វិបត្តិគេងមិនគ្រប់ គេងមិនងាយលក់ បានក្លាយជាបញ្ហាចោទមួយដែលមនុស្សពេញវ័យជាច្រើនកំពុងតែជួប និងព្យាយាមរកដំណោះស្រាយគ្រប់បែបយ៉ាងដើម្បីជួយសង្គ្រោះខ្លួនចេញពីបញ្ហានេះ នាពេលបច្ចុប្បន្ននេះ។ ហេតុនេះហើយ ដើម្បីជាចំណែកមួយជួយដោះស្រាយបញ្ហាដំណេកខាងក្រោមនេះ គឺជាគន្លឹះខ្លះដែលបានចុះផ្សាយក្នុងគេហទំព័រ health.harvard និងត្រូវបានគេជឿថា វាមានប្រយោជន៍ខ្ពស់ជំរុញការគេងប្រចាំ៖

១. ហាត់ប្រាណ៖ លំហាត់ប្រាណ អាចបង្កើនប្រសិទ្ធភាពនៃអរម៉ូននៃការគេងធម្មជាតិដូចជា melatonin ។ ការ​ធ្វើ​លំ​ហាត់ប្រាណ​ នៅពេលល្ងាច រយៈពេលកន្លះម៉ោងទៅ១ម៉ោង ត្រូវបានគេរកឃើញថា វាមានប្រសិទ្ធិភាពខ្ពស់ជួយរាងកាយបណ្តេញជាតិពុលតាមរយៈការបែកញើស ពង្រឹងមុខងារខួរក្បាល កាត់បន្ថយស្ត្រេស ជំរុញផ្លូវចិត្តឱ្យស្ងប់ ដែលទាំងនេះអាចជះឥទ្ធិពលល្អជួយដល់ការគេងអំឡុងពេលយប់។

២. ញុំាទឹកដោះគោ៖ ចំពោះមនុស្សពេញវ័យការទទួលទានទឹកដោះគោក្តៅឧណ្ហៗ១កែវមុនចូលគេង វា អាចជួយពន្លឿនការគេងបានលឿន ធ្វើឱ្យគេងលក់បានស្កប់ទល់ភ្លឺ។ អត្ថប្រយោជន៍នេះអាចកើតមានបានដោយសារ នៅក្នុងទឹកដោះមានផ្ទុកនូវអាស៊ីតអាមីណូ tryptophan ដោយប្រភេទអាស៊ីតនេះ នឹងដើរតួយ៉ាងសំខាន់ក្នុងការផលិតសារធាតុ serotonin និង melatonin ជួយជំរុញដល់វដ្តដំណេក។

៣. ចៀងវាងផឹកស្រា និងកាហ្វេកៀកម៉ោងចូលគេង៖ សារជាតិកាហ្វេអ៊ីន និងគ្រឿងស្រវឹង ជួយភ្ញោចប្លោកនោម ធ្វើឱ្យនោមញឹកញាប់។ កត្តានេះដែរប្រសិនណាបុគ្គលម្នាក់គាត់ទទួលទាននូវភេសជ្ជៈទាំង២នេះ កៀកម៉ោងគេង នោះបញ្ហាគាត់នឹងត្រូវងើបនោមពេលយប់ញឹកញាប់នាំដាច់ដំណេក។ ទន្ទឹមនឹងនេះទៀតសោត ប្រសិនបើយើងនិយាយអំពីកាហ្វេ វាមានមុខងារ១ទៀតក្នុងការជួយដាស់ស្មារតី​កុំឱ្យងងុយគេង ដូច្នេះប្រសិនបងប្អូនផឹកវាកៀកម៉ោងគេង បងប្អូននឹងត្រូវប្រឈមជាមួយបញ្ហាពិបាកគេងលក់។

៤. កាត់បន្ថយស្ត្រេសពេលយប់៖ មនុស្សសម្បូរស្ត្រេសភាគច្រើននិយមប្រើការគិត និងធ្វើឱ្យខ្លួនឯងកាន់ស្មុគស្មាញខ្លាំងក្នុងអំឡុងពេលយប់ ដែលហេតុបង្កពិបាកគេងជារាល់យប់ ឬចូលគេងយប់ជ្រៅ។ ហេតុនេះ ការបន្ធូរបន្ថយស្ត្រេសមុនចូលគេង តាមរយៈការងូតទឹករៀបចំខ្លួនមុនចូលគេង រៀបចំកន្លែងគេងឱ្យស្អាត ទម្លាប់អានសៀវភៅ រៀបចំផែនការសម្រាប់ថ្ងៃថ្មី ស្តាប់ធម៌ ធ្វើឱ្យចិត្តឱ្យស្ងប់ អនុញ្ញាតឱ្យខួរក្បាល និងរាងកាយសម្រាក ក៏ជាផ្នែកមួយជួយឱ្យគេងលក់បានលឿនផងដែរ។

បន្ថែមជាមួយគ្នានេះផងដែរ ក្រោមប្រធានបទគេងដដែលនេះ ជូនទៅកាន់អ្នកមានដៃគូ ការផ្តល់ភាពកក់ក្តៅ និងការរួមភេទ ក៏ត្រូវបានគេរកឃើញថា មានអត្ថប្រយោជន៍ជួយជំរុញប្រសិទ្ធិភាពគេង ធ្វើឱ្យគេងលក់លឿន និងគេងលក់ស្កប់ថែមទៀត។ ហើយទាំងនេះគ្រាន់តែជាចំណុចខ្លះៗប៉ុណ្ណោះ​ បើយើងនិយាយក្រោមប្រធានបទជួយឱ្យឆាប់គេង នៅមានចំណុចជាច្រើនផ្សេងៗទៀត ដែលនឹងត្រូវបង្ហាញក្នុងអត្ថបទក្រោយ៕