១. កុំខ្លាចបរាជ័យ៖ បើអ្នកគិតថា ខ្លួនធ្វើកិច្ចការហ្នឹង តិចបរាជ័យទៅ។ បើអ្នកគិតបែបនេះ វានឹងទទួលបរាជ័យតាំងដំបូងទី។ បើអ្នកជឿជាក់ថា អ្នកអាចធ្វើបាន អ្នកនឹងធ្វើវាបានពិតៗ មែន ព្រោះអ្នកបានតាំងចិត្តមាំថានឹងធ្វើវាឲ្យបាន។ សូមអ្នកចាប់ផ្តើមបង្កើតនូវភាពជឿជាក់ចំពោះខ្លួនឯងហើយខំធ្វើវាអស់ពីលទ្ធភាព។ បន្ទាប់មក អ្នកនឹងមាន កម្លាំងតស៊ូគ្រប់បញ្ហាទាំងអស់ ដើម្បីឈានដល់ភាពជោគជ័យដូចអ្វីដែលអ្នកបានគិតទុកជាមុន។ សូមកុំបណ្តោយឲ្យកងភ្លើងនៃភាពជឿជាក់ក្នុងចិត្តអ្នករលត់ណា! អ្នកត្រូវមើលភ្នក់ភ្លើងនោះឲ្យឆេះរហូត ឆេះទាល់តែជីវិតរបស់អ្នកកាន់តែល្អប្រសើរ និងមានសេចក្តីសុខជាងមុន។ តាមលោក Jimmy Carter ជាប្រធានាធិបតីទី 39 របស់សហរដ្ឋអាមេរិកបានលើកឡើងថា កុំភ័យខ្លាចថា អ្នកបរាជ័យយ៉ាងណានោះ តែអ្នកត្រូវតាំងចិត្តថា ខ្លួននឹងមិនបរាជ័យ។

 ២. ច្នៃកំហុសឱ្យក្លាយជាផល៖ ទោះបីយើងខំគិត ខំវិភាគយ៉ាងលម្អិតយ៉ាងណាក៏ដោយ ធ្វើជាក់ស្តែងនៅតែខុសដដែលទេ។ ទោះបីអ្នកចេះដាំបាយច្បាស់ ក៏នៅតែភ្លាត់ស្នៀតដាំបាយឆៅដែរ។ ដូច្នេះហើយបានលោក ដេល កានេហ្ស៊ី បានលើកឡើងថា បុគ្គលធ្វើកិច្ចការមានលទ្ធផលអស្ចារ្យ គេតែងមើលឃើញប្រយោជន៍ពីកំហុសឆ្គង ហើយព្យាយាមធ្វើសាជាថ្មីដោយប្រើវិធីសាស្រ្តផ្សេងខុសពីមុនដើម្បីទទួលបានផល”។ ការច្នៃកំហុសឱ្យក្លាយជាផល វាមិនមែនជារឿងងាយស្រួលនោះទេ វាត្រូវការខំធ្វើជាក់ស្តែងបូកនឹងការខំគិតច្នៃបន្តទៀត។ 

៣. ចេះស្រឡាញ់ពេលវេលា៖ បើអ្នកមានសមត្ថភាពពូកែ ចំណូលកើននោះ អ្នកគួរប្រើពេលវេលាគ្រប់នាទីឲ្យមានប្រយោជន៍លើកិច្ចការ។ កុំចេះតែបណ្តោយឲ្យពេលវេលាកន្លងហួសទៅគ្មានប្រយោជន៍ដោយមិនបានធ្វើអ្វីសោះ។ ព្រោះពេលវេលាមិនអាចទិញបានទេ ទោះបីអ្នកមានលុយច្រើមហាសាលក៏ដោយ។ តាមលោក មិនចាមិន ល្បែងក្លិន បានលើកឡើងថា “ពេលវេលាដែលកន្លងទៅហួសហើយ មិនអាចបកក្រោយវិញបានទេ”។ ពេលអ្នកមានក្តីស្រមៃហើយ សូមពិនិត្យមើលពីសមត្ថភាពរបស់ខ្លួនមើលថា គួរអភិវឌ្ឍបន្ថែមទៅលើរឿងអ្វីខ្លះ? ហើយត្រូវចាប់ផ្តើមធ្វើភ្លាមទៅ! កុំពិបាកមកអង្គុយសោកស្តាយនៅពេលក្រោយថា ហេតុអីក៏ខ្ញុំមិនចាប់ផ្តើមធ្វីអ្វីសោះ? ហេតុនេះ អ្នកគួរប្រើពេលវេលាហ្វឹកហាត់រៀនសូត្រឲ្យល្អដើម្បីបង្កើនសមត្ថភភាព ដើម្បីពេលឱកាសល្អមកដល់ គឺចាប់យកតែម្តង៕ អត្ថបទដោយ៖ ទ្រ សុភាព