បើអ្នកដែលមានបញ្ហាផ្លូវចិត្ត ស្រ្តេសច្រើន ភ្លេចភ្លាំង ស្ពឹកខួរក្បាល គឺត្រូវងាកមកផ្តោត និងយកចិត្តទុកដាក់ឱ្យបានខ្ពស់ទៅលើរបបអាហារប្រចាំថ្ងៃ។ ការញ៉ាំអាហារបានត្រឹមត្រូវជាចំណែកធំមួយដែលជួយសម្រួលទៅដល់រាងកាយ ផ្លូវចិត្ត និងអារម្មណ៍របស់អ្នក។ អាស្រ័យហេតុនេះ ដើម្បីជួយស្តារសុខភាពផ្លូវចិត្តឱ្យល្អប្រសើរឡើងវិញ របបអាហារល្អៗទាំង ៣នេះ អាចជួយបងប្អូនបាន៖
១. អាហារជួយប៉ូវការផ្តោតអារម្មណ៍៖ ការផ្តោតអារម្មណ៍បានល្អ ឬធ្វើការបានមុតស្រួល វាទាក់ទងទៅនឹងការដកចេញនៃភាពរំខានពីអារម្មណ៍ដែរ។ នេះជាការរក្សានូវសុខភាពរបស់ថាមពលខួរក្បាល។ ចូលអ្នកញ៉ាំអាហារណាមានវីតាមីនB, C, E និងម៉ាញេស្យូមដើម្បីបង្កើនការប្រមូលអារម្មណ៍របស់អ្នកឱ្យមូល។ សម្រាប់ទាំងអស់នេះមានត្រីធូណា ចេក អង្ករសម្រូប, ស្រូវសាឡី, គ្រាប់អាល់ម៉ុន, គ្រាប់ស្វាយចន្ទី, ពពួកសណ្តែកនិងដំឡូងបារាំងសុទ្ធតែសម្បូរទៅដោយម៉ាញេស្យូមដើម្បីបង្កើតការផ្តោតអារម្មណ៍បានល្អ។
២. វីតាមីន C ឱ្យអារម្មណ៍រីករាយ៖ នៅក្នុងចំណោមផ្លែឈើទាំងអស់ផ្លែក្រូចគឺជាផ្លែឈើដែលមានសម្បូរទៅដោយវីតាមីន C ជួយឱ្យអ្នករីករាយឬផ្លូវចិត្តអ្នករំសាយទុក្ខកង្វាល់។ វីតាមីន C ក្នុងផ្លែក្រូចមានធាតុប្រឆាំងអុកស៊ីតកម្មខ្ពស់បំផុត ហើយវាដើរតួយ៉ាងសំខាន់ក្នុងការរក្សាសុខភាពប្រចាំថ្ងៃរបស់យើង។ ជាសមាសធាតុប្រឆាំងអុកស៊ីតកម្ម វីតាមីន C ជួយប្រឆាំងនឹងភាពតានតឹងអុកស៊ីតកម្មដែលបណ្តាលមកពីរ៉ាឌីកាល់សេរី ដែលអាចបណ្តាលឱ្យខួរក្បាលរបស់អ្នកចាស់មុនអាយុ ឬកោសិកាខួរក្បាលរបស់យើងខូច។ ជាមួយគ្នានេះផងដែរយើងអាចរកវីតាមីននៅក្នុងផ្លែឈើផ្សេងទៀតថែមទៀត។
៣. ក្រុមអាហារសម្បូរវីតាមីនB៖ តាមអ្នកជំនាញចំណីអាហារ Dietitian Courtney Barth បានធ្វើការណែនាំឱ្យប្រភេទចំណីអាហារមួយចំនួន ដែលអាចជួយកាត់បន្ថយអ័រម៉ូនស្ត្រេស កាត់បន្ថយភាពតានតឹងមានដូចជា គ្រាប់ធញ្ញជាតិ និងសាច់សត្វមួយចំនួនមានវីតាមីនB ពិសេសវីតាមីនB12 ដែលអាចជួយរំលាយអ័រម៉ូនស្ត្រេសបានដូចជា សាច់គោ សាច់មាន់ ថ្លើមសត្វ ស៊ុត ជាដើម។អាហារដែលអ្នកគួរចៀសវាងប្រសិនបើអ្នកកំពុងតែមានបញ្ហាសុខភាពផ្លូវចិត្តមិនល្អមានដូចជាគ្រឿងស្រវឹង ភេសជ្ជៈ វាជាមេរោគនាំផ្លូវចិត្តរបស់អ្នកចុះខ្សោយ៕ អត្ថបទដោយ៖ ទ្រ សុភាព