មនុស្សយើងមិនតិចទេដែលរស់នៅព្រោះតែសំឡេងអ្នកដទៃ គំនិតអ្នកដទៃ និងតាមសង្គមជាអ្នកកំណត់ឱ្យជីវិតពួកគេ។ បើអ្នកគ្មានគោលជំហានលើខ្លួនឯងទេ អ្នកនឹងរស់នៅក្នុងជីវិតរបស់អ្នកដទៃដោយមានការឈឺចាប់បំផុត។ នេះជាផលអវិជ្ជមាន ៣យ៉ាងធ្វើឱ្យប៉ះពាល់បាត់បង់ជាខ្លួនឯង។

១.បាត់បង់ក្ដីស្រមៃរបស់ខ្លួន៖ មនុស្សមិនតិចទេដែលត្រូវបានគេរិះគុណ វាយតម្លៃនៅពេលមិនទាន់សម្រេចលទ្ធផលជាដុំកំភួន តែគេនៅតែទទួលបានជោគជ័យក្នុងជីវិត ឫក្ដីស្រមៃរបស់គេ ដោយសារការតាំងជំហរ ខ្លួនឯងជាប់ មានគោលការណ៍ជីវិតច្បាស់លាស់ មិនបណ្ដោយឱ្យឥទ្ធិពលនៃគំនិតអវិជ្ជមានក្នុងសង្គម មកគ្រប់គ្រងបាន។ ប៉ុន្តែក៏មានមនុស្សក្នុងសង្គមមិនតិចដែរ ដែលធ្លាប់បាត់បង់អ្វីដែលជារបស់ខ្លួនដូចជាគោលដៅនិងក្ដីស្រមៃជាដើម ដោយសារការរង់ឥទ្ធិពលមិនល្អ តាមបែបអគតិ ពីមជ្ឈដ្ឋានជុំវិញ។ហេតុនេះអ្នកបង្កើតការពិចារណាឱ្យបានស៊ីជម្រៅថា ពាក្យសម្ដីណាឫគតិណាគួរយកមកគិតដើម្បីឱ្យខ្លួនរីកចម្រើន ឯសំលេងឥតប្រយោជន៍បែបណាគួរបោះចោល និងបម្លែងជាកម្លាំងចិត្ត។

២. ស្តាប់សំឡេងអ្នកដទៃ៖ តាមសៀវភៅ លំហូរចិត្ត បានចុះផ្សាយថា បើអ្នកស្តាប់សំឡេងអ្នកដទៃច្រើនជាងបេះដូងរបស់ខ្លួន។ បន្ទាប់មកអ្នកអាចសម្រេចចិត្តយកអាជីពក្នុងជីវិតដោយពឹងផ្អែកទៅលើមិត្តភក្តិ បងប្អូន និងឪពុកម្តាយប្រាប់អ្នកឱ្យធ្វើវា ទោះបីអាជីពនោះអាចរកចំណូលបានច្រើនហើយធ្វើឱ្យឪពុកម្តាយរបស់អ្នកសប្បាយក៏ដោយ តែវាមិនមែនជាខ្លួនអ្នកហើយថ្ងៃណាមួយជីវិតរបស់អ្នកនឹងរស់នៅក្នុងការខកចិត្ត ការឈឺចាប់ និងបាក់ទឹកចិត្តដោយមិនដឹងពីប្រភពរបស់វាកើតមកពីណា? ព្រោះអ្វី? មកពីខ្លួនអ្នកនិងបេះដូងរបស់អ្នកបានកាត់ផ្តាច់ទំនាក់ទំនងចេញពីគ្នា។ អ៊ីចឹងហើយបានលោក Marshall Goldsmith  បានលើកឡើងថា “បើអ្នកអាចបញ្ឈប់ការស្តាប់សំឡេងនិងការគិតរបស់អ្នកដទៃមកលើបេះដូងខ្លួនឯងនោះ អ្នកនឹងមើលឃើញឱកាសដ៏អស្ចារ្យក្នុងការផ្លាស់ប្តូរជីវិតហើយអ្នកអាចបង្ហាញពីតម្លៃលក្ខណៈខ្លួនឯងដល់ពិភពលោក”។

៣. ៤.លែងខ្វល់ខ្វាយពីខ្លួនឯង៖ កុំថាឡើយតែលែងខ្វល់ពីអ្នកដទៃសូម្បី តែខ្លួនឯងក៏មិនសូវរវីរវល់ដែរ។ស្រួលមិនស្រួល អ្នកអាចកើតជំងឺបាក់ទឹកចិត្ត អស់ទំនុកចិត្តលើខ្លួនឯងទៀតផង បើអ្នកបន្តការស្រមើស្រមៃលើការវាយប្រហារ តាមពាក្យសម្ដីរបស់ មនុស្សគិតអវិជ្ជមានទាំងនោះ។បើអ្នកគិតថាខ្លួនឯងពិតជាដូចគេនិយាយមែន ត្រូវទៅស្វែងរកវិធីលើកទឹកចិត្តខ្លួនឯង រកចំណេះជំនាញដែលគេថាយើងគ្មានក្នុងខ្លួននោះមកបំពេញ។កុំផ្ដេកផ្តួលតាមពាក្យគេថា តាំងស្មារតីឱ្យរឹងមាំ ហើយឆ្ពោះទៅរកចំណុចដែលអ្នកចង់ទៅនោះ ដោយភាពក្លាហាន មិនងាករេ មិនអស់សង្ឃឹម ហើយការរស៊ូទាំងនោះនឹងបង្ហាញលទ្ធផលឱ្យគេបានឃើញដោយខ្លួនឯង។ដល់ពេលនោះអ្នកមិនត្រឹមតែអាច បញ្ឈប់ការវាយតម្លៃពីអ្នកដទៃទេ សូម្បីអ្នកខ្លួនឯងក៏មានមោទនភាពចំពោះខ្លួនឯងដែរ ពិសេសអាចរក្សាភាពជាខ្លួនឯងបានទៀតផង៕ អត្ថបទដោយ៖ ទ្រ សុភាព