១. ផឹកទឹកច្រើនមុនពេលចូលគេង៖ ការផឹកទឹកច្រើននៅពេលយប់ អាចធ្វើឱ្យតម្រងនោមត្រូវធ្វើការខ្លាំងជាងធម្មតាដើម្បីផលិតទឹកនោម។ វាធ្វើឱ្យយើងនោមញឹក ធ្វើឱ្យតម្រងនោមរងសម្ពាធពេលយប់។ ការផឹកទឹកឱ្យបានគ្រប់គ្រាន់គឺពិតជាសំខាន់ តែត្រូវបែងចែកឱ្យដាច់រវាងពេលយប់ និងពេលថ្ងៃ។ ត្រូវបន្ថយបរិមាណទឹក ២ ម៉ោងមុនចូលគេង ដើម្បីឱ្យតម្រងនោមអាចមានពេលសម្រាកបាន។ 

២. ទប់ទឹកនោមនៅពេលយប់៖ អ្នកខ្លះគិតថាការក្រោកពីគេងដើម្បីទៅបន្ទប់ទឹកជារឿងដ៏គួរឱ្យរំខាន ដូច្នេះក៏ប្រឹងទប់មិនក្រោករហូតដល់ភ្លឺ។ តែការទប់នោមយូរបែបនេះធ្វើឱ្យមានសម្ពាធក្នុងប្លោកនោមកើនឡើង បង្កឱ្យបាក់តេរីមានឱកាសលូតលាស់ និងបង្ករឱ្យសរសៃតម្រងនោមកាន់តែតានតឹង នេះអាចនាំឱ្យមានការឆ្លងមេរោគតាមផ្លូវបង្ហូរទឹកនោម និងប៉ះពាល់ដល់ទម្រង់ការងារតម្រងនោមក្នុងរយៈពេលវែង។ ដើម្បីឱ្យតម្រងនោមមានសុខភាពល្អ អ្នកមិនគួរទប់នោមយូរពេកទេ បើអាចត្រូវចូលបន្ទប់ទឹកឱ្យហើយមុនចូលគេង និងជៀសវាងភេសជ្ជៈមានជាតិកាហ្វេអ៊ីននៅពេលល្ងាច។ 

៣. ផឹកស្រាមុនចូលគេង៖ ការផឹកស្រាពេលជិតចូលគេងភ្លាមៗអ្នកមើលមិនឃើញពីហានិភ័យ តែយូរទៅនឹងបង្កឱ្យមានផលប៉ះពាល់ធ្ងន់ធ្ងរ។ ស្រាធ្វើឱ្យរាងកាយខ្វះជាតិទឹក និងធ្វើឱ្យតម្រងនោមផលិតទឹកនោមច្រើនជាងធម្មតា។ វាធ្វើឱ្យភ្ញាក់ញឹកញាប់នៅពេលយប់ និងធ្វើឱ្យអ្នកងាយភ្ងាក់នៅពេលយប់ជ្រៅ ដែលជាពេលសំខាន់សម្រាប់សម្ពាធឈាម និងការស្ដារប្រព័ន្ធរាងកាយ។ ចង់បានតម្រងនោមល្អកាត់បន្ថយជាតិអាល់កុល ជាវិធីដែលអាចជួយអ្នកបានទាំងសុខភាពជាទូទៅ និងសុខភាពតម្រងនោម។

ការបង្កើតទម្លាប់ល្អៗមុនពេលគេង ដូចជាងូតទឹកក្តៅឧណ្ឌៗ ស្តាប់តន្ត្រីបន្ធូរអារម្មណ៍ ឬដើរលេងបន្តិចមុនចូលគេង អាចជួយឱ្យអ្នកឆាប់គេងលក់ និងអាចផ្ដល់ឱ្យតម្រងនោមមានពេលសម្រាកបានពេញលេញ។ ការយកចិត្តទុកដាក់លើទម្លាប់តូចៗទាំងនេះអាចធ្វើឱ្យសុខភាពតម្រងនោមរបស់អ្នកកាន់តែប្រសើរឡើង៕

អត្ថបទដោយ៖ សារួ