ទឹកដោះគោស្រស់ ទឹកDetox និងទឹកក្រូចច្របាច់ គឺជាក្រុមភេសជ្ជៈជំនួយសុខភាពតាមបែបធម្មជាតិ ដែលត្រូវបានគេឱ្យតម្លៃទៅលើអត្ថប្រយោជន៍ដ៏សម្បូរបែបរបស់វាចំពោះសុខភាពរាងកាយ។ ដោយឡែក បើទោះបីជាភេសជ្ជៈទាំង៣មុខនេះ ត្រូវបានគេទទួលស្គាល់ពីគុណសម្បត្តិរបស់វាយ៉ាងណាក្តីក៏នៅតែមានបងប្អូនភាគច្រើនឆ្ងល់ថា តើគួរតែញុំាវាក្នុងបរិមាណណា និងក្នុងអំឡុងពេលណាទើបទទួលបាប្រសិទ្ធិខ្លាំងបំប៉នទៅដល់សុខភាពរាងកាយ។
កត្តានេះហើយ ក្នុងអត្ថបទ១នេះនឹងបង្ហាញបងប្អូនឱ្យកាន់តែច្បាស់ពីពេលវេលា និងបរិមាណដែលសមស្របបំផុតសម្រាប់រាងកាយ ទៅតាមប្រភេទភេសជ្ជៈនីមួយៗ៖
១. ទឹកដោះគោស្រស់៖ ជាទូទៅសម្រាប់ទឹកដោះគោ ត្រូវបានគេណែនាំឱ្យញុំាវាចំនួន២ពេល ព្រឹក-យប់ ប៉ុន្តែពេលវេលាដែលសមស្របបំផុតដែលទឹកដោះគោបញ្ចេញប្រសិទ្ធិភាពជំនួយដល់រាងកាយ គឺក្នុងពេលយប់មុនចូលគេង ញុំា១កែវមុនចូលគេង វាត្រូវបានគេរកឃើញមុខងារពិសេស ជួយដល់មុខងារខួរក្បាល ផ្លូវចិត្ត អនុញ្ញាតឱ្យរាងកាយឆាប់បានសម្រាក ដោយទាំងនេះ គឺជាកត្តាជំរុញមួយជួយឱ្យឆាប់គេងលក់ និងគេងលក់បានស្កប់ស្កល់។ ទន្ទឹមនឹងនេះ សារជាតិចិញ្ចឹមសំខាន់ៗមាននៅក្នុងទឹកដោះគោក៏ជះផលល្អបន្ថែមទៀតជួយពង្រឹងប្រព័ន្ធភាពសុំារាងកាយ ជំនួយស្បែក ឆ្អឹង និងប្រព័ន្ធរំលាយអាហារផងដែរ។
២. ទឹក Detox៖ ការញុំាទឹកDetoxមិនថាជាប្រភេទទឹក Detox បន្លែ ផ្លែឈើ ឬគ្រាប់ធញ្ញជាតិនោះទេ ភាគច្រើនត្រូវបានគេណែនាំឱ្យញុំានាក្នុងអំឡុងពេលព្រឹក បន្ទាប់ពីអាហារពេលព្រឹក ១ម៉ោងទៅ២ម៉ោង ឬអាចញុំាក្នុងចន្លោះម៉ោង ៩ទៅ១០ព្រឹក។ ចំពោះបរិមាណនៅក្នុងការញុំាវិញប្រភេទទឹកDetox គេណែនាំឱ្យញុំាទៅតាមរបៀបធ្វើផងដែរ ប្រសិនជាធ្វើក្នុងទម្រង់ទឹកDetox សុទ្ធមិនមានបន្ថែមទឹក ញុំាត្រឹម១shot ឬ១កូនកែវគឺសមល្មមសម្រាប់បំពេញសារជាតិចិញ្ចឹមឱ្យរាងកាយ។ ក៏ប៉ុន្តែប្រសិនជាធ្វើបន្ថែមទឹក អាចញុំាបានចន្លោះពី 250ml ទៅ 350ml បាន។
៣. ទឹកក្រូចច្របាច់៖ ទឹកក្រូចច្របាច់ជាប្រភពដ៏ល្អឥតខ្ចោះនៃសារជាតិវីតាមីន C ហើយចំពោះសារជាតិចិញ្ចឹម១នេះ វានឹងផ្តល់ឱ្យសារពាង្គរបស់យើងបានល្អបំផុត នៅក្នុងអំឡុងពេលព្រឹក។ ស្រដៀងគ្នាទៅនឹងទឹកDetoxផងដែរ ទឹកក្រូចច្របាច់ ត្រូវបានគេណែនាំឱ្យញុំាក្រោយអាហារពេលព្រឹកចន្លោះពី ១ម៉ោងទៅ២ម៉ោង ឬអាចញុំានៅចន្លោះម៉ោង ៩ទៅ១០ព្រឹក និងអាចញុំានាក្នុងអំឡុងពេលថ្ងៃ បន្ទាប់ពីអាហារថ្ងៃត្រង់១ម៉ោងទៅ២ម៉ោងបានដូចគ្នា។ ចំណែកឯបរិមាណដែលត្រូវបានគេណែនាំថាល្អបំផុតសម្រាប់ញុំាជាប្រចាំថ្ងៃវិញ គឺញុំាត្រឹម 240ml ឬ 8អោន ក្នុង១ថ្ងៃ។