ទម្លាប់ដែលអ្នកចំណាយពេលអង្គុយច្រើនម៉ោងពេកនៅកន្លែងធ្វើការ ឬនៅផ្ទះ វាស៊ីសាច់ដុំឱ្យចុះខ្សោយ ហើយថែមទាំងបង្កើនចំណង់លើចំណីអាហារកាន់តែឃ្លាន។ ការអង្គុយច្រើនធ្វើឱ្យមានជំងឺលើសឈាម ជំងឺពុកឆ្អឹង ជំងឺមហារីក និងជំងឺធាត់ដុះក្បាលពោះ។ ពេលអ្នកកង្វះសកម្មភាពផ្នែករាងកាយធ្វើឱ្យកោសិកាទាំងនោះកាន់តែចាស់ ហើយធ្វើឱ្យប៉ះពាល់ដល់សារពាង្គកាយទាំងមូល។
នេះជាបញ្ហានៅគ្រប់ដំណាក់កាលនៃជីវិត មិនត្រឹមតែកើតឡើងចំណោមមនុស្សពេញវ័យទេ។ សូម្បីកុមារ និងមនុស្សចាស់ក៏មានបញ្ហាធាត់លឿនដែរ។ គ្រាន់តែអ្នកធ្វើតាមវិធីទាំង ៦ខាងក្រោមនេះ សុខភាពកាន់តែរឹងមាំ៖
១. ចូរដើរទៅធ្វើការ ឬដើរលេងៗរយៈពេលយ៉ាងហោចណាស់២០នាទីជាប្រចាំថ្ងៃដែរ។
២. ព្យាយាមឡើងជណ្តើរដោយជើងរបស់អ្នកជាជាងការប្រើជណ្តើរយន្ត។ ការធ្វើបែបនេះ ជួយផ្តល់ផលល្អសម្រាប់ឥរិយាបថ បង្កើនសាច់ដុំ និងប្រព័ន្ធផ្លូវដង្ហើមរបស់អ្នកបានល្អ។
៣. ចូលរួមសកម្មភាពសង្គមនានា ការធ្វើបែបនេះដោយចំណាយពេលវេលាល្អជាងអង្គុយមើលទូរទស្សន៍ហើយវាក៏អាចជួយពង្រឹងស្មារតីរីករាយក្នុងសហគមន៍ផងដែរ។
៤. ចូរហូបអាហារផ្លែឈើ បន្លែ និងត្រី ព្រោះអាហារប្រភេទនេះជួយផ្តល់ថាមពលដល់រាងកាយ។
៥. ចូរចំណាយពេលសម្រាប់គេងឱ្យបាន ៧ ទៅ ៨ម៉ោងជាការល្អ ប៉ុន្តែការគេងច្រើនជាងនេះធ្វើឱ្យយើង មានអារម្មណ៍ស្លឹកស្រពន់។
៦. ការលេងជាមួយក្មេងៗ លេងជាមួយសត្វចិញ្ចឹម និងលេងកីឡាជួយរាងកាយរឹងមាំ ប៉ុន្តែថែមទាំងជួយ ជំរុញខួរក្បាល និងបង្កើនការគោរពខ្លួនឯងថែមទៀត។
តាមរយៈការផ្លាស់ប្តូរបន្តិចបន្តួចទាំងនេះ យើងអាចចាប់ផ្តើមស្ថាបនា រាងកាយ និងផ្លូវចិត្តរបស់យើងសារជាថ្មី ព្រមទាំងបង្កើនអាយុកាលសង្ឃឹមរស់ របស់យើងទៀតផង។