អ្នកលើសធាត់ ឬលើសគីឡូនោះ ការតមអាហារជារឿងចាំបាច់ណាស់។ ព្រោះការតមអាហារជួយឱ្យរាងកាយយើងស្រូបជាតិខ្លាញ់ប្រើជាថាមពល។ ទោះបីមុនដំបូងអ្នករាងអស់កម្លាំងបន្តិចមែន អ្នកត្រូវតស៊ូដើម្បីអនាគតសុខភាព។ បើអ្នកតមអាហារពេលល្ងាច ហើយអ្នកគួរតែហូបផ្លែឈើ៣នេះ កុំឱ្យអ្នកឃ្លានហើយជួយកម្ចាត់ជាតិខ្លាញ់ផងដែរ។
១. ផ្លែល្ហុង៖ គុណប្រយោជន៍ដ៏អស្ចារ្យនៃផ្លែល្ហុងគឺ សម្បូរទៅដោយសារធាតុប្រឆាំងអុកស៊ីតកម្ម និងអង់ស៊ីមពិសេសម្យ៉ាងហៅថា Papain ដែលអាចសម្លាប់កោសិកាដែលងាប់ៗនៅលើស្បែក ជម្រុះកោសិកាចាស់ៗ និងជួយព្យាបាលភាពមិនស្អាតនៃស្បែក។ បន្ថែមពីនេះ ការញ៉ាំផ្លែល្ហុងទុំនៅពេលល្ងាច គឺអាចជួយសម្រួលដល់ប្រព័ន្ធរំលាយអាហារឱ្យលោកអ្នកបត់ជើងស្រួល ពីព្រោះសាច់ល្ហុងគឺសម្បូរទៅដោយសារជាតិកាកសរសៃល្អ ជួយជំរុញការបន្ទរបង់។
២. ផ្លែស្រកានាគ៖ ស្រកានាគ វាជាផ្លែឈើដែលសម្បូរដោយវីតាមីន Cក្នុងការជួយផ្ដល់ភ្លឺស្រស់ថ្លា និង ផ្ដល់សំណើមដល់ស្បែក។ លើសពីនេះ វាមានកាល់ឡូរីតិចដែលមិនបណ្ដាលឱ្យលោកអ្នកឡើងគីឡូឡើយ ហើយថែមទាំងជាប្រភព កាកសរសៃដ៏អស្ចារ្យក្នុងការជួយសម្រួលការទល់លាមកផងដែរ។ យោងតាមគេហទំព័រ Everyday Health។
៣. .ផ្លែប៉ោមខៀវ ឬប៉ោមក្រហម៖ ផ្លែឈើនេះល្អណាស់បើអ្នកហូបពេល្ងាច មុនចូលគេងរយៈពេល២ទៅ៣ម៉ោង ដើម្បីឱ្យប្រព័ន្ធរំលាយអាហារដំណើរការស្រួលក្នុងការកម្ចាត់ជាតិខ្លាញ់។ ហើយផ្លែប៉ោមនេះសម្បូរសារធាតុចិញ្ចឹមជាច្រើនជួយដល់សុខភាពឆ្អឹង សន្លាក់ និងជួយដល់សុខភាពបេះដូង។ បន្ថែមពីនេះ ផ្លែប៉ោមមានកាឡូរីទាប មានជាតិខ្លាញ់ល្អ ជួយសម្រួលការរំលាយអាហារបានល្អ ហើយលើសពីនេះ វាក៏ជួយដុតរំលាយជាតិខ្លាញ់ពីរាងកាយផងដែរ។
ដូចនេះ ផ្លែឈើទាំង៣នេះ អ្នកអាចរកទិញបានយ៉ាងងាយស្រួលលើទីផ្សារ។ ព្រោះវាជួយកម្ចាត់ខ្លាញ់ពេលយប់ផងដែរ បើអ្នកហូបវាពេល្ងាចនោះ។ មុខងារម្យ៉ាងរបស់ផ្លែឈើទាំងបីនេះ ជួយសម្រកជាតិខ្លាញ់ពីរាងកាយរបស់អ្នក។ វាជួយកាត់បន្ថយអារម្មណ៍កុំឱ្យឃ្លានបានល្អទៀត៕អត្ថបទដោយ៖ ទ្រ សុភាព