១. ផ្លែបឺរ៖ ផ្លែបឺរមិនត្រឹមតែឆ្ងាញ់ទេ ប៉ុន្តែវាមានអាស៊ីតខ្លាញ់ល្អ ដូចជា អូមេហ្កា-3 ស័ង្កសី និងទង់ដែង ដែលជាសារធាតុចាំបាច់សម្រាប់ការផលិតកូឡាជែន។ វាក៏ជួយការពារស្បែកពីការប៉ះពាល់ដោយពន្លឺព្រះអាទិត្យ និងជួយឱ្យស្បែកមានសំណើមកាត់បន្ថយភាពស្ងួត។ ការទទួលទាន ផ្លែប៊ឺ ១ផ្លែក្នុង ១ថ្ងៃគឺគ្រប់គ្រាន់សម្រាប់ផ្ដល់សារធាតុចិញ្ចឹមដល់ស្បែក ដោយមិនបណ្ដោយឱ្យខ្លាញ់កើនឡើង ឬធ្វើឱ្យកាឡូរីធ្លាក់ចុះពេកទេ។ 

២. ផ្លែក្រូច៖ ផ្លែក្រូច សំបកក្រូច ទាំងអស់នេះសម្បូរទៅដោយវីតាមីន C ដែលជាសារធាតុសំខាន់ក្នុងការជំរុញឱ្យរាងកាយផលិតកូឡាជែន។ វីតាមីន C ក៏ជួយការពារស្បែកពីអុកស៊ីតកម្ម និងជួយឱ្យស្បែកស្រស់ថ្លា។ ទោះជាយ៉ាងណា អ្នកដែលមានបញ្ហាប្រព័ន្ធរំលាយអាហារ ដូចជា ដំបៅក្រពះ ឬរលាកលំពែង គួរញុំាវាក្នុងបរិមាណតិចតួចបានហើយ ឬបើអាចគួរតែពិគ្រោះជាមួយគ្រូពេទ្យជាមុនសិន។ 

៣. ផ្លែត្របែក៖ ផ្លែត្របែកមានវីតាមីន C ច្រើនជាងផ្លែក្រូច ហើយសម្បូរទៅដោយជាតិស័ង្កសីដែលជួយឱ្យរាងកាយបង្កើនការផលិតកូឡាជែន។ វាក៏ជួយពង្រឹងប្រព័ន្ធភាពស៊ាំ និងការពារសរសៃឈាមបេះដូង។ លើសពីនេះ ផ្លែត្របែកក៏ជាអាហារដែលជួយសម្រស់ ធ្វើឱ្យស្បែកមានភាពតឹងរលោងស្អាតផងដែរ។
 
៤. ផ្លែប៊ឺរី៖ ផ្លែប៊ឺរី ដូចទៅនឹង ស្ត្របឺរី ប្លូបឺរី និង រ៉ាសប៊ឺរី ដែរ ជាផ្លែឈើដែលសម្បូរទៅដោយវីតាមីន C និងវីតាមីន A។ វាជួយជំរុញការបង្កើតកូឡាជែន និងជាសារធាតុប្រឆាំងអុកស៊ីតកម្មដ៏មានប្រសិទ្ធភាពបំផុត ប៊ឺរី ក៏ជួយការពារស្បែកពីភាពចាស់មុនវ័យ ដោយកាត់បន្ថយដូចជាស្នាមជ្រួញ ឬភាពស្រអាប់នៅលើមុខ។

៥. ផ្លែស្វាយ៖ ផ្លែស្វាយជាប្រភពល្អនៃទង់ដែង វីតាមីន A, B និង C ដែលជួយបង្កើនកូឡាជែនធម្មជាតិ និងជួយការពារស្បែកកុំឱ្យស្ងួត ឬស្រអាប់។ ការញ៉ាំផ្លែស្វាយទុំធម្មជាតិប្រហែល ២០០ ក្រាមក្នុងមួយថ្ងៃគ្រប់គ្រាន់សម្រាប់ផ្តល់សារធាតុចិញ្ចឹមដល់ស្បែក និងសុខភាពទូទៅ។ ទោះបីជាយ៉ាងណា អ្នកដែលមានបញ្ហារាគ ឬដំបៅក្រពះ គួរតែញុំាវាក្នុងបរិមាណតិចតួចបានហើយ។ 

អត្ថប្រយោជន៍បន្ថែម ក្រៅពីការញ៉ាំផ្លែឈើទាំងនេះ អ្នកគួរផឹកទឹកឱ្យគ្រប់គ្រាន់ និងចៀសវាងអាហារដែលបំផ្លាញកូឡាជែនដូចជា អាហារដែលមានជាតិស្ករបន្ថែម និងអាហារជាតិខ្លាញ់ខ្ពស់។ ការធ្វើលំហាត់ប្រាណទៀងទាត់ និងគេងឱ្យបានគ្រប់គ្រាន់ក៏ជួយឱ្យរាងកាយផលិតកូឡាជែនបានល្អជាងផងដែរ៕

អត្ថបទដោយ៖ សារួ