ផ្អែកទៅតាមការចុះផ្សាយរបស់គេហទំព័រ hindustantimes បានលើកឡើងនូវសារជាតិចិញ្ចឹមមួយចំនួនដែលល្ហុងមានសមត្ថភាពសម្រួលដល់រាងកាយរបស់អ្នកទទួលទាន៖

១. ធ្វើឱ្យដំណើរការរំលាយអាហារកាន់តែប្រសើរ

អង់ស៊ីមល្អៗដែលមាននៅក្នុងផ្លែល្ហុងដូចជា papain មានមុខងារខ្លាំងក្នុងការជួយដល់ដំណើរការរំលាយអាហារដែលបានញុំាចូលទៅ បង្កើនការរំលាយអាហារប្រូតេអ៊ីន និងកាត់បន្ថយហានិភ័យនៃការមិនរំលាយអាហារ។

២.​ បង្កើនការស្រូបយកសារធាតុចិញ្ចឹម

ការទទួលទានផ្លែល្ហុងពីរម៉ោងក្រោយអាហារត្រូវបានគេរកឃើញថា សារធាតុចិញ្ចឹមនៅក្នុងផ្លែឈើ១ប្រភេទនេះ អាចជួយស្រូប និងផ្តល់នូវសារជាតិចិញ្ចឹមផ្សេងៗផ្តល់ឱ្យរាងកាយ ដោយមិនមានប្រជែងជាមួយនឹងរបបអាហារផ្សេងទៀតដែលកំពុងដំណើរការនៅក្នុងប្រព័ន្ធរំលាយអាហារឡើយ។

៣. បន្សាបជាតិពុលធម្មជាតិ

បន្ទាប់ពីទទួលល្ហុងនៅក្រោយអាហាររយៈពេលពីរម៉ោង ប្រព័ន្ធអាហារមានបន្ទុកផ្ទុកបរិមាណអាហារតិច ដូច្នេះនៅពេលញុំារបបផ្លែល្ហុងចូលទៅសារជាតិសរសៃមានក្នុងផ្លែឈើនេះ នឹងជួយបន្សាបជាតិពុលតាមធម្មជាតិយ៉ាងមានប្រសិទ្ធភាព និងការលុបបំបាត់កាកសំណល់តោងជាប់នឹងពោះវៀនបានល្អបំផុត។

៤. កម្រិតជាតិស្ករក្នុងឈាមមានស្ថេរភាព

ការរង់ចាំរយៈពេល ២ម៉ោងបន្ទាប់ពីអាហារ ទើបញុំាផ្លែល្ហុង វាអាចបញ្ជៀសបញ្ហា១ទៀតទាក់ទិនទៅនឹងការកើនឡើងនូវកម្រិតជាតិស្ករក្នុងឈាម ដោយជួយជំរុញការគ្រប់គ្រងជាតិស្ករបានល្អប្រសើរផងដែរ។

ទាំងនេះជាផ្នែកសំខាន់ៗបន្ថែមដែលរាងកាយយើងនឹងទទួលបានបន្ទាប់ពីញុំាផ្លែល្ហុងទុំក្រោយអាហាររយៈពេល២ម៉ោង។ ដោយឡែក បើយើងនិយាយអំពីពេលវេលា និងបរិមាណដែលគួរតែញុំាផ្លែឈើ១មុខនេះ ក្នុង១ថ្ងៃវិញ ជាទូទៅផ្លែល្ហុងត្រូវបានគេណែនាំឱ្យញុំានាក្នុងអំឡុងព្រឹក និងញុំាត្រឹម៣ចំណិចតូចល្មមក៏គ្រប់គ្រាន់ផងដែរសម្រាប់រាងកាយយើងទាំងមូល៕