ពេលឪពុកម្តាយជប៉ុនមានភាពស្និទ្ធស្នាលជាមួយកូន ពួកគាត់ក៏បានបង្រៀនផ្នត់គំនិតឱ្យកូនយល់ពីក្រមសីលធម៌ក្នុងការរស់នៅដោយប្រើគំនិតដោយខ្លួនឯង។ ប៉ុន្តែចំពោះកិច្ចការណាដែលហួសពីសមត្ថភាពរបស់កូន ពួកគាត់ចាំជួយ ចាំផ្តល់គំនិត និងចាំលើកទឹកចិត្តកូននៅពីក្រោយខ្នងជានិច្ច។
ឪពុកម្ដាយជនជាតិជប៉ុនតែងតែយកចិត្តទុកដាក់លើទំនាក់ទំនងជាមួយកូនៗ ដូចជាអ្នកស្រី ម៉ៅ សុចំណាន ជាជនជាតិខ្មែររស់នៅលើទឹកដីជប៉ុន បានរៀបការជាមួយជនជាតិជប៉ុន ដែលស្វាមីរបស់អ្នកស្រីមានឈ្មោះថា ណាកាបូ តារ៉ូ (Nakabo TaRo) តាំងពីឆ្នាំ២០១៧។ បច្ចុប្បន្ននេះអ្នកស្រី និងស្វាមីមានកូនប្រុសពីរនាក់។ កូនប្រុសច្បងមានឈ្មោះថា ណាកាបូ រ៉េអូ (Nakabo Reo) និងកូនប្រុសពៅមានឈ្មោះថា ណាកាបូ ខៃ (Nakabo Kai)។
នៅក្នុងជីវភាពសាមញ្ញ អ្នកស្រី ម៉ៅ សុចំណាន និងស្វាមី តែងតែប្រឹងប្រែងរកស៊ីលក់ដូរនៅតំបន់មួយក្នុងប្រទេសជប៉ុន។ ទោះបីអ្នកស្រីរកស៊ីមានភាពមមាញឹកក្ដី ក៏គាត់មិនដែលភ្លេចឡើយពីទំនាក់ទំនង និងការទូន្មានកូន។ ជាពិសេសប្ដីរបស់អ្នកស្រីតែម្តង គាត់តែងតែនៅក្បែរកូនៗ និងបង្ហាត់បង្រៀនកូនរាល់ពេលទំនេរពីការលក់ដូរ។ ហើយថ្ងៃខ្លះញុំាបាយបណ្ដើរ បង្រៀនកូនបណ្ដើរ សួរកូនបណ្តើរ និងមានស្នាមញញឹមហូបបាយជុំគ្នាបណ្តើរ។ បើមិនឆ្លៀតពេលក្នុងឱកាសហូបបាយជុំគ្នាហ្នឹងទេ គឺគ្មានពេលវេលាគ្រប់គ្រាន់សម្រាប់ទំនាក់ទំនងជាមួយកូនឡើយ។
ថ្ងៃទំនេរពីការសិក្សា រ៉េអូ និងខៃ មិនបានទៅសាលារៀននោះទេ ហើយពេលអ្នកស្រីមកពីហាងវិញនៅពេលព្រឹក អ្នកស្រីតែងតែនៅក្បែរកូនៗ នាំកូនលេងពីនេះ លេងពីនោះនៅក្នុងផ្ទះដូចជា ការគូររូបភាព ការផាត់ពណ៌ និងធ្វើអាហារបែបខ្មែរឱ្យកូនញុំាជាដើម ប៉ុន្តែរាល់ពេលនៅជាមួយកូន និងនាំកូនលេង អ្នកស្រីឆ្លៀតបិទភ្នែកគេងមួយស្របក់ៗ នៅលើសាឡុងសម្រាកពីការនឿយហត់ ដើម្បីយកកម្លាំងមកលេងជាមួយកូនបន្តទៀត។
ទោះបីកាយអស់កម្លាំង តែចិត្តជាឪពុកម្ដាយនៅតែឆ្លៀតពេលវេលាទំនាក់ទំនងជាមួយកូនដោយទឹកចិត្តក្តីស្រឡាញ់ដែរ ពីព្រោះវាជាទំនួលខុសត្រូវរបស់ឪពុកម្ដាយត្រូវតែធ្វើរឿងនេះ។ ឪពុកម្តាយជនជាតិជប៉ុនចាត់ទុកកូនសំខាន់ជាងអ្វីៗ ទាំងអស់។ ពេលកូនទំនេរពីការសិក្សាជាឪកាសល្អដែលឪពុកម្ដាយមានពេលគ្រប់គ្រាន់ទំនាក់ទំនងជាមួយកូន។
ហើយអ្នកស្រី និងស្វាមី តែងតែធ្វើការទំនាក់ទំនងជាមួយកូនបន្ថែមទៀតដោយនាំកូនទៅក្រៅស្រូបយកខ្យល់បរិយាកាស និងដើរលេងតាមទីកន្លែងកម្សាន្តនានា ដើម្បីឱ្យកូនកាន់តែមានភាពស្និទ្ធស្នាលជាមួយឪពុកម្ដាយ។ ព្រោះឪពុកម្ដាយជនជាតិជប៉ុនមានផ្នត់គំនិតបង្រៀនកូនបែបនេះ ដើម្បីឱ្យកូនចេះឯករាជ្យដោយខ្លួនឯងតាំងពីតូចមកម្ល៉េះ។
វប្បធម៌ជប៉ុនឱ្យកូនៗ ខំប្រឹធ្វើការដោយខ្លួនឯង រស់ដោយមិនចាំបាច់លើកការសរសើរ និងដោះដូរក្តីស្រមៃព្រោះលុយនោះទេ។ ការចេះពឹងលើសមត្ថភាពខ្លួនឯង រស់តាមក្តីស្រមៃ ជីវិតកូនកាន់តែមានតម្លៃ។ តាមលោក តូ ហ្វាយ ជាអ្នកនិពន្ធជប៉ុនបានលើកឡើងថា ឪពុកម្តាយត្រូវចេះចិញ្ចឹមកូនឱ្យចេះជួយជីវិតនេះដោយខ្លួនឯង។ បើកូនប្រុសស្រីទាំងអស់នោះចេះតែដើរប៉ោឡែ ហើយសុំលុយតែពីឪពុកម្តាយទៅស៊ីនោះ ពួកគេនឹងមានគំនិតពឹងផ្អែក។ របៀបនេះវាអាក្រក់ណាស់ លុះដល់ពេលពួកគេចេញទៅរស់នៅ បែកពីផ្ទះឪពុកម្តាយ ពួកគេគ្មានចេះធ្វើអ្វីទេ”៕ ផេក Facebooks៖ លោកស្រី ម៉ៅ សុចំណាន Mao So Chamnan
