១. ទុកទូរស័ព្ទក្នុងហោប៉ៅខោ៖  ការទុកទូរស័ព្ទក្នុងហោប៉ៅខោ ជារបៀបពេញនិយមខ្លាំងដោយសារវាងាយស្រួលនៅពេលត្រូវការយកចេញមកប្រើប្រាស់ ប៉ុន្តែទុកទូរស័ព្ទរបៀបនេះវាអាចប៉ះពាល់ខ្លាំងដល់សុខភាព ជាពិសេសចំពោះបុរសៗ។ ទូរស័ព្ទអាចបញ្ចេញរលកអេឡិចត្រូម៉ាញេទិក និងបង្កើនសីតុណ្ហាភាពនៅតំបន់ដែលប៉ះពាល់វា។ ការសិក្សាជាច្រើនបានបង្ហាញថា ការទុកទូរស័ព្ទនៅតំបន់ជិតក្រលៀនអាចប៉ះពាល់ដល់សមត្ថភាពមានកូនរបស់បុរស។ ម្យ៉ាងវិញទៀត ការអង្គុយក្នុងពេលទូរស័ព្ទនៅក្នុងហោប៉ៅអាចប៉ះពាល់ដល់សរសៃប្រសាទ Sciatica បណ្តាលឱ្យឈឺចាប់ និងបង្កហានិភ័យនៃជំងឺឆ្អឹងខ្នង។

២. ទុកទូរស័ព្ទជិតក្បាលពេលគេង៖ ទម្លាប់មួយរបស់មនុស្សជាច្រើនគឺនៅពេលយប់ដេកចុចទូរស័ព្ទ ពេលងងុយក៏ទុកទូរស័ព្ទនៅជិតក្បាលដំណេកតែម្ដង។ តែការធ្វើបែបនេះមានគ្រោះថ្នាក់ណាស់ ពន្លឺពណ៌ខៀវពីអេក្រង់ទូរស័ព្ទអាចរារាំងដល់ការផលិតអរម៉ូនមេឡាតូនីន ដែលជាអរម៉ូនជួយឱ្យគេងលក់ស្រួល។ លើសពីនេះ ការសាកថ្មពេញមួយយប់ ឬដាក់ទូរស័ព្ទក្រោមភួយអាចធ្វើឱ្យឧបករណ៍ឡើងកំដៅខ្លាំង បង្កហានិភ័យឱ្យឆេះ ឬផ្ទុះបាន។

៣. ទុកទូរស័ព្ទក្នុងហោប៉ៅក្បែសុសុដន់៖ ការស្រាវជ្រាវ និងករណីសិក្សា មួយចំនួន បង្ហាញថា ការទុកទូរស័ព្ទនៅក្នុងហោប៉ៅអាវក្បែសុដន់ អាចជាប់ទាក់ទងនឹងជំងឺមហារីកសុដន់ ដោយសារតែវិទ្យុសកម្ម និងរំញ័រចេញពីទូរសព្ទ។ ទោះបីជាមិនមានភស្តុតាងច្បាស់ថា ការទុកបែបនេះបង្កឱ្យកើតមហារីកសុដន់ក៏ដោយ តែការទុកឧបករណ៍ដែលបញ្ចេញរលកអេឡិចត្រូម៉ាញេទិកជិតតំបន់ទ្រូងអាចប៉ះពាល់ដល់សុខភាពបាន។ 

៤. កាន់ទូរស័ព្ទជិតមុខពេលនិយាយ៖ ការនិយាយទូរស័ព្ទដោយយកឧបករណ៍ដាក់ជិតមុខ ឬត្រចៀកជាប្រចាំអាចបង្កបញ្ហាស្បែក។ ទូរស័ព្ទគឺជាប្រភពនៃបាក់តេរី និងមេរោគដែលកើតឡើងពីដៃ ឬតុដែលបានប៉ះវា។ នៅពេលដែលយើងនិយាយ ហើយទូរស័ព្ទប៉ះស្បែក មេរោគទាំងនេះអាចផ្ទេរទៅមុខ បណ្តាលឱ្យស្បែករលាក ឬកើតមុន។ ដើម្បីជៀសវាងបញ្ហានេះ គួរប្រើឧបករណ៍ស្តាប់បន្ថែម (earphones) ឬបើកសម្លេង speaker ពេលនិយាយ។

ទូរស័ព្ទដៃជាឧបករណ៍ចាំបាច់ ប៉ុន្តែការប្រើប្រាស់មិនប្រុងប្រយ័ត្នអាចបង្កផលប៉ះពាល់ដល់សុខភាពបាន។ ដូច្នេះគួរប្រើវាឱ្យបានត្រឹមត្រូវ ដាក់ឧបករណ៍ទាំងនេះឱ្យឆ្ងាយពីរាងកាយពេលមិនប្រើ ហើយកុំទុកវានៅកន្លែងដែលអាចបង្កគ្រោះថ្នាក់ដូចដែលបានរៀបរាប់ខាងលើ។ ការផ្លាស់ប្តូរទម្លាប់តូចៗទាំងនេះអាចជួយអ្នកក្នុងការពារសុខភាព៕ 

អត្ថបទដោយ៖ សារួ