផ្អែមផងដែរ។
កត្តានេះហើយ ដើម្បីជាដំណោះស្រាយ ជួយកែប្រែស្ថានភាពដំណេកបងប្អូនឡើងវិញ ថ្ងៃនេះ Healthy Cambodia សូមលើកយកនូវគន្លឹះជួយឱ្យឆាប់គេងលក់ចំនួន6 ដែលបងប្អូនអាចសាកល្បងធ្វើវានៅផ្ទះបាន៖
1. រក្សាកាលវិភាគនៃការគេងឱ្យទៀងទាត់៖ ចូលគេង និងក្រោកពីគេងក្នុងពេលនៅដដែលជារៀងរាល់ថ្ងៃ មិនថាសូម្បីតែចុងសប្តាហ៍ក៏ដោយ គឺមានប្រយោជន៍ជួយហ្វឹកហ្វាត់ខួរក្បាល និងរាងកាយឱ្យទម្លាប់ជាមួយនឹងពេលវេលា។ ការទម្លាប់បែបនេះ យូរៗទៅអាចធ្វើឱ្យយើងងងុយគេង និងភ្ញាក់ពីគេងទៀងទាត់ម៉ោង ទោះបីជាមិនមាននាឡិការោទិ៍ក៏ដោយ។
2. បង្កើតបរិយាកាសបន្ទប់គេង៖ បន្ទប់គេងដែលមានសីតុណ្ហភាពត្រជាក់ ងងឹត ស្ងប់ស្ងាត់ និងជាបន្ទប់ដែលរៀបចំបានស្អាតមានរបៀបរៀបរយ អាចជះផលល្អជួយអនុញ្ញាតឱ្យរាងកាយ និងខួរក្បាលសម្រាកបានលឿន កាត់បន្ថយបញ្ហាតានតឹងអំឡុងពេលមុនចូលគេង។
3. បច្ចេកទេសបន្ធូរអារម្មណ៍៖ ការអនុវត្តបច្ចេកទេសបន្ធូរអារម្មណ៍មុនចូលគេងដូចជា ដកដង្ហើមជ្រៅៗ សមាធិ ឬការងូត ប្រើប្រាស់នូវផលិតផល skin care routine ក៏អាចជួយឱ្យផ្នែកដែរ។
4. កាត់បន្ថយការប្រើប្រាស់នូវគ្រឿងអេឡិចត្រូនិក៖ ពន្លឺពណ៌ខៀវនៃអេក្រង់កុំព្យូទ័រ ទូរស័ព្ទ ឬអេក្រង់ប្រព័ន្ធឌីជីថលផ្សេងៗទៀត អាចជាដើមហេតុរំខានដល់ដំណេក។ តួយ៉ាង បើផ្អែកតាមការសិក្សាបានបង្ហាញដឹងថា ឧបករណ៍ទាំងនេះអាចរំខានដល់ដំណេកដោយរារាំងការផលិតសារធាតុ melatonin ដែលជាអរម៉ូនធម្មជាតិបញ្ចេញនៅពេលល្ងាច ធ្វើឱ្យខួរក្បាលពិបាកក្នុងការកំណត់យកការគេង រាងកាយពិបាកសម្រាកតាមពេលវេលា។
5. កាត់បន្ថយគ្រឿងស្រវឹង និងភេសជ្ជៈមានជាតិកាហ្វេអ៊ីន៖ ការទទួលភេសជ្ជៈមានជាតិកាហ្វេអ៊ីនដូចជា ភេសជ្ជៈកំប៉ុង តែបៃតង កាហ្វេ និងគ្រឿងស្រវឹង ជិតចូលគេងវាអាចនឹងធ្វើឱ្យរំខានដល់ដំណេកដូចគ្នា។
6. គ្រប់គ្រងភាពស្ត្រេស តានតឹង៖ ភាពស្ត្រេសតានតឹង គឺជារឿងចម្បង១ដែលធ្វើឱ្យបុគ្គលម្នាក់ដែលគាត់ជួបវិបត្តិពិបាកក្នុងការគេង ឬមានបញ្ហាគុណភាពដំណេកគេងមិនស្ងប់ផងដែរ។ ទាក់ទិនទៅនឹងបញ្ហាស្ត្រេសតានតឹងនឹងដែរ គួរណាស់តែបន្ធូរភាពតានតឹងតាមរយៈគ្រប់គ្រងអារម្មណ៍តាមរយៈការអានសៀវភៅ ស្តាប់ភ្លេងជំនួយអារម្មណ៍ ឬស្តាប់នូវដំបូន្មានល្អៗដើម្បីជំនួយសុខភាពផ្លូវចិត្ត៕