១.ពួកគេញ៉ាំបន្លែច្រើន៖ ជាប្រពៃណីជនជាតិជប៉ុនការបរិភោគអង្ករ បន្លែ និងត្រីច្រើនជារឿងសំខាន់សម្រាប់សុខភាព។ ជាពិសេសប្រជាជនជប៉ុនចូលចិត្តហូបសណ្តែកសៀង និងសារ៉ាយសមុទ្រព្រោះវាមានជាតិ fermented ធ្វើឱ្យពួកគេមិនខ្វះវីតាមីន មានសារធាតុរ៉ែ និងសារធាតុគីមី phyto-chemical មានអត្ថប្រយោជន៍ជួយការពារជំងឺមហារីក និងលើសឈាមផង។

២. មានរបៀបចម្អិនម្ហូបខុសគ្នា៖ អាហារជប៉ុនមានច្រើនបែបចម្អិន មានចំហុយ ឆាខ្ទះ ស្ងោរ កូរ ចៀន និងចម្អិនរាងយូរ... ពួកគេមានទម្លាប់ធ្វើស៊ុបយ៉ាងហោចណាស់មួយចានដែរ។ វាជាធម្មតាពួកគេរៀបចំចានតូចៗ ពេលហូបអាហាររួមមានបន្លែ ត្រី សណ្តែក និងអង្ករ។ ការហូបរបៀបនេះនាំឱ្យអារម្មណ៍ស្រួលសុខភាពល្អ។

៣. ញៀនផឹកតែច្រើនជាងកាហ្វេ៖ ជប៉ុនមានវប្បធម៌ផឹកតែបៃតងនៅប្រទេសជប៉ុនជាទម្លាប់ប្រចាំជីវិត វាមានគុណភាពល្អមានផ្ទុកសារធាតុប្រឆាំងអុកស៊ីតកម្មច្រើនជាងកាហ្វេ។ តែបៃតងជប៉ុន និង Matcha វាជួយបង្កើនសារធាតុក្លរ៉ូហ្វីល និងសារធាតុប្រឆាំងអុកស៊ីតកម្មជួយពង្រឹងសុខភាពប្រឆាំងនឹងជំងឺច្រើន។​

៤. ហូបសាបៗ តែមានជាតិ៖ ជនជាតិជប៉ុនហូបអាហារមិនប្រៃហើយគ្មានខ្លាញ់ទេ។ ព្រោះអាហារទាំងនេះមានសារជាតិក្នុងអាហាររួចហើយ មានសារ៉ាយសមុទ្រ , ត្រីសម្បូរអូមេហ្គា អង្ករ គ្រាប់ធញ្ញជាតិ តៅហ៊ូ សណ្តែកសៀង មីសួ...។ ពួកគេចូលចិត្តអាហារមានជាតិស្ករតិចហើយមានផ្ទុកទៅដោយវីតាមីន និងសារធាតុរ៉ែ។

៥. កៃហ្សិន (Kaizen) ៖ មានន័យថា ការពង្រឹងសមត្ថភាពជាប្រចាំ។ វាជាគោលការណ៍ស្នូលនៅក្នុងវប្បធម៌ជប៉ុនដែលវាមានការពាក់ព័ន្ធនឹងការធ្វើឱ្យមានការផ្លាស់ប្ដូរបន្តិចម្ដងៗ នៅក្នុងជីវិតរបស់មនុស្សម្នាក់ដើម្បីពង្រឹងការរស់នៅឱ្យមានសុខភាពល្អ។ គំនិតកៃហ្សិនមិនផ្ដោតលើការផ្លាស់ប្ដូរធំៗ ប៉ុន្តែវាជាការផ្លាស់ប្ដូរតូចៗ ជារៀងរាល់ថ្ងៃដើម្បីបង្កើតសមត្ថភាពឱ្យមានលទ្ធផលធំរយៈពេលវែង។

៦. ហ្គាម៉ាន (Gaman)៖ មានអត្ថន័យឱ្យអ្នកចេះអត់ធ្មត់ ចេះតស៊ូ និងបន្តការស៊ូទ្រាំរាល់ការលំបាក។ វាជាគោលគំនិតចម្បងមួយក្នុងវប្បធម៌ជប៉ុនពង្រឹងផ្លូវចិត្តឱ្យរស់នៅមានក្តីសុខក្នុងបញ្ហា។ គំនិតមួយនេះវាជួយជម្រុញមនុស្សចេះស៊ូទ្រាំនឹងស្ថានភាពលំបាកដោយសេចក្ដីថ្លៃថ្នូរ មានភាពស្មោះត្រង់ និងគ្មានការត្អូញត្អែរនោះទេ។ ការបណ្ដុះភាពអត់ធ្មត់ក្នុងការងារ និងជីវិតជាប្រចាំ នាំឱ្យអ្នកទៅរកសុខភាពរាងកាយកាន់តែរឹងមាំ និងបង្កើនការស្ររឡាញ់ខ្លួនឯងផងដែរ៕ អត្ថបទដោយ៖ ទ្រ សុភាព