ភេសជ្ជៈ១មុខ ស្រីៗឧស្សាហ៍ស្លេកស្លាំង អស់កម្លាំង ព្រោះខ្វះជាតិដែកគួរផឹក១សប្ដាហ៍២ទៅ៣កែវ
ស្រីៗភាគច្រើនគឺអាចនឹងងាយជួបប្រទះបញ្ហាស្លេកស្លាំង អស់កម្លាំង ដោយសារខ្វះជាតិដែក ឬក៏ដោយសារកង្វះវីតាមីនផ្សេងៗ រួមទាំងបញ្ហាមករដូវច្រើនទៀត ងាយធ្វើឱ្យស្រីៗយើងស្លេកស្លាំង។បញ្ហាស្លេកស្លាំងនេះគឺជាបញ្ហាមួយដែល គ្រោះថ្នាក់ខ្លាំងបើសិនមិនយកចិត្តទុកដាក់ទេ ច្បាស់ជាអាចគ្រោះថ្នាក់ដល់អាយុជីវិត។ ដូច្នេះហើយស្រីៗគួរតែទៅជួបពេទ្យដើម្បីពិនិត្យនិងព្យាបាល ឱ្យបានលឿនចៀសវាងកាន់តែធ្ងន់។
ជាមួយគ្នានេះដែរ របបអាហារប្រចាំថ្ងៃស្រីៗគួរតែញុំាឱ្យបានគ្រប់គ្រាន់ មានដូចជា បន្លែ ត្រីសាច់ ដើម្បីឱ្យរាងកាយមានសារធាតុចិញ្ចឹមគ្រប់គ្រាន់។ បន្ថែមលើសពីនេះ យើងសូមណែនាំភេសជ្ជៈទឹកមើមយ៉េនដែលបងប្អូនស្រីៗយើងអាចធ្វើផឹកខ្លួនឯងបានព្រោះមានប្រយោជន៍ដូចជា៖
-ជួយការពារភាពស្លេកស្លាំង៖ នរណាខ្លះចូលចិត្តផឹកទឹកមើមយ៉េន? មានដឹងអត់ថា ទឹកមើមយ៉េនអាចជួយការពារភាពស្លេកស្លាំងនៃរាងកាយជាពិសេសចំពោះស្រ្តី ក៏ព្រោះតែមើមយ៉េនសម្បូរដោយ ជាតិដែក និងអាស៊ីតហ្វូលិកជាច្រើន ដែលជួយទៅបំពេញគ្រាប់ឈាមក្នុងរាងកាយ ការពារទប់ស្កាត់ភាពស្លេកស្លាំង ដូច្នេះស្ត្រីគួរតែផឹកទឹកមើមយ៉េនជាប្រចាំថ្ងៃល្អចំពោះសុខភាព។
-ជួយលើកកម្ពស់សមត្ថភាពខួរក្បាល៖ ជាការពិតណាស់ ក្រៅពីការពារជំងឺលើសឈាម ភាពស្លេកស្លាំង មើមយ៉េនក៏មាននាទីជួយរក្សាមុខងារខួរក្បាលឱ្យមានសុខភាពល្អ ការពារជំងឺវង្វេង ខ្សោយខួរក្បាល ភ្លេចភ្លាំងច្រើនជាដើម។
-មើមយ៉េនជួយបន្សាបជាតិពុល៖ អត្ថប្រយោជន៍ចុងក្រោយមួយទៀតនៃមើមយ៉េន គឹជួយបន្សាបជាតិពុលបែបធម្មជាតិចេញពីក្នុងខ្លួន សម្រួលមុខងាររបស់ថ្លើម ឱ្យប្រសើរជាងមុន ការពារការឡើងជាតិពុលក្នុងថ្លើម ការពាររលាកថ្លើម ជួយទៅបន្សុទ្ធឈាម ជួយស្បែកស្អាតផងដែរ៕