បើអ្នករលាក់តម្រងនោម ហើយកាន់តែធ្ងន់គឺខូចតម្រងនោមនោះ វាសនាជីវិតរស់នៅរបស់អ្នកច្បាស់ជារស់នៅដោយការលាងឈាមជាមិនខានឡើយ។ ហើយវាធ្វើឱ្យរាងកាយរបស់អ្នកកើនជាតិពុលទ្វេដងផងដែរ។ តាមផ្នែក តម្រងនោម នៃ មន្ទីរពេទ្យមិត្តភាពកម្ពុជា-ចិន ព្រះកុសុមៈ បានចុះផ្សាយថា Lupus Nephritis (ជាបញ្ហារលាកតម្រងនោមដោយសារលុយពូស) គឺជាផលវិបាកធ្ងន់ធ្ងរមួយដែលកើតឡើងនៅលើអ្នកជំងឺ SLE (Systemic Lupus Erythematosus)។ វាកើតឡើងនៅពេលដែលប្រព័ន្ធភាពស៊ាំរបស់រាងកាយ (ដែលដើរខុសប្រក្រតី) ចូលទៅវាយប្រហារ និងបង្កការរលាកដល់ Glomeruli (កញ្ចុំសរសៃឈាមតូចៗដែលមានតួនាទីចម្រោះកាកសំណល់ក្នុងតម្រងនោម)។
នៅពេលកញ្ចុំសរសៃឈាមចម្រោះទាំងនេះរងការរលាក វានឹងបាត់បង់សមត្ថភាពការងារ ធ្វើឱ្យមានការលេចធ្លាយសារធាតុសំខាន់ៗ (ដូចជាប្រូតេអ៊ីន និងគ្រាប់ឈាម) ចេញមកតាមទឹកនោម។
១. រោគសញ្ញាសម្គាល់របស់ Lupus Nephritis គឺរលាកតម្រងនោម
នៅដំណាក់កាលដំបូង វាអាចមិនស្តែងរោគសញ្ញាអ្វីទាំងអស់ (ដឹងបានតែតាមរយៈការពិនិត្យទឹកនោម) ប៉ុន្តែនៅពេលវាវិវត្តកាន់តែខ្លាំង អ្នកជំងឺនឹងមានរោគសញ្ញាដូចជា៖
១. ទឹកនោមមានពពុះច្រើន ឬខាប់ខុសធម្មតា (ដោយសារមានប្រូតេអ៊ីន/ជាតិសាច់លេចធ្លាយ)
២. ទឹកនោមមានពណ៌ក្រហមព្រាលៗ ពណ៌ផ្កាឈូក ឬដូចពណ៌តែ (ដោយសារមានគ្រាប់ឈាមក្រហមលេចធ្លាយ)
៣. មានសភាពហើម ខ្លាំងនៅត្រង់ជើង កជើង ប្រអប់ជើង និងពេលខ្លះហើមជុំវិញភ្នែក ឬមុខ (ដោយសាររាងកាយដក់ទឹក)
៤. សម្ពាធឈាមឡើងខ្ពស់ (លើសឈាម) ខុសប្រក្រតី
៥. នោមញឹកញាប់ ជាពិសេសនៅពេលយប់ ឬផ្ទុយទៅវិញ បរិមាណទឹកនោមថយចុះតិចជាងមុន។
២. ហេតុអ្វីបានជាវាគ្រោះថ្នាក់? ប្រសិនបើ Lupus Nephritis មិនត្រូវបានរកឃើញ និងព្យាបាលឱ្យបានទាន់ពេលវេលាទេ ការរលាករ៉ាំរ៉ៃនឹងបង្កើតទៅជាស្លាកស្នាមរឹងនៅក្នុងតម្រងនោម (Glomerulosclerosis)។ នៅពេលសាច់តម្រងនោមឡើងរឹងកាន់តែច្រើន វានឹងនាំទៅរក ជំងឺខ្សោយតម្រងនោមរ៉ាំរ៉ៃ (Chronic Kidney Disease) ដែលអាចឈានដល់ដំណាក់កាលចុងក្រោយ ដែលតម្រូវឱ្យអ្នកជំងឺធ្វើការលាងឈាម (Dialysis) ឬប្តូរតម្រងនោមដើម្បីរស់៕