មានអ្នកសម្រកគីឡូខុសក្បួននាំប៉ះពាល់សុខភាពធ្ងន់ធ្ងរពេលក្រោយ។ ដូចជាអ្នកខ្លះប្រើថ្នាំសម្រកគីឡូដោយខ្វះលំហាត់ប្រាណហើយញ៉ាំអាហារមិនបានគ្រប់គ្រាន់ បែបជាមានបញ្ហាក្រពះទៅវិញ។ មានវិធីល្អៗជាច្រើនអ្នកគួរតែដឹងដើម្បីសម្រកគីឡូបានលទ្ធផលល្អមានរាងស្អាតហើយមិនបង្កជំងឺ។ នេះជាក្បួនញ៉ាំ ៣យ៉ាងជួយដុតខ្លាញ់។
១. កុំទុកឱ្យក្រពះឃ្លានយូរ៖ បើអ្នកទុកឱ្យក្រពះឃ្លានយូរពេក មិនព្រមហូបអាហារអ្វីសោះ វាធ្វើឱ្យអ្នកឈឺក្រពះទៅវិញទេ។ បើអ្នកទុកយូរបែបនេះ បើអ្នកហូបអាហារច្រើនវិញនោះ រាងកាយអ្នកនឹងឡើងគីឡូលឿនបំផុត។ បើអ្នកមានអារម្មណ៍ឃ្លាន ហើយឆាប់ហូបអាហារឱ្យទៀងពេលវេលានោះ វាល្អដល់សម្រកគីឡូ។ អ្នកអាចហូបអាហារដូចជា យ៉ាអួដែលគ្មានជាតិផ្អែម ដំឡូងបារាំងចំហុយ ឬផ្លែឈើដែលមានជាតិស្ករទាប និងបន្លែស្រស់ៗ ដើម្បីរាងកាយអ្នកស្រូបតែជាតិប្រតេអ៊ីន មិនឡើងគីឡូ។
២. ញុំាស៊ុតជាអាហារពេលព្រឹក៖ អាហារពេលព្រឹកក៏មានសារៈសំខាន់ផងដែរចំពោះអ្នកដែរចង់សម្រក់ទម្ងន់ ដូច្នេះដើម្បីទទួលបានលទ្ធផលល្អសូមអ្នកទទួលទានស៊ុតធ្វើជាអាហារពេលព្រឹក។ តាមការសិក្សាស្រាវជ្រាវបានបង្ហាញថាការទទួលទានស៊ុតធ្វើជាអាហារពេលព្រឹកជួយសម្រកខ្លាញ់ក្នុងខ្លួនបានច្រើន។ សូម្បីតែលោកគ្រូ សំបូរ នន់ ជាគ្រូបង្វឹកផ្នែកការហាត់ប្រាណ និងជាអ្នកកាយវប្បកម្មទទួលមេដៃមាសពិភពលោក ក៏មានប្រសាសន៍ផងដែរថា ការហូបពងមាន់ ឬពងទា ជួយឱ្យរាងកាយរបស់យើងមានថាមពល និងជួយសម្រកគីឡូបានយ៉ាងល្អ។
៣. កាត់បន្ថយគ្រឿងកំប៉ុង៖ វេជ្ជបណ្ឌិតគួច ម៉េងលី ក៏ធ្លាប់មានប្រសាសន៍ដែរថាការញុំាដូចជា ជាតិស្ករ ទឹកក្រឡុក ទឹកសេរ៉ូ និងគ្រឿងកំប៉ុងៗផ្សេងៗទៀតសុទ្ធតែមានជាតិស្ករមិនតិចស្លាបព្រានោះទេ ដែលបែបនឹងសុទ្ធតែជារូបមន្តទៅកើតជំងឺធាត់ ទឹកនោមផ្អែម និងឡើងគីឡូលឿនណាស់។ ភេសជ្ជៈប៉ូវកម្លាំងកំពុងមានការពេញនិយមខ្លាំងក្នុងពេលបច្ចុប្បន្នដែលជាហេតុនាំឲ្យមានមនុស្សជាច្រើនមានបញ្ហាក្នុងការឡើងទម្ងន់។ គេបានមើលឃើញថាអ្នកដែលចូលចិត្តញុំាគ្រឿងកំប៉ុងមួយថ្ងៃចាប់ពីមួយទៅពីរកំប៉ុងប្រឈមនិងជំងឺលើសទម្ងន់ ព្រោះជាតិស្ករដែរមាននៅក្នុងកំប៉ុងមានរហូតដល់៧៨ ក្រាមដែលជាជាតិស្ករមួយត្រូវមានការប្រុងប្រយ័ត្នខ្ពស់៕ អត្ថបទដោយ៖ ទ្រ សុភាព