ការចងចាំល្អគឺជាមូលដ្ឋានគ្រឹះដ៏សំខាន់សម្រាប់ការសិក្សារបស់ក្មេងមិនថានៅសាលារៀន ឬក៏នៅក្នុងជីវិតរស់នៅប្រចាំថ្ងៃរបស់ពួកគេ។ មានការចងចាំល្អអាចធ្វើឱ្យក្មេងរៀនឆាប់ចាំ ឆាប់ចេះ ឆ្លាតធ្វើអ្វីក៏បានល្អប្រសើរ ហើយក៏ធ្វើឱ្យពួកគេមានទំនុកចិត្តខ្ពស់លើខ្លួនឯងដែរ។ ខួរក្បាលក្មេងតែងអភិវឌ្ឍបានលឿន ប្រសិនបើពួកគេទទួលបានការគាំទ្រល្អពីឪពុកម្តាយ និងបរិយាកាសល្អសម្រាប់រៀនសូត្រ។ ដើម្បីជួយកូនរបស់អ្នកអភិវឌ្ឍខួរក្បាល និងការចងចាំបានល្អជាងមុន អ្នកអាចអនុវត្តវិធីសាមញ្ញខាងក្រោមនេះ៖
១. លើកទឹកចិត្តឱ្យកូនសួរសំណួរ៖ ក្មេងដែលសួរច្រើន គឺជាក្មេងដែលព្យាយាមយល់អត្ថន័យខ្លឹមសារ។ ដូច្នេះអ្នកជាឪពុកម្ដាយត្រូវបង្រៀនឱ្យពួកគេសួរអំពីអ្វីដែលពួកគេចង់ដឹង ហើយឆ្លើយតបទៅលើសំណួរនីមួយៗឱ្យបានច្បាស់។ វាជួយអភិវឌ្ឍជំនាញគិតវិភាគ និងការដោះស្រាយបញ្ហា ហើយជួយឱ្យពួកគេក្លាហានក្នុងការសួរមិនថានៅសាលារៀន ឬក៏នៅទីសាធារណាៈ។
២. បង្កើតបទពិសោធន៍រៀនដែលគួរឱ្យចាប់អារម្មណ៍៖ ការរៀនសូត្រដែលរីករាយធ្វើឱ្យកូនចងចាំបានល្អជាងមុន។ អ្នកអាចនាំកូនទៅបណ្ណាល័យ ស្វែងរកសៀវភៅ ឬវីដេអូថ្មីៗ អនុញ្ញាតឱ្យពួកគេចាប់អារម្មណ៍លើប្រធានបទដែលពួកគេចូលចិត្ត។ ង្កើតបរិយាកាស សម្ភារៈសិក្សា របស់លេង ឱ្យបានពណ៌ចម្រុះ ថ្មីៗប្លែកៗ ឬនាំពួកគេបង្កើត ធ្វើវាឡើងដោយខ្លួនឯង កូននឹងមានអារម្មណ៍សប្បាយជាមួយនឹងការរៀនថ្មីៗ មិនធុញថប់ ឆាប់ចាំបាន។
៣. ជម្រុញឱ្យកូនបង្រៀនឪពុកម្ដាយវិញ៖ បន្ទាប់ពីរៀនរួច អ្នកត្រូវដើរតួជាសិស្សដោយសុំឱ្យកូនពន្យល់វិញនូវអ្វីដែលបានរៀន រួច ឬអ្វីដែលគេបានជួបប្រទៈ។ ការធ្វើបែបនេះជួយឱ្យកូនរបស់អ្នកពង្រឹងលើការចងចាំ និងដើម្បីតេស្តមើលថាតើកូនរបស់អ្នកអាចចងចាំបានល្អប៉ុនណា។
៤. រៀនតាមរយៈការស្ដាប់៖ ការស្ដាប់ជាជំនាញមួយដែលជួយក្មេងឱ្យចងចាំបានល្អ។ អ្នកអាចអានរឿង ឬពន្យល់អំពីមេរៀនម្តងហើយម្តងទៀត។ បន្ទាប់មក សួរឱ្យកូនសង្ខេបអ្វីដែលគេបានស្ដាប់ ឬឱ្យគូសសរសេរចេញនូវអ្វីដែលគេបានចងចាំ។ ដំណើរនេះជួយឱ្យពួកគេចងចាំបានល្អជាងមុន ដូចការស្ដាប់ចម្រៀងហើយចេះច្រៀង៕
អត្ថបទដោយ៖ សារួ