មនុស្សមានសេចក្តីសុខព្រោះតែមានទ្រព្យច្រើនជារឿងល្អ ប៉ុន្តែបើអ្នកខ្វះសុខភាពរាងកាយ មួយថ្ងៃៗ ដេកតែឈឺព្រឹកល្ងាចនោះ តើអ្នកមានក្តីសុខឬទេ? ព្រះពុទ្ធបានសម្តែងថា “ជីវិតជាទុក្ខ”។ នេះជាសបញ្ជាក់ថាសេចក្តីទុក្ខជាផ្នែកមួយនៃជីវិតមនុស្សគ្រប់គ្នាមែន ដែលមិនអាចគេចវាសបានឡើយ។ រឿងដំបូងអ្នកត្រូវថែរក្សាគឺសុខភាព។ តាមព្រះភិក្ខុ វជិរប្បញ្ញោ បណ្ឌិត គូ សុភាព មានសង្ឃដីកាថា ទម្លាប់ទាំង៣ នាំជីវិតអ្នកបានសុខមានសុខភាពល្អ។
ការថែរាងកាយឱ្យរឹងមាំ ចិត្តអ្នកក៏បានសុខដែរ ព្រោះតែចិត្តនៅក្នុងរាងកាយអ្នកណា! តាមព្រះអង្គបណ្ឌិត គូ សុភាព បានសម្តែងថា ចូរអ្នកព្យាយាមធ្វើលំហាត់ប្រាណ ដើម្បីបង្ការជំងឺដាច់សរសៃឈាមខួរក្បាល ការគាំងបេះដូង កាត់បន្ថយអារម្មណ៍ស្ត្រេសជាដើម ព្រោះវាជួយពង្រឹងប្រពន្ធការពាររាងកាយឱ្យខួរក្បាលចងចាំបានល្អ។ បើមិនធ្វើអ្វីធំដុំ គ្រាន់តែអ្នកដើរយ៉ាងហោចណាស់ ៣០នាទីក្នុង១ថ្ងៃ ដើម្បីបញ្ចេញញើស បញ្ចេញជាតិពុលពីក្នុងខ្លួនក៏បានដែរ ការធ្វើរបៀបនេះ សុខភាពកាយក៏ប្រសើរ សុខភាពចិត្តក៏ល្អដែរ។
ការហាត់ប្រាណកម្រមានអ្នកឈឺណាស់ ឈឺតែអ្នកមិនសូវហាត់ប្រាណទេ។ ត្រឹមតែប៉ុណ្ណឹងក៏មិនទាន់គ្រាប់គ្រាន់ដែរ។ របបអាហារជាប្រភពរបស់មនុស្សគ្រប់គ្នា មិនអាចខ្វះបានក្នុងជីវិតប្រចាំថ្ងៃ។ តាមព្រះអង្គបណ្ឌិត គូ សុភាព បានសម្តែងដែរថា កុំញ៉ាំច្រើនពេក មានទម្លាប់ទំពារអាហារឱ្យហ្មត់ ញ៉ាំអាហារឱ្យទៀងពេល ហើយញ៉ាំអាហារណាមានសុខភាពមានដូចជាញ៉ាំបន្លែបែបធម្មជាតិ ញ៉ាំហើយកុំអង្គុយឬគេងភ្លាម វាមិនល្អចំពោះប្រព័ន្ធរំលាយនៃក្រពះទេ អ្នកគួរតែដើរខ្លះ ដើម្បីឱ្យអាហាររលាយបានល្អ។ កុំញ៉ាំពេលល្ងាចច្រើនពេក ព្រោះវាមិនសូវជាចាំបាច់ និងធ្វើឱ្យអ្នកឡើងគីឡូលឿន។ ហើយពេលអ្នកពិបាកចិត្ត សូមកុំពិសាគ្រឿងស្រវឹង ព្រោះវាធ្វើឱ្យពុលថ្លើម សូម្បីតែប្រព័ន្ធការពាររាងកាយចុះខ្សោយ។
នៅសល់ទម្លាប់ចុងក្រោយមួយទៀត ដែលព្រះអង្គផ្តាំនោះថា ទោះបីអ្នករវល់ការងារប៉ុនណាក៏ដោយ ពិបាកចិត្តប៉ុនណាក៏ដោយ រឿងមួយអ្នកមិនគួរមើលរំលង គឺការគេងឱ្យបានគ្រប់គ្រាន់នេះឯង។ ព្រោះវាមានផលប៉ះពាល់ខ្លាំងដល់សុខភាពកាយនិងចិត្តអ្នកណាស់។ ហើយដើម្បីគេងលក់នោះ អ្នកត្រូវរក្សាចិត្តឱ្យស្ងប់ ផ្អាកគិតមួយរយៈសិន ចាំស្អែក ចាំគិតតទៀត ព្រោះតែការដោះស្រាយបញ្ហាគេបន្តិចម្តងបន្តិចៗ ហើយត្រូវការពេលវេលាដែរ។ ហើយដើម្បីគេងលក់ស្រួលនោះ ចូរអ្នកផ្សាយមេត្តាឱ្យខ្លួនឯង (សូមឱ្យខ្ញុំបានសុខ រួចផុតពីទុក្ខ) ការធ្វើបែបនេះ ចិត្តអ្នកឡើងត្រជាក់រួចហើយក៏គេងលក់ក៏ស្រួល៕ អត្ថបទដោយ៖ ទ្រ សុភាព