ក្រពេញប្រូស្តាត (Prostate gland) គឺជាផ្នែកមួយដ៏សំខាន់នៃប្រព័ន្ធបន្តពូជរបស់បុរស ដែលមានទំហំប៉ុនផ្លែក្រូចឆ្មារ ហើយស្ថិតនៅខាងក្រោមប្លោកនោម និងនៅជុំវិញបង្ហួរនោម ។ ក្រពេញនេះមានតួនាទីផលិតសារធាតុរាវសម្រាប់ទឹកកាម ។
ជំងឺមហារីកក្រពេញប្រូស្តាត គឺជាជំងឺមហារីកមួយដែលកើតឡើងនៅក្នុងក្រពេញប្រូស្តាត ហើយជាទូទៅ កើតលើបុរស ដែលមានអាយុចាប់ពី ៥០ ឆ្នាំឡើងទៅ ។ កត្តាហានិភ័យអាចរួមមាន អាយុ ប្រវត្តិក្នុងគ្រួសារ និងការប្រែប្រួលអរម៉ូន ។ ការសិក្សាជាច្រើនបានណែនាំថា បុរសដែលមានអាយុចាប់ពី ៥០ ឆ្នាំឡើងទៅ គួរតែធ្វើការពិនិត្យសុខភាពជាប្រចាំ ដោយពិនិត្យឈាម Prostate-Specific Antigen (PSA) និងពិនិត្យក្រពេញប្រូស្តាតជាមួយគ្រូពេទ្យឯកទេស ដើម្បីរកឃើញជំងឺឲ្យបានឆាប់ ។
ក) រោគសញ្ញា៖ នៅដំណាក់កាលដំបូង ជំងឺមហារីកក្រពេញប្រូស្តាតអាចមិនបង្ហាញរោគសញ្ញាច្បាស់លាស់ទេ ប៉ុន្តែអាចមានរោគសញ្ញាដូចជា៖
១. នោមញឹកញាប់ ជាពិសេសពេលយប់
២. កម្លាំងទឹកនោមខ្សោយ
៣. ពិបាកចាប់ផ្តើមនោម
៤. នោមឈាម ឬទឹកកាមមានឈាម
៥. ឈឺចាប់នៅតំបន់ចង្កេះ ឬឆ្អឹងខ្នង (នៅដំណាក់ចុងក្រោយ) ។
ខ) ផលវិបាក៖ ប្រសិនបើមិនបានរកឃើញ និងព្យាបាលទាន់ពេលវេលា អាចបង្កឲ្យមានផលវិបាកដូចជា៖
១. ការស្ទះនៃផ្លូវបង្ហូរនោម
២. នោមមិនចេញ
៣. មហារីករាលដាលទៅឆ្អឹង ឬសរីរាង្គផ្សេងៗ
៤. ខ្សោយតម្រងនោម ។
សូមបុរសៗដែលមានអាយុចាប់ពី ៥០ ឆ្នាំឡើងទៅ មកពិនិត្យសុខភាពជាប្រចាំ និងពិគ្រោះជាមួយគ្រូពេទ្យឯកទេស ដើម្បីធ្វើរោគវិនិច្ឆ័យ និងព្យាបាលឲ្យបានទាន់ពេលវេលា ដើម្បីការពារបញ្ហាធ្ងន់ធ្ងរដែលអាចប៉ះពាល់ដល់សុខភាព និងអាយុជីវិត ។ យោងពីមន្ទីរពេទ្យ ហ្លួង ម៉ែ - LUANG MÈ HOSPITAL