មានមនុស្សជាច្រើន មានបញ្ហានឹងការងារ និងគ្រួសារ ធ្វើឱ្យសុខភាពផ្លូវចិត្តរងសម្ពាធយ៉ាងខ្លាំង។ បើយើងស្តីបន្ទោសបញ្ហាកើតឡើង និងគេចវេសពីការទទួលខុសត្រូវ ក៏គ្មានដំណោះស្រាយដែរ។ យើងមានឆ្ងល់ទេថា ការងារតែមួយ ម្នាក់សប្បាយនឹងវា និងម្នាក់ទៀតមិនសប្បាយទៅវិញ។ នេះជាបញ្ហាធំមួយ យើងគួរដោះស្រាយដោយរបៀបណា?
អ្នកណាក៏មានបញ្ហាចំពោះការងារដែរ បញ្ហាសំខាន់នៅត្រង់ថា ផ្នត់គំនិតយើងយល់ណាចំពោះការងារកំពុងតែធ្វើនេះ។ តាមលោក Andrew Matthews ជាអ្នកនិពន្ធ និងអ្នកចិត្តសាស្រ្តបាននិយាយថា “បើផ្នត់គំនិតយើងបន្ទោសការងារជាមេរោគបង្កបញ្ហា វាមិនមែនជាដំណោះស្រាយល្អទេ ប៉ុន្តែយើងទេ ជាមេបញ្ហា ហើយខ្លួនយើងជាចំណុចចាប់ផ្តើមដោះស្រាយបញ្ហាទាំងនេះ។” បើផ្នត់គំនិតយើង ជឿថា ការងារនេះធុញទ្រាំណាស់។ វាធ្វើឱ្យយើងអស់អារម្មណ៍រលីងចំពោះការងារ និងគ្មានថាមពលក្នុងការរស់នៅ ប្រៀបបានថា ទ្រាំរស់ក្នុងផ្នូរខ្មោចចឹង។
បើយើងប្តូរផ្នត់គំនិតចេញ មុនដំបូងអ្នកត្រូវដាក់សំនួរសិនថា ការងារ និងជីវិតយើង មានអ្វីពិសេស? ហើយបន្ទាប់មកយើងជឿមុនឃើញពីលទ្ធផលថា ការងារនេះ ពិតជាអស្ចារ្យសម្រាប់ប្រើជីវិត ដើម្បីជួយអ្នកដទៃកាន់តែប្រសើរ។ ពេលយើងប្តូរគំនិត នាំឱ្យយើងចេះគិតច្នៃប្រឌិតលើលទ្ធផលបានល្អ។ ហើយរាល់ការច្នៃប្រឌិតនេះ ធ្វើឱ្យអារម្មណ៍យើងរំភើប។
លោក Andrew Matthews បានបញ្ជាក់ថា រាល់បញ្ហាមិនមែនមកពីលក្ខណៈការងារនោះទេ ប៉ុន្តែកត្តាចម្បងមកពីផ្នត់ជំនឿយើងនេះឯង។ ពេលយើងប្តូរជំនឿ ស្ថានការរបស់យើងក៏ប្រែប្រួលតាមហ្នឹងដែរ។” នេះជាការបញ្ជាក់ថា ជំនឿខ្វះការគិតរបស់យើង នាំឱ្យមើលឃើញបញ្ហាមកពីការងារ មកពីមិត្តភក្តិ និងគ្រួសារជាដើម។ ពេលយើងសួរបេះដូងខ្លួនឯង និងផ្តោតការគិតថា ការងារហ្នឹង យើងគួរច្នៃប្រឌិតបែបណា? ការគិតច្នៃប្រឌិតធ្វើឱ្យជីវិតអ្នករីករាយ៕ អត្ថបទដោយ៖ ទ្រ សុភាព