អ្នកធ្វើការអ្វីក៏ដោយ ត្រូវការគំនិតច្នៃប្រឌិតខ្ពស់ វាជាសមត្ថភាពមួយ កុំឱ្យអ្នករស់ធ្វើការដដែលងាយកើតស្រ្តេសនឹងការងារលឿន។ បើអ្នកចង់មានសមត្ថភាពច្នៃប្រឌិត អ្នកត្រូវតែមានការគិត និងទម្លាប់ល្អតាមជាប់ខ្លួន។ តាមលោក Anthony Fredericks ជាអ្នកចិត្តសាស្រ្តហើយបាននិពន្ធសៀវភៅ១០០ក្បាល ព្រោះតែលោកមានទម្លាប់ល្អទាំង ៤ខាងក្រោមនេះ ធ្វើឱ្យនិពន្ធសៀវភៅបានច្រើនបំផុត។
១. ស្វែងរកលទ្ធផល៖ អ្នកដែលមានគំនិតច្នៃប្រឌិតខ្ពស់ ពួកគេមានទម្លាប់មួយចាកចេញពីស្ថានភាពងាយស្រួល មកបំពេញជីវិតជាមួយស្ថានភាពលំបាលដោយជម្រើស ឱកាស និងការខំប្រឹងបង្កើតផលទ្ធផល។ អ្វីដែលសំខាន់បំផុតគឺពួកគេមិនខ្លាចការបរាជ័យទេ គេយល់ឃើញថា ការបរាជ័យជាឱកាសក្នុងការសិក្សាឱ្យគេយមានគំនិតច្នៃប្រឌិតល្អៗ។ តាមទស្សនវិទូ Ralph Waldo Emerson បានលើកឡើងថា ភាពជោគជ័យជាដំណើរច្នៃការបរាជ័យឱ្យក្លាយជាលទ្ធផល”។
២. ចំណាយពេលច្រើននៅខាងក្រៅ៖ មនុស្សមានគំនិតច្នៃប្រឌិតខ្ពស់គេចូលចិត្តដើរច្រើន ដើម្បីមើលនេះមើលនោះ ដើម្បីបែកគំនិត។ តាមចិត្តវិទូ Ruth Ann Achley គូសបញ្ជាក់ថា បរិយាកាសធម្មជាតិខាងក្រៅ ធ្វើឱ្យចិត្តយើងអាចសម្រាក កាត់បន្ថយភាពតានតឹង ដើម្បីបង្កើតឱ្យមានការស្រមើស្រមៃ ការដោះស្រាយបញ្ហាបានលឿន។ បើអ្នកមានអារម្មណ៍តានតឹងនោះ គ្រាន់តែអ្នកដើរចេញទៅខាងក្រៅក៏មានគំនិតច្នៃប្រឌិតកើតឡើងដែរ។ នេះហើយជាអំណាចបរិយាកាសខាងក្រៅ។
៣. រំភើបនឹងការរៀនអ្វីៗ ថ្មី៖ បុគ្គលមានគំនិតច្នៃប្រឌិតខ្ពស់ព្រោះពួកគេមានទម្លាប់មួយគឺចូលចិត្តការរៀនសូត្រគ្មានឈប់ឈរនោះទេគឺរៀនពេញមួយជីវិត ធ្វើឱ្យពួកគេរស់សម្បូរគំនិតរហូត។ អ្នកមានគំនិតច្នៃប្រឌិតភាគច្រើនយល់ថា ការអប់រំផ្លូវការគ្រាន់តែជាចំណុចចាប់ផ្តើមតែប៉ុណ្ណោះ(អប់រំក្នុងសាលា)។ ពេលអ្នកអប់រំខ្លួនឯងក្នុងបរិយាកាសជាក់ស្តែងជាអប់រំបណ្តុះគំនិតរបស់អ្នកឱ្យមានគំនិតច្នៃខ្ពស់បំផុត។
- ៤. តែងតែធ្វើសមាធិ៖ អ្នកមានគំនិតច្នៃប្រឌិតល្អបំផុតជាអ្នកមានវិន័យធ្វើសមាធិដើម្បីគ្រប់គ្រងលើខ្លួនឯងជាប្រចាំថ្ងៃ ទោះបីមានបញ្ហាធំក៏ដោយ ក៏គេអាចគ្រប់គ្រងលើខ្លួនឯងបានល្អដែរ។ ការធ្វើសមាធិត្រឹមតែ ១០នាទី ក្នុងមួយថ្ងៃក៏បង្កើនថាមពលការច្នៃប្រឌិតរបស់អ្នកឱ្យខុសប្លែកពីគេដែរ។ តាមការស្រាវជ្រាវពីសាកលវិទ្យាល័យ Erasmus នៅប្រទេសហូឡង់បានបង្ហាញថា សមាធិជាផ្នែកយ៉ាងសំខាន់បំផុតឱ្យចិត្តមនុស្សយើងមានស្ថិតស្ថេរក្នុងភាពស្ងប់ស្ងាត់។ តាមគតិបណ្ឌិតព្រះពុទ្ធពោលថា ការងារមិនច្របូកច្របល់ជាមង្គលល្អបំផុត។ មានអត្ថន័យ ចិត្តស្ងប់ជាចិត្តមានកម្លាំងក្នុងការច្នៃប្រឌិតមានប្រសិទ្ធភាពបំផុត៕ អត្ថបទដោយ៖ ទ្រ សុភាព