ផ្កាយសំណាងរបស់កូនអាចមានពន្លឺទៅបានមិនគ្រាន់តែពឹងផ្អែកលើការខិតខំប្រឹងប្រែងរបស់ខ្លួនគាត់ផ្ទាល់ប៉ុណ្ណោះទេ វាទាមទារការចិញ្ចឹមបីបាច់មួយដ៏ល្អត្រឹមត្រូវចេញពីឪពុកម្តាយរបស់ពួកគេ ដោយអនុវត្តតាំងតែពីតូចមកម្ល៉េះ។ របៀប ឬគោលការណ៍ចិញ្ចឹមត្រូវតែមាននៅក្នុងក្រុមគ្រួសាររបស់ខ្លួន ហើយប្រសិនបើឪពុកម្តាយមានគោលការណ៍អប់រំកូនបានត្រឹមត្រូវ នោះកូនឹងមានអនាគតភ្លឺស្វាង។ ដូច្នេះហើយ នៅក្នុងការអប់រំកូនៗមាតាបិតាត្រូវប្រកាន់ខ្ជាប់នូវគោលការណ៍មួយចំនួនដូចខាងក្រោម៖
១.រស់នៅឱ្យបានត្រឹមត្រូវ និងតឹងរ៉ឹង
នៅពេលដែលឪពុកម្តាយមានរបៀរស់នៅបានត្រឹមត្រូវ មានសប្បុរស និងមានមេត្តា នោះកូនៗនឹងទទួលបានឥទ្ធិពលពីឪពុកម្ដាយ និងដឹងពីរបៀបធ្វើខ្លួនជាមនុស្សកតញ្ញូ និងចេះគោរពអ្នកដទៃ។ របៀបក្នុងការរស់នៅល្អ ទម្លាប់ល្អ និងបុគ្គលិកលក្ខណៈរបស់ឪពុកម្តាយនឹងជះឥទ្ធិពលដល់បុគ្គលិកលក្ខណៈរបស់កូន។ ដូចចាស់ៗតែងនិយាយថា ស្លឹកឈើជ្រុះមិនឆ្ងាយពីគល់។ អត្តចរិតឪពុកម្ដាយបែបណាកូនក៏បែបនោះដែរ។
ប្រាកដណាស់ឪពុកម្តាយគ្រប់រូបស្រឡាញ់កូនរបស់ពួកគេ ហើយចង់ផ្តល់ឱ្យកូនៗនូវអ្វីដែលល្អបំផុត។ ទោះជាយ៉ាងណាក៏ដោយ ប្រសិនបើឪពុកម្តាយតែងតែអធ្យាស្រ័យចំពោះកំហុសរបស់កូន ហើយមិនប្រៀនប្រដៅកូនឱ្យបានតឹងរ៉ឹងទេ នោះកូននឹងមានភាពក្រអឺតក្រទម និងគ្មានសីលធម៌។ ផ្ទុយទៅវិញ បើឪពុកម្តាយតឹងរ៉ឹងពេក កូនងាយមានបញ្ហាផ្លូវចិត្ត មិនស្តាប់បង្គាប់ ខ្លាចធ្វើខុស ហើយមិនហ៊ានសាកល្បងអ្វីដែលថ្មីនោះទេ។
២. កុំមើលងាយសមត្ថភាពរបសើកូន
ឪពុកម្តាយដែលមើលងាយសមត្ថភាពរបស់កូន និងមិនឱ្យកូនបញ្ចេញគំនិតដោយគិតថា "កូននៅក្មេង មិនដឹងអ្វីទេ" នឹងបង្កឱ្យមានគ្រោះថ្នាក់ជាច្រើនដែលមិននឹកស្មានដល់ដែលកើតឡើងក្នុងជីវិតរបស់កូនៗ។ នៅពេលកូននៅក្មេង ពួកគេមិនទាន់ចេះថ្លឹងថ្លែងថា អ្វីត្រូវ និងអ្វីខុសនោះទេ។ ការមើលងាយសមត្ថភាពរបស់កូននឹងធ្វើឱ្យពួកគេខូចចិត្ត មានភាពក្រអឺតក្រទម និងចេះមើលងាយអ្នកដទៃ។ នៅពេលដែលរឿងទាំងនេះក្លាយជាទម្លាប់ ឪពុកម្តាយនឹងគ្មានអំណាចក្នុងការប្រៀនប្រដៅកូនរបស់ពួកគេ ហើយមានទំនោរប្រើការវាយដំទៀតផង។
