ទម្លាប់សំខាន់ណាស់ អ្នកមានជំងឺក៏ព្រោះតែមានទម្លាប់ញ៉ាំប្រៃ ញ៉ាំផ្អែម និងញ៉ាំខ្លាញ់ច្រើននេះឯង។ និយាយទៅ ជនជាតិជប៉ុនមានចិត្តតស៊ូ និងសុខភាពល្អ មិនមែនជារឿងចៃដន្យទេ គេមានទម្លាប់ល្អតាំងពីដូនតាមកម្ល៉េះ។ ៤ទម្លាប់នាំជប៉ុនមានសុខភាព និងចិត្តតស៊ូខ្លាំង៖

១. អាហារសុខភាព៖ បើយោងតាម Indiatimes បានឱ្យដឹងថា អត្រាស្លាប់របស់ជនជាតិជប៉ុនដោយសារជំងឺបេះដូង ជំងឺមហារីក និងជំងឺទឹកនោមផ្អែមមានកម្រិតទាបណាស់ នេះក៏ព្រោះតែជនជាតិជប៉ុនមានទម្លាប់ញុំាត្រី សណ្ដែកសៀង និងតែបៃតងគ្មានជាតិស្ករ។ គួរបញ្ជាក់ថា ពួកគេទទួលទានប្រភេទសាច់ក្រហមដូចជា សាច់គោ សាច់ជ្រូក ក្នុងកម្រិតទាបណាស់។ នេះជាមូលហេតុជនជាតិជប៉ុនមានសុខភាពរឹងមាំព្រោះតែមានអាហារល្អៗ។ បើអ្នកគ្មានសុខភាពល្អ មួយថ្ងៃឈឺព្រឹកល្ងាចនោះ អ្នកច្បាស់ជាគ្មានកម្លាំង និងចិត្តតស៊ូក៏គ្មានដែរ។ ការថែសុខភាព រស់នៅគ្មានជំងឺសំខាន់ណាស់ ដើម្បីឱ្យចិត្តតស៊ូនឹងការលំបាក ឱ្យសម្រេចក្តីស្រមៃ។

២. នៅតែសកម្មជានិច្ច៖ អាថ៌កំបាំងមួយនៃជីវិតដ៏វែង និងមានសុខភាពល្អរបស់ជនជាតិជប៉ុន គឺការរក្សាភាពសកម្ម។ នេះមិនមែនមានន័យថា អ្នកត្រូវតែជាកីឡាករអាជីពនោះទេ តែវាមានន័យថា អ្នករកអ្វីដើម្បីធ្វើឱ្យខ្លួនមានចលនាសកម្មជាប្រចាំថ្ងៃក្នុងការងារណាមួយក្នុងជីវិត។ សូម្បីតែការដើររយៈពេលខ្លីជារៀងរាល់ថ្ងៃក៏អាចធ្វើឱ្យអារម្មណ៍របស់អ្នកមានការផ្លាស់ប្តូរយ៉ាងខ្លាំងដែរ។ ទម្លាប់តូចៗ បែបនេះ ក៏ធ្វើឱ្យជនជាតិជប៉ុនមានចិត្តអំណត់ដើម្បីធ្វើវាជាប្រចាំថ្ងៃដែរ។ ពេលគេធ្វើវាជាប្រចាំថ្ងៃវាក្លាយជាធម្មតា។ ពេលអ្នកមានចិត្តតស៊ូដូចជាជប៉ុន កិច្ចការលំបាកៗ អ្នកនឹងខំធ្វើវាឱ្យងាយស្រួលមិនខានឡើយ។  

៣. ធ្វើដំណើរយឺតៗ តែច្បាស់លាស់៖ ការធ្វើសកម្មភាពឱ្យយឺតៗ មិនថាអ្នករកស៊ី ធ្វើការនិងកិច្ចការអ្វីនោះទេ ការធ្វើតាមលំហូរអារម្មណ៍ជួយបង្កើតគុណភាពនៃជីវិត រីករាយនឹងដំណើរជីវិតទៅរកក្តីគោលដៅ។ បើអ្នកប្រញាប់ប្រញាល់ ជាការផ្ទុយសកម្មក្នុងជីវិតហើយ។ ដូចពាក្យចាស់ពោលថា "ដើរយឺតៗ ហើយអ្នកនឹងដើរបានឆ្ងាយ”។ នៅពេលយើងទុកភាពបន្ទាន់ចោលមួយឡែកក្នុងជីវិតសិន ពេលវេលានឹងបង្កើតអត្ថន័យថ្មីដល់អ្នក។ ពេលអ្នកមានអារម្មណ៍ថា ខ្លួនខំធ្វើកិច្ចហ្នឹងមានប្រយោជន៍ អ្នកនឹងកើតចិត្តស៊ូចេញមក ដើម្បីធ្វើកិច្ចការហ្នឹងមានលទ្ធផលមិនខានទេ។

៤. ដើរលើផ្លូវការអភិវឌ្ឍខ្លួនជាបន្តបន្ទាប់៖ ជនសាំមូរ៉ៃជាអ្នកមានគំនិតជឿលឿនក្នុងការអភិវឌ្ឍខ្លួនឥតឈប់ឈរនោះទេ។ ពួកគេបានឧទ្ទិសខ្លួនពួកគេចំពោះភាពស្ទាត់ជំនាញ ហើយព្យាយាមកែច្នៃអត្តចរិករបស់ពួកគេពេញមួយជីវិតតែម្តងដោយមានចិត្តតស៊ូខ្លាំងបំផុត ព្រោះតែគេមានបុព្វហេតុក្នុងជីវិត។ ការទទួលយកផ្នត់គំនិតនៃការរៀនបន្តនិងការរីកចម្រើនអាចជួយពួកគេឈានដល់សក្តានុពលពេញលេញនិងជម្នះឧបសគ្គបានគ្រប់យ៉ាងងាយស្រួលផងដែរ៕ អត្ថបទដោយ៖ ទ្រ សុភាព

អ្នកអាចតាមដានផេកថ្មី គឺផេកកម្មវិធី លំហូរចិត្ត 

អ្នកអាចទិញសៀវភៅ លំហូរចិត្ត តាមនេះ https://t.me/BusinessCambodiaBook