តម្រងនោមជាសរីរាង្គមួយដែលមានតួនាទីក្នុងការច្រោះកាកសំណល់ ជួយរក្សាលំនឹងសម្ពាធឈាម រក្សាជាតិទឹកក្នុងរាងកាយ និងផលិតទឹកនោមបញ្ចេញជាតិពុលឱ្យអ្នកមានសុខភាពល្អផងដែរ។ ពេលតម្រងនោមខូច អ្នកនឹងចំណាយលុយច្រើន និងរស់នៅវេទនាទាំងឈឺចាប់។ ដើម្បីសុខភាពតម្រងនោម កុំឱ្យអ្នកលាងឈាមទាំងក្មេងនោះ សូមអ្នកជ្រើសរើសរបបអាហារល្អៗ ដូចជា៖
១. អ្នកចូលចិត្តញ៉ាំម្ទេសប្លោកក្រហមពិតជាល្អដល់សុខភាពតម្រងនោមណាស់។ ព្រោះវាមានជាតិប៉ូតាស្យូមទាប និងសម្បូរទៅដោយជាតិវីតាមីន C, B6 និង A ដែលល្អខ្លាំងសម្រាប់តម្រងនោមរបស់អ្នក។
២. សម្រាប់អ្នកញ៉ាំខ្ទឹមស និងខ្ទឹមបារាំង ជួយតម្រងនោមរបស់អ្នកបញ្ចេញជាតិពុលបានល្អ។ ហើយវាជាជម្រើសដ៏ល្អជួយផ្ដល់រសជាតិអាហារឆ្ងាញ់លាយជាមួយបន្លែផ្សេងទៀត និងជួយប្រឆាំងការរលាកតម្រងនោមផងដែរ។
៣. ការញ៉ាំត្រីសម្បូរខ្លាញ់ដូចជាត្រីសាល់ម៉ុនជាដើម វាសម្បូរទៅដោយអាស៊ីតខ្លាញ់ Omega-3 ជួយកាត់បន្ថយការរលាក និងការពារជំងឺតម្រងនោមចេញពីការលាងឈាមទាំងក្មេងផងដែរ។
៤. ការញ៉ាំស៊ុតមួយថ្ងៃពីរ ឬបីគ្រាប់ជាជម្រើសល្អសម្រាប់អ្នកមានជំងឺតម្រងនោម។ សម្រាប់អ្នកជំងឺតម្រងនោមកំពុងព្យាបាលដោយលាងឈាម ស៊ុតពណ៌សជាប្រភពប្រូតេអ៊ីនដ៏ល្អ និងមានផូស្វ័រតិចផងដែរ។
៥. ការហូបបន្លែស្លឹកបៃតងពិតជួយតម្រងនោមបានល្អ។ ព្រោះវាមានសារធាតុ folate, វីតាមីន C, វីតាមីន k, ជាតិសសៃ និងសារធាតុ phytonutrients ដែលមានប្រសិទ្ធិភាពជួយកាត់បន្ថយសម្ពាធឈាម, គ្រប់គ្រងជាតិស្ករក្នុងឈាម, បន្សាបជាតិពុល និងថែតម្រងនោមឱ្យមានសុខភាពល្អថែមទៀត។
៦. អ្នកហូបផ្លែប៉ោមមានប៉ូតាស្យូម ផូស្វ័រ និងសូដ្យូមទាបធ្វើឱ្យវាក្លាយជាជម្រើសដ៏ល្អសម្រាប់របបអាហារសម្រាប់តម្រងនោម។ វាមានសុវត្ថិភាពក្នុងការបរិភោគសម្រាប់អ្នកជំងឺតម្រងនោម និងការព្យាបាលឱ្យប្រសើរឡើងដូចជាជំងឺតម្រងនោមរ៉ាំរ៉ៃ/ការប្តូរសរីរាង្គ ការលាងឈាម និងគ្រួសក្នុងតម្រងនោមជាដើម៕ អត្ថបទដោយ៖ ទ្រ សុភាព