តាមលោក Arnold Schwarzenegger បាននិយាយថា “បើអ្នកមិនជឿជាក់លើខ្លួនឯងទេ គឺគ្មានអ្នកណាម្នាក់មកជឿលើរូបអ្នកនោះទេ”។ បើខ្លួនអ្នកមិនជឿជាក់លើក្តីស្រមៃនេះ អ្នកនឹងគ្មានវិធីធ្វើវាឲ្យសម្រេចបានឡើយ។ អ្នកដទៃមិនជឿ វាមិនមែនជាក្តីសុបិនរបស់គេ តែវាជាក្តីសុបិនអ្នក អ្នកត្រូវតែជឿឲ្យខ្លាំងបំផុតដើម្បីធ្វើវាឲ្យចេញជាលទ្ធផល។

ពេលលោក Arnold រកឃើញក្តីសុបិនរបស់ខ្លួនចង់ក្លាយជាកីឡាកាយសម្ពន្ធលំដាប់ពិភពលោក គ្មានអ្នកណាម្នាក់ជឿលើគាត់នោះទេ មានតែខ្លួនគាត់តែម្នាក់គត់ ដែលជឿថា ខ្ញុំនឹងធ្វើឲ្យចក្ខុវិស័យរបស់ខ្លួនក្លាយជាការពិតបាន។ មនុស្សយើងចង់បានបំផុត គឺកម្លាំងចិត្តពីមនុស្សជុំវិញមកគាំទ្រ មកលើកម្លាំងចិត្តដើម្បីជំរុញខ្លួនឲ្យកាន់តែខ្លាំងឡើង ...។ សូម្បីឪពុកម្តាយរបស់គាត់ ក៏មិនគាំទ្រាំរូបគាត់ដែរ។ គ្មានអ្នកណាជឿលើគាត់ទេ មានការមើលងាយ សើចចំអកឲ្យគាត់ផងទៀត តែគាត់មិនដែលខ្វល់ពីរឿងទាំងអស់នេះ បើគាត់ព្រមចាញ់ពេលនោះ គាត់មិនអាចក្លាយជាកីឡាករលំដាប់ពិភពលោក តារាសម្ដែង ធ្វើអភិបាលក្រុងរបស់សហរដ្ឋអាមេរិច និងជាមហាសេដ្ឋីនោះទេ។

គាត់បាននិយាយថា “ខ្ញុំអាចគិតឃើញពីវា ខ្ញុំជឿលើវា ហើយខ្ញុំនឹងធ្វើវាឲ្យសម្រេច”។ ពេលអ្នកគ្មានមនុស្សណាជឿលើអ្នកទេ អ្នកកុំឲ្យវាមកបំផ្លាញ់ក្តីសុបិនរបស់អ្នក គឺអ្នកត្រូវតែជឿលើខ្លួនឯង អ្នកត្រូវកំណត់វា ហើយអ្នកត្រូវតែធ្វើវាឲ្យមានភាពអស្ចារ្យដោយដៃរបស់អ្នក។ អ្នកកើតមកមានសិទ្ធក្នុងការជ្រើសរើសក្តីស្រមៃរបស់ខ្លួន ជាអ្នកកំណត់ជីវិតដោយខ្លួនឯង ជាអ្នកទទួលខុសត្រូវក្នុងជីវិតនេះតែម្នាក់គត់។ អ្នកមិនអាចសម្រេចក្តីស្រមៃបានទេ បើអ្នកគ្មានអារម្មណ៍ជាម្ចាស់លើក្តីស្រមៃខ្លួនឯង។ អ្នកចង់សម្រេចក្តីស្រមៃ អ្នកត្រូវតែស្គាល់ពីតម្លៃពេលវេលាដើម្បីប្រើប្រាស់វា។ ក្តីស្រមៃឱ្យធំ ជីវិតអ្នកនឹងរីកធំតាមនោះដែរ៕ អត្ថបទដោយ៖ ទ្រ សុភាព