អ្នកងាយមានបញ្ហាផ្លូវអារម្មណ៍ព្រោះតែធ្វើខ្លួនទៅប្រៀបធៀបជាមួយអ្នកដទៃថា គេល្អជាងខ្លួនឯង គេមានសមត្ថភាពពូកែជាង និងគេមានគ្រួសារល្អជាងខ្លួន... អារម្មណ៍បែបនេះធ្វើឱ្យអ្នករងទុក្ខឈឺបំផុត។ បើអ្នកចេះពេញចិត្តខ្លួនឯង រស់ជាខ្លួនឯង និងរស់ក្នុងការគិតរបស់ខ្លួនឯង ទើបផ្លូវចិត្តរបស់អ្នកមានក្តីសុខ។ តាមលោក Dale Carnegie ជាអ្នកចិត្តសាស្រ្តបានលើកឡើងថា ការរស់នៅក្នុងមួយថ្ងៃមិនមែនជារឿងពិបាកខ្លាំងទេ។ មកពីខ្ញុំរៀនបំភ្លេចអតីត និងការព្រួយបារម្ភពីអនាគតអស់។ ខ្ញុំគ្រាន់តែនិយាយមកកាន់បេះដូងខ្លួនឯងថា ពេលព្រឹកនេះ ជាថ្ងៃថ្មីដែលមានតម្លៃជីវិតរបស់ខ្ញុំ”។ មាន ៣ចំណុចឱ្យអ្នករស់នៅសប្បាយដោយគ្មានទុក្ខកង្វាល់អ្វីសោះ៖
១. រត់គេចពីការពិត អ្នកកាន់តែឈឺចាប់ទ្វេដង៖ មានសំណួរមួយថា ពេលអ្នកគេចវេសគ្មានទំនួលខុសត្រូវ តើអ្នកមានអារម្មណ៍រីករាយទេ? ចម្លើយនេះ អ្នកអាចឆ្លើយច្បាស់ជាងខ្ញុំទៅទៀត។ តាមលោក Dale Carnegie បាននិយាយថា ចូរទទួលស្គាល់ការពិត និងចេះថែរក្សាខ្លូនឱ្យបានល្អ ផ្លូវចិត្តអ្នកនឹងរីករាយ។ ប្រសិនបើបញ្ហាណាដោះស្រាយមិនបានទេ សូមប្រាប់ខ្លួនថា វាត្រូវតែចឹងឯង ឬតាមដំណើររបស់វាចុះ”។ ពេលអ្នកមានទំនួលខុសត្រូវ រួចហើយចុះដៃព្យាយាមដោះស្រាយបញ្ហាអស់ពីលទ្ធភាព ទោះបីបរាជ័យ ក៏អ្នកស្ងប់ចិត្តដែរ។
២. បុគ្គលមានក្តីសុខ គេចេះរស់ក្នុងថ្ងៃនេះអស់ពីអស់ចិត្ត៖ មានពាក្យមួយបាននិយាយថា “អ្នកមិនបាច់គិតបារម្ភអំពីថ្ងៃស្អែកទេ ព្រោះថ្ងៃស្អែកកើតឡើងដោយខ្លួនឯងហើយ។ សំខាន់អ្នកត្រូវចេះរស់នៅក្នុងថ្ងៃនេះឱ្យបានល្អបំផុតទៅបាហើយ ថ្ងៃស្អែកអ្នកគ្មានរឿងអាក្រក់អ្វីទេ។ អ្នកចាំបាច់យករឿងថ្ងៃស្អែក មកដាក់បន្ទុកនៅថ្ងៃនេះបន្ថែមទៀតធ្វើអី”។ សម្តីនេះនៅពេលព្រះយេស៊ូ និយាយទៅកាន់មនុស្សឈឺចិត្ត និងរស់នៅវេទនាព្រោះតែគិតពីអនាគតដោយមិនខំប្រឹងប្រែងធ្វើការងារធ្វើកិច្ចការ ឬរីករាយក្នុងថ្ងៃនេះឱ្យអស់់ពីសមត្ថភាពនេះ។
៣. រវល់នឹងការងារច្រើន អ្នកគ្មានពេលអង្គុយកើតទុក្ខនោះទេ៖ មានអ្នកខ្លះ អង្គុយកើតទុក្ខព្រោះបញ្ហាស្នេហ៍ បញ្ហាការងារ បញ្ហាការសិក្សា និងបញ្ហាប្តីប្រពន្ធ... ហើយធ្វើឱ្យគេអង្គុយពិបាកមិនព្រមធ្វើសកម្មភាពអ្វីសោះ វាធ្វើឱ្យខួរក្បាលគេគិតបញ្ហាកាន់តែច្រើនឡើង។ តាមលោក John Cowper Powys ជានិពន្ធសៀវភៅផ្នែកចិត្តសាស្រ្តបានលើកឡើងថា ពេលអ្នកធ្លាក់ក្នុងអន្លង់ទុក្ខ និងការឈឺចាប់ មានរបស់មួយជួយឱ្យរម្ងាប់ប្រព័ន្ធប្រសាទរបស់អ្នកឱ្យស្ងប់ គឺការផ្តោតអារម្មណ៍លើការងារយ៉ាងជក់ចិត្តបំផុតដោយគ្មានពេលទំនេរ”។ ហើយយើងនឹងភ្លេចបញ្ហាទាំងអស់នោះ៕ អត្ថបទដោយ៖ ទ្រ សុភាព
អ្នកអាចតាមដានផេកថ្មី គឺផេកកម្មវិធី លំហូរចិត្ត
អ្នកអាចទិញសៀវភៅ លំហូរចិត្ត តាមនេះ https://t.me/BusinessCambodiaBook