សព្វថ្ងៃនេះ មានអ្នកមួយចំនួនមានបញ្ហាការគេងព្រោះតែលេងទូរស័ព្ទ គិតច្រើន និងបញ្ហាផ្លូវចិត្តជាដើម។ ការគេងមិនលក់នេះ វាពិតជាធ្វើឱ្យអ្នកមានអារម្មណ៍នឿយហត់ និងខ្លាចពេលយប់ថែមទៀត។ អ្នកគេងតិចងាយកើតជំងឺធាត់ លើសឈាម គាំងបេះដូង និងចុះខ្សោយខួរក្បាល។ វិធី ៤យ៉ាងនាំអារម្មណ៍ឆាប់គេង។
១. គ្រប់គ្រងភាពស្ត្រេស តានតឹង៖ ភាពស្ត្រេសតានតឹង គឺជារឿងចម្បង១ដែលធ្វើឱ្យបុគ្គលម្នាក់ដែលគាត់ជួបវិបត្តិពិបាកក្នុងការគេង ឬមានបញ្ហាគុណភាពដំណេកគេងមិនស្ងប់ផងដែរ។ ទាក់ទិនទៅនឹងបញ្ហាស្ត្រេសតានតឹងនឹងដែរ គួរណាស់តែបន្ធូរភាពតានតឹងតាមរយៈគ្រប់គ្រងអារម្មណ៍តាមរយៈការអានសៀវភៅ ស្តាប់ភ្លេងជំនួយអារម្មណ៍ ឬស្តាប់នូវដំបូន្មានល្អៗដើម្បីជំនួយសុខភាពផ្លូវចិត្ត។
២. ដាក់កាលវិភាគដើម្បីការគេង៖ អ្នកគួរមានទម្លាប់កំណត់ការគេងឱ្យបានទៀងទាត់ ម៉ោងគេងល្អចម្លោះម៉ោង១០និងម៉ោង១១យប់។ អ្នកគួរគេងយ៉ាងតិច ៧ម៉ោងក្នុងមួយថ្ងៃ។ យកល្អយើងគួរចូលគេង និងក្រោកពីគេងនៅម៉ោងដដែលជាប្រចាំថ្ងៃ ទើបអ្នកអាចគ្រប់គ្រងរឿងគេងមានប្រសិទ្ធភាព ឬគ្មានបញ្ហាគេងមិនលក់នោះទេ។ បើអ្នកមានបញ្ហាគេងនោះ អ្នកត្រូវតែព្យាយាមកែទម្លាប់ មកគេងម៉ោង១០យប់វិញ។ បើអ្នកមិនអាចគេងលក់ក្នុងរយៈពេល២០នាទីទេ អ្នកអាចសាកចេញពីបន្ទប់គេង និងបន្ធូរអារម្មណ៍ដោយអានសៀវភៅ ស្តាប់ចម្រៀង និងផឹកទឹកក្តៅតិចៗ។ រួចហើយចាំអ្នកអាចត្រលប់ទៅគេងវិញ។
៣. Herbal Tea (តែធ្វើចេញពីរុក្ខជាតិ)៖ តែរុក្ខជាតិដូចជា chamomile, ginger និង mint ត្រូវបានគេរកឃើញនូវសារជាតិចិញ្ចឹមដ៏សម្បូរបែបនៅខាងក្នុងវា ជាពិសេសនោះសារធាតុប្រឆាំងអុកស៊ីតកម្ម សារជាតិចិញ្ចឹមទាំងអស់នេះ មានលក្ខណៈពិសេសជួយលើកកម្ពស់ការគេង បង្កើនគុណភាពដំណេក ប្រសិនបើបានញុំាក្តៅៗមុនចូលគេងកន្លះម៉ោងទៅ១ម៉ោងទៀត រឹតតែមានប្រសិទ្ធិជួយដល់ខួរក្បាលឱ្យបានសម្រាក និងរក្សាសំណើមឱ្យស្បែក។
៤. បិទឧបករណ៍អេឡិចត្រូនិច៖ មុនដល់ម៉ោងចូលគេង១ម៉ោងឬក៏៣០នាទីមុនគឺត្រូវតែបិទគ្រឿងអេឡិចត្រូនិចដូចជាទូរស័ព្ទ កុំព្យូទ័រចេញ ជាដើម។ពីព្រោះពន្លឺដែលចេញពីគ្រឿងទាំងអស់នឹងបានរារាំងនៅក្នុងការផលិតសារធាតុmelatonin ដែលជាសារធាតុជម្រុញដល់ការគេងជាពិសេសធ្វើឱ្យការគេងគឺពិបាកទម្រាំតែគេងប្រើរយៈពេលយូរ មួយវិញទៀតក៏ជះជាឥទ្ធិពលអាក្រក់ៗដល់បញ្ហាផ្លូវចិត្តផងដែរនៅពេលមើលប៉ះបណ្ដាញសង្គមណាមួយមិនល្អ អាចបង្កឱ្យអ្នកមានវិបត្តិផ្លូវចិត្តឡើងមក៕ អត្ថបទដោយ៖ ទ្រ សុភាព