ពេលអ្នកមានអារម្មណ៍ថា ខ្លួនដឹងអ្វីមួយ ចិត្តរបស់យើងបិទទ្វារទៅរកចំណេះដឹងភ្លាម ហើយធ្វើឱ្យទស្សនៈតូចចង្អៀត។ ដំណើរជីវិតជាក់ស្តែងលើការងារ និងការរកស៊ី ធ្វើឱ្យពួកគេខ្វះគំនិតច្នៃប្រឌិត និងចិត្តគំនិតចុះខ្សោយ អនាគតក៏ងងឹតតាមហ្នឹងដែរ។ បើអ្នកចាត់ទុកថា ខ្លួនអ្នកជាសិស្សពេញមួយជីវិត មាគ៌ានៃជីវិតរបស់អ្នកធ្វើអ្វីក៏រីកចម្រើនមានអនាគតល្អដែរ។ ធ្វើការងារក៏មានលទ្ធផលពីស្នាដៃ។ ពេលអ្នករកស៊ីវិញ ចិត្តក៏ខ្លាំង គំនិតក៏ពូកែច្នៃប្រឌិត ហើយចំណូលក៏កើនដែរ។ នេះជាការដាក់ខ្លួនរៀនសូត្របណ្តុះសមត្ថភាព មានអនាគតរីកចម្រើន។

តាមលោកតា Charlie Munger ជាអនុប្រធានក្រុមហ៊ុន Berkshire Hathaway ទទួលមរណៈភាពនៅក្នុងវ័យ៩៩ឆ្នាំ តែគាត់បានជាបុគ្គលម្នាក់មានសមត្ថភាពខ្លាំងអាចយកឈ្នះលំបាកៗ ក្នុងជីវិតរបស់គាត់ដោយបានបន្សល់ទុកគតិបណ្ឌិតថា នៅក្នុងជីវិតការងារនិងការរកស៊ី អ្នកនឹងជាប់គាំងពេញមួយជីវិតបើមិនធ្វើខ្លួនជាសិស្សទេនោះ។ ព្រោះអ្នកគ្មានការរៀនសូត្រក៏គ្មានការរីកចម្រើនធំដែរ។ រាល់ការរីកចម្រើនទាំងអស់ផ្តើមពីគំនិតជាមុនសិន។ មានមនុស្សភាគច្រើនមិនអាចបោះជំហានទៅបានឆ្ងាយ ពួកគេពឹងផ្អែកត្រឹមតែដឹងក្នុងជីវិតរស់ពីមួយថ្ងៃទៅមួយតែប៉ុណ្ណោះ។ ពេលអ្នកដាក់ខ្លួនធ្វើជាសិស្សពេញមួយជីវិត អ្នកនឹងចាក់ចេញពីតំបន់ដ៏តូចចង្អៀតនេះ(ភាពល្ងង់ខ្លៅ)។ ខ្ញុំដឹកនាំក្រុមហ៊ុនរីកចម្រើនមិនមែនខ្ញុំពូកែពីកំណើតទេ គឺខ្ញុំអានសៀវភៅ និងរៀនពីអ្វីៗ គ្រប់យ៉ាងជុំវិញខ្លួនរបស់ខ្ញុំ។ នេះជាគន្លឹះក្នុងការពង្រីកសមត្ថភាពឱ្យខ្លាំងជាងបញ្ហា ទើបអាជីកម្មឬមួយជីវិតយើងអាចដំណើរលូតលាស់ទៅមុខបានល្អ”។

