របបអាហារខ្លោចៗ វាត្រូវបានក្លាយទៅជាមុខសញ្ញាមួយដែលអ្នកជំនាញកំពុងតែសិក្សាស្រាវទៅលើផលប៉ះពាល់កម្រិតពីស្រាលទៅធ្ងន់ទៅដល់សុខភាពអ្នកញុំាក្នុងលក្ខខណ្ឌញុំាវាជាប្រចាំ និងលើបរិមាណដែលសរីរាង្គកាយទ្រាំទ្រមិនបាន។

បច្ចុប្បន្ននេះ ថ្វីត្បិតតែរបបអាហារខ្លោចនូវមិនទាន់មានអ្នកជំនាញសង្កត់ធ្ងន់ពីផលប៉ះពាល់ដល់រាងកាយយ៉ាងណាក៏ដោយ ក៏ប៉ុន្តែគេក៏រកឃើញហេតុមួយចំនួនដែលចូលចិត្តញុំា និងទម្លាប់ញុំារបបអាហារខ្លោចគួរកាត់បន្ថយតាមតែអាចធ្វើទៅបាន៖

១. បង្កើនហានិភ័យមហារីក៖ ផ្អែកទៅតាមការចុះផ្សាយរបស់គេហទំព័រ hindustantimes បានលើកឡើងឱ្យដឹងថា ក្រោមប្រធានបទអាហារខ្លោចៗក៏មានសិក្សាវិភាគមួយចំនួនបង្ហាញឱ្យដឹងដែរថា វាអាចជំរុញឱ្យអ្នកទទួលទានប្រឈមនឹងការកើតជំងឺមហារីក។ ដោយហេតុថា អាហារដែលត្រូវដុតឱ្យខ្លោច ឬចម្អិនជ្រុលរហូតដល់ខ្លោច អាចបង្កើតជាសមាសធាតុម្យ៉ាង គេហៅថា heterocyclic amines (HCAs) និង polycyclic aromatic hydrocarbons (PAHs) ដែលជាសារធាតុបង្កឱ្យកើតមហារីក។ សមាសធាតុទាំងនេះ ត្រូវបានផ្សារភ្ជាប់ទៅនឹងការកើនឡើងហានិភ័យនៃជំងឺមហារីកពោះវៀនធំ ក្រពះ និងលំពែង។  

២. បញ្ហាផ្លូវដង្ហើម៖ ការចម្អិនអាហារខ្លោចៗជាប្រចាំ អាចបញ្ចេញផ្សែងដែលបង្កគ្រោះថ្នាក់ អាចធ្វើឲ្យរលាកប្រព័ន្ធផ្លូវដង្ហើម និងបង្កបញ្ហាដល់ការដកដង្ហើម។

៣. បញ្ហារំលាយអាហារ៖ ការញុំាអាហារដែលខ្លោច អាចធ្វើឱ្យប្រព័ន្ធរំលាយអាហារពិបាកក្នុងការរំលាយ ហើយអាចបណ្តាលឱ្យមានបញ្ហាក្រពះពោះវៀនដូចជា ចង្អោរ ក្អួត និងរាគ។ 

៤. បង្កើនហានិភ័យនៃជំងឺបេះដូង៖ ការទទួលទានអាហារចម្អិនក្នុងកម្លាំងខ្លាំងឱ្យវាឆ្អិនហួសហេតុ ឬខ្លោច អាចបង្កើនហានិភ័យនៃជំងឺបេះដូង ដោយការជំរុញការរលាកក្នុងរាងកាយ និងបង្កើនកម្រិតនៃភាពតានតឹងអុកស៊ីតកម្ម។

៥. បាត់បង់សារធាតុចិញ្ចឹម៖ អាហារចម្អិនឆ្អិនពេក ឬខ្លោច ភាគច្រើន គឺត្រូវបានបាត់បង់សារធាតុចិញ្ចឹម ដែលអាចជះឥទ្ធិពលអវិជ្ជមានដល់សុខភាព និងសុខុមាលភាពទូទៅផងដែរ។

ទាំងនេះ ជាហេតុផលចម្បងៗចំនួន៥ដែលអ្នកមានទម្លាប់ញុំាអាហារខ្លោចៗជាប្រចាំគួរតែយកចិត្តទុកដាក់ និងកាត់បន្ថយវាឡើងវិញ។​ របបអាហារ១ចំនួនដែលបងប្អូនចម្អិនខ្លោច បងប្អូនច្បាស់ជាគិតថា ញុំាតែផ្នែកមិនខ្លោចទៅមិនអីទេ ប៉ុន្តែមិនដូចអ្វីដែលបងប្អូនបានគិតឡើងវាអាចជះផលឱ្យដូចគ្នាគ្រាន់តែក្នុងកម្រិតតិច និងច្រើនប៉ុណ្ណោះ៕

អត្ថបទដោយ៖ ប៉ាវ ភក្តី​(Nuk)