សម្រាប់វិធីទីមួយនេះគឺការធ្វើលំហាត់ប្រាណ អ្នកមិនអាចខ្វះបានទេ។ ពេលអ្នកចង់សម្រកគីឡូ គ្រាន់តែពឹងលើការញ៉ាំអាហារតែមួយមុខ អ្នកអាចស្រកគីឡូមែន តែសាច់អ្នកមិនស្អាតទេ វាធ្លាក់យារ។ អ្នកគួរឆ្លៀតពេលហាត់ប្រាណត្រឹម ៣០នាទីទៅ ១ម៉ោង អ្នកនឹងស្រកគីឡូមានរាងស្អាតមិនខានទេ។ តាមលោកគ្រូ សែត លីម បាននិយាយថា ការហាត់ប្រាណជួយដល់ប្រព័ន្ធរាងកាយ ដុតជាតិខ្លាញ់ឱ្យសម្រកគីឡូ និងកម្ចាត់ជាតិខ្លាញ់ក្នុងសរសៃឈាមយ៉ាងមានប្រសិទ្ធភាពបំផុតផងដែរ”។

ចំណែកវិធីទី២ ហាមភេសជ្ជៈលើសគីឡូ។ តាមលោកគ្រូសែត លីម ជាគ្រូបង្វឹកផ្នែកហាត់ប្រាណ ដែលមានបទពិសោធន៍ជាច្រើនឆ្នាំ បាននិយាយថា "អ្នកគួរជៀសវាងអាហារសម្បូរជាតិខ្លាញ់ និងជាតិស្ករ គ្រឿងកំប៉ុង ដែលហូបតាមអារម្មណ៍អ្នក។ ពីព្រោះអាហារប្រភេទនេះ វាបំលែងសាច់ទៅជាជាតិខ្លាញ់កាន់តែច្រើនក្នុងស្រទាប់ក្រោមស្បែក។ ហើយការសម្រកគីឡូតាមធម្មជាតិ មិនថាប្រុស ឬស្រីទេ នៅក្នុងរបបអាហារ អ្នកគួរញុំាបន្លែ ផ្លែឈើឲ្យច្រើនជាងសាច់ ព្រោះវាផ្តល់វីតាមីន ជាតិរ៉ែ សារធាតុបំប៉ន ជាតិសរសៃជំនួសកាឡូរី ដើម្បីដុតជាតិខ្លាញ់ឱ្យស្រកគីឡូ។

វិធីចុងក្រោយនោះគឺ អ្នកត្រូវតែព្យាយាមគ្រប់គ្រងបរិយាកាសជុំវិញខ្លួនអ្នកឱ្យបាន។ បើអ្នកមានកម្មវិធីជប់លៀងច្រើន អ្នកគួរតែកំណត់ការហូបអាហាររបស់អ្នកតាមចំនួនកាឡូរី ហើយព្យាយាមហាត់ប្រាណដើម្បីដុតជាតិខ្លាញ់ឡើងវិញ។ អ្នកគួរហូបអាហារសម្រន់ដែលជួយឲ្យមានសុខភាពល្អឱ្យស្រកគីឡូនៅក្នុងកម្មវិធី មានអាហារបន្លែ សាច់គ្មានជាតិខ្លាញ់ និងញ៉ាំទឹកឱ្យច្រើន។ អ្នកអាចផឹកទឹកមួយកែវធំជាមុនសិន ហើយចាំញុំាអាហារតាមក្រោយក៏បានដែរ។ ការធ្វើបែបនេះ ដើម្បីជួយការពារអ្នកឡើងគីឡូយ៉ាងមានប្រសិទ្ធភាព៕ អត្ថបទដោយ៖ ទ្រ សុភាព