វិធីដាក់ខ្លួនដើម្បីឈានដល់កម្រិតកំពូលគឺការធ្វើខ្លួនជាសិស្សរៀនគ្រប់ពេលវេលាដើម្បីសំលៀងខួរក្បាលឱ្យមុតស្រួច។ បើអ្នកខ្វះការរៀនសូត្រក្នុងការធ្វើដំណើរជីវិតនោះច្បាស់ជាភាពអំនួតចូលមកជំនួយការដាក់ខ្លួនហើយអ្នកអាចធ្វើរឿងខ្វាក់ភ្នែកអត់ដឹងខ្លួនផង។ កុំឱ្យមានគ្រោះថ្នាក់លើស្នាដៃ លើអាជីវកម្ម លើការងារ និងអនាគតរបស់អ្នក ចូលអ្នកធ្វើខ្លួនតាមលោក Ryan Holiday ជាសហគ្រិនឆ្នើមលើកឡើងថា “មូលហេតុក្មេងអាចរៀនសូត្រចេះបានលឿន ពួកគេធ្វើជាកូនសិស្សមិនប្រកាន់ខ្លួន ឬមិនតាំងខ្លួនជាអ្នកចេះដឹងនោះទេ។ គេធ្វើឱ្យគ្រូមានអំណាចលើខ្លួន ហើយគេមិនដែលគិតថា ខ្លួនចេះជាងគ្រូឬមិនហ៊ានគិតថែមទៀត។ បន្ទាប់មកគ្រូនឹងបង្ហាញថ្វីដៃឱ្យសិស្សរីកចម្រើន។ ប៉ុន្តែបើអ្នកមិនធ្វើតាមរបៀបនេះទេ គ្រូក៏មិនទុកអ្នកបន្តទៀតដែរ”។

ចូរធ្វើជាសិស្សដាក់ខ្លួនដាក់កាយមិនខ្វះគ្រូ គ្រូនឹងផ្តល់ចំណេះដឹងឱ្យរៀនសូត្រកើតបញ្ញាជាមិនខានទេ។ ពេលអ្នកបន្តរៀនសូត្ររបៀបនេះ អ្នកផ្លាស់ប្តូរពីសិស្សទៅជាអ្នកអនុវត្ត ដុះអនាគតកាន់ភ្លឺស្វាងខ្លាំងសែរ។ តាមលោក Robert Greene បានលើកឡើងថា “គន្លឹះបង្កើតបញ្ញាកម្រិតខ្ពស់ អ្នកត្រូវធ្វើជាកូនសិស្សដែលមានគុណភាព។ មិនមែនត្រឹមតែស្រូបចំណេះដឹងនិងព័ត៌មានចូលពេញខួរនោះទេ អ្នកត្រូវរៀបចំវាឱ្យធ្លាក់ចូលក្នុងបេះដូងដោយធ្វើការស្វែងយល់និងបទពិសោធន៍ដោយខ្លួនឯងនៅក្នុងវិធីមួយចំនួនរបស់អ្នក ដើម្បីយកចំណេះដឹងទាំងនេះមកប្រើភាពជាក់ស្តែងឱ្យមានប្រសិទ្ធភាព”។

នៅក្នុងស្ថានភាពរបស់អ្នកប្រាប់អំពីអំណាចចំណេះដឹងនិងគំនិតអ្នកគិតបែបណា។ ដូចនេះហើយអ្នកត្រូវធ្វើការពង្រីកការយល់ដឹងរបស់អ្នកដោយការអានសៀវភៅ សុំមតិយោបល់ និងរៀនសូត្រពីនរណាម្នាក់ ការមានទង្វើរបែបនេះសុទ្ធតែជាចំណុចចាប់ផ្តើមដ៏ល្អបំផុតក្នុងការដឹកនាំអនាគតចេញពីក្តីលំបាកទាំងឡាយ។ កុំឱ្យខ្លួនអ្នករស់នៅក្នុងពិភពអំនួតដូចជាកង្កែបក្នុងអណ្តូង។ រួចហើយអ្នកនឹងមានអារម្មណ៍ថា ការអភិវឌ្ឍសមត្ថភាពដោយការរៀនសូត្រ ធ្វើឱ្យអនាគតរបស់អ្នកកាន់តែអស្ចារ្យពីមួយថ្ងៃទៅមួយថ្ងៃផងដែរ៕ អត្ថបទដោយ៖ ទ្រ សុភាព