ការធ្វើលំហាត់ប្រាណអាចនាំមកនូវអត្ថប្រយោជន៍ជាច្រើនដល់សុខភាព រួមទាំងការគេងបានគ្រប់គ្រាន់ក៏ជួយដល់សុខភាពរបស់អ្នកដែរ ប៉ុន្តែមានពីរពេលដែលអ្នកគួរជៀសវាងការធ្វើលំហាត់ប្រាណ ព្រោះវាអាចបង្កគ្រោះថ្នាក់ដល់រាងកាយរបស់អ្នកវិញ។ តើ២ពេលនេះគឺពេលណាខ្លះ?

ជាការពិតណាស់ ២ពេលដែលអ្នកគួរជៀសវាង មិនគួរធ្វើលំហាត់ប្រាណនោះទេគឺ ការហាត់ប្រាណពេលព្រឹកព្រលឹមមុនថ្ងៃរះ និងការហាត់ប្រាណមុនចូលគេង។

១.កុំហាត់ប្រាណពេលព្រឹកមុនថ្ងៃរះ(ម៉ោង៤ ឬ ៥ព្រឹក)

មនុស្សជាច្រើនបានគិតថា ការធ្វើលំហាត់ប្រាណពេលព្រឹកព្រលឹម (ម៉ោង៤ឬ៥ព្រឹក) គឺជាវិធីដ៏ល្អមួយដើម្បីនាំឱ្យសុខភាពល្អ ប៉ុន្តែនេះក៏អាចបង្កាឱ្យមានគ្រោះថ្នាក់ដល់សុខភាពផងដែរ។ ការធ្វើលំហាត់ប្រាណនៅពេលព្រឹកព្រលឹមពេកអាចបង្កើនហានិភ័យកើតជំងឺសរសៃឈាមបេះដូង ចំពោះមនុស្សចាស់ដែលមានជំងឺលើសឈាម ឬជំងឺទឹកនោមផ្អែម។

- ចំពោះអ្នកជំងឺលើសឈាម៖ ការសិក្សាមួយដែលចេញផ្សាយនៅក្នុងទស្សនាវដ្តី Circulation របស់សមាគមបេះដូងអាមេរិកបានបង្ហាញថា អ្នកដែលមានសម្ពាធឈាមខ្ពស់អាចមានហានិភ័យខ្ពស់នៃជំងឺដាច់សរសៃឈាមខួរក្បាល ប្រសិនបើក្រោកហាត់ប្រាណព្រឹកព្រលឹមពេក។ សម្ពាធឈាមកើនឡើងតាមធម្មជាតិក្នុងរយៈពេល2ម៉ោងដំបូងបន្ទាប់ពីភ្ញាក់ពីគេង។ ដូច្នេះអ្នកជំងឺលើសឈាម គួរចៀសវាងការហាត់ប្រាណពេលព្រឹកព្រលឹម ដើម្បីកំណត់ហានិភ័យនៃបញ្ហាសុខភាពសរសៃឈាម ប៉ះពាល់ដល់សុខភាព និងជួយរក្សាឱ្យអ្នកមានអាយុវែងផងដែរ។

- ចំពោះអ្នកជំងឺទឹកនោមផ្អែម៖ អ្នកដែលមានជំងឺទឹកនោមផ្អែមក៏ត្រូវប្រុងប្រយ័ត្ននឹងការហាត់ប្រាណពេលព្រឹកព្រលឹមដែរ។ កានរមិនទាន់ទទួលទានអាហារពេលព្រឹក ហើយក្រោកហាត់ប្រាណពេលព្រឹកពេក អាចនាំឱ្យអ្នកមានអាការ វិលមុខ ដួលសន្លប់ និងអាចរមួលក្រពើ ដែលជាហេតុបង្កឱ្យប៉ះពាល់សុខភាពផងដែរ។ នៅក្នុងនោះ សមាគមន៍ជំងឺទឹកនោមផ្អែមអាមេរិកបានផ្តល់អនុសាសន៍ថា អ្នកជំងឺទឹកនោមផ្អែមគួរតែបន្ថែមកម្រិតអាំងស៊ុយលីន និងញ៉ាំអាហារពេលព្រឹកសម្រន់មុនពេលធ្វើលំហាត់ប្រាណ ដើម្បីធានាកម្រិតជាតិស្ករក្នុងឈាមមានស្ថេរភាព។

- ចំពោះអ្នកមានសុខភាពល្អ៖ សម្រាប់មនុស្សដែលមានសុខភាពល្អ អ្នកជំនាញណែនាំឱ្យញ៉ាំអាហារពេលព្រឹកដែលមានជាតិកាបូអ៊ីដ្រាត 15 ទៅ 30 នាទីមុនពេលហាត់ប្រាណ ដើម្បីផ្តល់ថាមពលដល់សាច់ដុំ ធ្វើឱ្យការហាត់ប្រាណកាន់តែមានប្រសិទ្ធភាព។

២. កុំហាត់ប្រាណនៅពេលយប់មុនពេលចូលគេង៖

ការធ្វើលំហាត់ប្រាណមុនពេលចូលគេងអាចធ្វើឱ្យប៉ះពាល់ដល់ដំណេករបស់អ្នក។ អ្នកជំនាញផ្នែកវេជ្ជសាស្រ្ដមកពីគេហទំព័រព័ត៌មានសុខភាព Healthline បាននិយាយថា "ការធ្វើលំហាត់ប្រាណនៅពេលយប់ជ្រៅក៏អាចបណ្តាលឱ្យពិបាកក្នុងការគេង"។

នៅពេលអ្នកចាប់ផ្តើមធ្វើលំហាត់ប្រាណ បេះដូងរបស់អ្នកលោតលឿន ដើម្បីបូមឈាមកាន់តែច្រើនទៅកាន់សាច់ដុំរបស់អ្នក។ វាបង្កើនលំហូរឈាមក្នុងរាងកាយទាំងមូល រួមទាំងលំហូរឈាមទៅកាន់ខួរក្បាល។ លំហូរឈាមកាន់តែច្រើនទៅកាន់ខួរក្បាលនឹងបង្កើនថាមពល។ អ្នកជំនាញនៅ National Sleep Foundation បានណែនាំថា មនុស្សត្រូវកំណត់ការហាត់ប្រាណក្នុងរយៈពេល 90 នាទីមុនពេលចូលគេង ព្រោះនេះជាពេលវេលាដែលត្រូវការ ដើម្បីធ្វើឱ្យខ្លួនត្រជាក់បន្ទាប់ពីហាត់ប្រាណ។

ជាចុងក្រោយគេហទំព័រព័ត៌មានសុខភាព Cleveland Clinic បានព្រមានថា ការគេងមិនគ្រប់គ្រាន់អាចធ្វើឱ្យរាងកាយអស់កម្លាំង ខ្វះការប្រុងប្រយ័ត្ន បង្កើនហានិភ័យនៃការបាត់បង់ការចងចាំ សម្ពាធឈាមខ្ពស់ ប្រឈមកើតជំងឺគាំងបេះដូង ដែលអាចបណ្តាលឱ្យមានផលប៉ះពាល់ធ្ងន់ធ្ងរដល់សុខភាព និងអាយុរបស់អ្នក៕