កម្រិតជាតិខ្លាញ់ក្នុងឈាមខ្ពស់ រួមទាំងនៅក្នុងរាងកាយ ធ្វើឱ្យសុខភាពអ្នកកាន់តែខ្សោយលឿន។ ពេលនៅក្នុងខ្លួនអ្នកមានខ្លាញ់ច្រើននោះ នាំឱ្យអ្នកមានជំងឺសរសៃឈាមបេះដូង គាំងបេះដូង ដាច់សរសៃឈាមខួរក្បាល និងជំងឺថ្លើមខ្លាញ់…។ ដើម្បីការពារជំងឺទាំងនេះ គឺការពារភាពធាត់។ ៤វិធីនេះជួយដុតជាតិខ្លាញ់ក្នុងខ្លួនអ្នកឱ្យថយចុះ៖
១. កំណត់ជាតិខ្លាញ់ល្អ៖ អ្នកគួរកំណត់កូឡេស្តេរ៉ុលល្អនៅក្នុងឈាម ដើម្បីបានខ្លាញ់ល្អ អ្នកគួរហូបផ្លែប័រ ផឹកទឹកដោះគោស្រស់ ត្រី ស្រូវសាលី ប្រេងអូលីវ និងប្រេងផ្កាឈូករ័ត្នជាដើម។ ពេលអ្នកប្រើប្រេងឆាល្អ និងហូបអាហារដែលមានជាតិខ្លាញ់ល្អ វាជួយបណ្តេញជាតិខ្លាញ់អាក្រក់ចេញពីសរសៃឈាម និងចេញពីរាងកាយផងដែរ។
២. អាហារមានជាតិសរសៃ Fiber៖ សម្រាប់ជាតិសរសៃ Fiber ជួយកាត់បន្ថយកម្រិតខ្លាញ់អាក្រក់ចេញពីក្នុងសរសៃឈាម ជួយឱ្យកម្រិតកូលេស្តេរ៉ូលក្នុងឈាមថយចុះ។ អាហារមានផ្ទុកជាតិសរសៃជាតិ Fiber មានដូចជាផ្លែប៉ោម មានផ្លែផាសិន សណ្ដែក ការ៉ុត គ្រាប់រុក្ខជាតិ ផ្កាខាត់ណា សណ្ដែក ដំឡូង និងស្រូវសាឡី…ព្រោះសរសៃ Fiber ជួយរលាយជាតិខ្លាញ់ ឱ្យអ្នកឆាប់ស្រកគីឡូ។ ហើយជាតិសរសៃនេះក៏ជួយគ្រប់គ្រងសម្ពាធឈាម និងកាត់បន្ថយការរលាកផងដែរ។
៣. ជៀសវាងការផឹកគ្រឿងស្រវឹង៖ ពេលអ្នកជៀសវាងរឿងនេះ ធ្វើឱ្យជាតិខ្លាញ់អាក្រក់ក្នុងខ្លួនក៏មានតិចដែរ។ ស្ត្រីមិនគួរផឹកស្រាបៀរលើសពីមួយកែវ (៣៣០ មីលីលីត្រ) ក្នុងមួយថ្ងៃទេ ហើយបុរសមិនគួរផឹកស្រាបៀរលើសពីពីរកែវក្នុងមួយថ្ងៃ ដើម្បីការពារជាតិខ្លាញ់កើនឡើងក្នុងរាងកាយ។ ពេលអ្នកជៀសវាងពីស្រា មកហាត់ប្រាណនោះ គីឡូអ្នកក៏ស្រកដែរ។
៤. ហាត់ប្រាណជាប្រចាំថ្ងៃ៖ សកម្មភាពធ្វើលំហាត់ប្រាណជាសកម្មភាពសំខាន់បំផុតដើម្បីដុតខ្លាញ់ចេញពីរាងកាយ ឱ្យអ្នកមានរាងស្អាត មានសុខភាពល្អ។ អ្នកគួរព្យាយាមហាត់ប្រាណ មួយថ្ងៃ ៣០នាទីដែរ ដើម្បីបំបែកខ្លាញ់ចេញពីសរសៃឈាម ឱ្យលំហូរឈាមដំណើរបានស្រួល។ សកម្មភាពធ្វើលំហាត់ប្រាណ មានដូចជាការដើរ ជិះកង់ ហែលទឹក និងលំហាត់ប្រាណអ៊ែរ៉ូប៊ិក៕ អត្ថបទដោយ៖ ទ្រ សុភាព