មានរឿងមួយធ្វើឱ្យផ្លូវចិត្តរបស់មនុស្សរឹងមាំគឺការគេង។ បើអ្នកគេងមិនគ្រប់គ្រាន់នោះទេ មានជំងឺរត់តាមអ្នកដូចជាធាត់ លើសឈាម បញ្ហាបេះដូង និងសម្រស់ចាស់ជាងវ័យផងដែរ។ ជាពិសេសអ្នកប៉ះពាល់ដល់ផ្លូវចិត្តរបស់អ្នកឱ្យចុះខ្សោយមួយកម្រិតទៀត។ បើអ្នកបញ្ហារឿងគេងមិនលក់នោះ ចូរអ្នកប្រើ ៥វិធីនេះដើម្បីគេងលក់ស្រួល៖
១. ទឹកដោះគោ៖ ពិសាទឹកដោះគោក្តៅឧណ្ហៗ១កែវ ឬទទួលទានចេក០១ផ្លែ ក៏អាចជួយឱ្យគេងលក់បានដែរ។ ជៀសវាងភេសជ្ជៈជំរុញខួរក្បាលដូចជា តែ កាហ្វេ ទឹកក្រូចហ្គាស ភេសជ្ជៈប៉ូវ ឬស្រា ស្រាបៀរ ឬស្រាផ្លែឈើរាល់ថ្ងៃ ព្រោះមានសារធាតុគីមី ដែលជំរុញឱ្យខួរក្បាលគេងមិនលក់ ឬគេងមិនស្កប់។
២.រៀបចំបន្ទប់គេងបានល្អ៖ បន្ទប់គេងរបស់អ្នកជាកន្លែងសម្រាកដើម្បីយកកម្លាំងថាមពលរាងកាយ និងអារម្មណ៍រីករាយ។ បើអ្នកបានរៀបចំបន្ទប់ស្អាត អ្នកកុំឱ្យបន្ទប់គេងរបស់អ្នកដូចជាកន្លែងមើលទូរទស្សន៍ ឬកន្លែងធ្វើការ។ ជាពិសេសអ្នកគួរដកគ្រឿងអេឡិចត្រូនិចដូចជាកុំព្យូទ័រ ទូរទស្សន៍ ទូរស័ព្ទ ចេញពីបន្ទប់គេង មកពីវាអាចរំខានអ្នក។
៣. ស្ដាប់ចម្រៀងបន្ធូរអារម្មណ៍ឆាប់គេងលក់លឿន៖ អ្នកគួរជ្រើសរើសភ្លេងសុទ្ធមកស្ដាប់ ឬបទចម្រៀងសម័យដើម និងបទមួយណាធ្វើឱ្យអារម្មណ៍រីករាយមុនចូលគេង ទើបអ្នកឆាប់គេងស្រួល។ អ្នកអាចស្តាប់តាម Youtube មានបទភ្លេងច្រើន ហើយបទនីមួយៗ មានរយៈពេលយូរសមស្របជាមួយនឹងការគេងយប់យ៉ាងល្អផងដែរ។
៤. រក្សាកាលវិភាគនៃការគេងឱ្យទៀងទាត់៖ ចូលគេង និងក្រោកពីគេងក្នុងពេលនៅដដែលជារៀងរាល់ថ្ងៃ មិនថាសូម្បីតែចុងសប្តាហ៍ក៏ដោយ គឺមានប្រយោជន៍ជួយហ្វឹកហ្វាត់ខួរក្បាល និងរាងកាយឱ្យទម្លាប់ជាមួយនឹងពេលវេលា។ ការទម្លាប់បែបនេះ យូរៗទៅអាចធ្វើឱ្យយើងងងុយគេង និងភ្ញាក់ពីគេងទៀងទាត់ម៉ោង ទោះបីជាមិនមាននាឡិការោទិ៍ក៏ដោយ។
៥. កាត់បន្ថយគ្រឿងស្រវឹង និងភេសជ្ជៈមានជាតិកាហ្វេអ៊ីន៖ ការទទួលភេសជ្ជៈមានជាតិកាហ្វេអ៊ីនដូចជា ភេសជ្ជៈកំប៉ុង តែបៃតង កាហ្វេ និងគ្រឿងស្រវឹង ជិតចូលគេងវាអាចនឹងធ្វើឱ្យរំខានដល់ដំណេកដូចគ្នា៕ អត្ថបទដោយ៖ ទ្រ សុភាព