៣. បណ្ដុះឱ្យកូនទម្លាប់ល្អ(ឯករាជ្យ)
កូននៅវ័យក្មេងប្រៀបបានដូចជាក្រដាសសមួយសន្លឹក ដែលមិនទាន់ប្រលាក់ស្នាមអ្វីឡើយ។ ចំណុចនេះវានឹងមានភាពងាយស្រួលសម្រាប់ឪពុកម្តាយក្នុងការអនុវត្តន៍គោលការណ៍របស់ខ្លួន ដើម្បីឱ្យកូនមានផ្កាយសំណាង។ ដូច្នេះហើយ ប្រសិនបើឪពុកម្តាយអនុវត្តនូវទម្លាប់ល្អពីដើមដំបូងមក វានឹងនាំមកនូវផលប្រយោជន៍រាប់មិនអស់ដល់កូននៅពេលក្រោយ ពោលគឺនៅពេលអនាគត។
ទម្លាប់ល្អត្រូវបណ្តុះកូនតាំងពីតូចដូចជា ផ្ដល់ឱ្យកូនមានឯករាជ្យ រៀនហូបបាយខ្លួនឯង រៀនសម្អាតប្រដាប់ក្មេងលេងខ្លួនឯង រៀនចែករំលែក រៀនមើលថែទាំប្អូនៗ និងមានអាកប្បកិរិយាល្អនៅទីសាធារណៈ...។ល។ ទម្លាប់ទាំងនេះក្លាយជារឿងធម្មតាប្រចាំថ្ងៃ។ ជីវិតកូននឹងមានពន្លឺបន្ដិចម្តងៗ។ ការមានវិន័យ មានឯករាជ្យ និងមានទឹកចិត្តល្អ... ទាំងនេះសុទ្ធតែជាគុណសម្បត្តិដែលឪពុកម្តាយគ្រប់រូបចង់ឱ្យកូនមាន។
៤. អនុញ្ញាតឱ្យកុមាររស់នៅក្នុងបរិយាកាសវិជ្ជមាន
ក្មេងៗងាយទទួលឥទ្ធិពលពីមជ្ឈដ្ឋានជុំវិញខ្លួន និងងាយយកតម្រាប់តាមទម្លាប់អាក្រក់ពីមិត្តភ័ក្តិ។ ប្រសិនបើកូនរបស់អ្នកមានមិត្តភ័ក្តិដែលមានទម្លាប់មិនល្អ នោះពួកគេនឹងធ្វើតាមមិត្តរបស់ពួកគេបន្តិចម្តងៗដោយមិនដឹងខ្លួន។ ដូចពាក្យចាស់ពោលថា "ត្រីមួយកន្ត្រកស្អុយមួយស្អុយទាំងអស់" បង្ហាញពីសារៈសំខាន់នៃបរិស្ថានរស់នៅ និងរឿងដែលពួកគេតែងតែជួបជារៀងរាល់ថ្ងៃ កុមារនឹងរងផលប៉ះពាល់ដោយអវិជ្ជមាន ឬវិជ្ជមាន តាមស្ដានភាពជាក់ស្ដែង។
ប្រសិនបើអ្នកចង់ឱ្យកូនរបស់អ្នកមានអនាគតល្អ និងទទួលបានជោគជ័យ ឪពុកម្តាយត្រូវបង្កើតបរិយាកាសល្អសម្រាប់ពួកគេដើម្បីអភិវឌ្ឍពួកគេ។ នៅក្នុងពេលជាមួយគ្នានេះ មាតាបិតាគួរបង្រៀនកូន និងបង្ហាញពីសកម្មភាពឱ្យច្រើនជាងនិយាយដោយប្រើពាក្យសម្ដីខ្លាំង។ ប្រសិនបើអ្នកចង់ឱ្យកូនរបស់អ្នកមានសុភមង្គល និងសុទិដ្ឋិនិយម ដំបូងពួកគេត្រូវរស់នៅក្នុងគ្រួសារដែលមានសុភមង្គល។ បើចង់ឱ្យកូនរៀនយ៉ាងសកម្ម ដំបូងគេត្រូវតែមានឪពុកម្តាយដែលស្រឡាញ់ការសិក្សា៕