១. អ្នកដែលមានជំងឺក្រពះ (ដំបៅ និងច្រាលអាស៊ីត)៖ អ្នកដែលមានបញ្ហាក្រពះគួរតែជៀសវាងកាហ្វេពេលព្រឹកជាពិសេសពេលមិនទាន់បានអាហារចូលពោះ។ យោងតាមគេហទំព័រ phunutoday.vn កាហ្វេមានជាតិអាស៊ីត និងកាហ្វេអ៊ីន ដែលជំរុញឱ្យក្រពះបញ្ចេញទឹកអាស៊ីតកាន់តែច្រើន។ ដូច្នេះវាអាចបង្កឱ្យមានការឈឺក្រពះ ច្រាលអាស៊ីត ហើមផ្លូវអាហារ និងធ្វើឱ្យដំបៅក្រពះកាន់តែធ្ងន់ធ្ងរ។ ប្រសិនបើអ្នកនៅតែចង់ផឹក ត្រូវរងចាំប្រហែល ១ ទៅ ២ ម៉ោងបន្ទាប់ពីញុំាអាហារ។

២. អ្នកដែលមានបញ្ហាបេះដូង៖ អ្នកដែលធ្លាប់មានបញ្ហាបេះដូងលោតញាប់ សម្ពាធឈាមខ្ពស់ ឬមានជំងឺសរសៃឈាមបេះដូង មិនគួរផឹកកាហ្វេពេលព្រឹកទេ។ ដោយសារនៅក្នុងកាហ្វេ មានជាតិកាហ្វេអ៊ីនដែលជាសារធាតុរំញោចដែលអាចបង្កើនចង្វាក់បេះដូង ធ្វើឱ្យលើសសម្ពាធឈាម។ កាហ្វេ អាចធ្វើឱ្យជំងឺកាន់តែអាក្រក់ ដូច្នេះសម្រាប់អ្នកដែលមានបញ្ហាបេះដូងគួរតែពិគ្រោះជាមួយគ្រូពេទ្យជាមុន មុនពេលចង់ផឹកកាហ្វេជាប្រចាំ។ 

៣. អ្នកដែលមានការតានតឹង ថប់បារម្ភ ឬគេងមិនលក់៖ ពេលព្រឹកគឺជាពេលដែលកម្រិត cortisol កើនឡើងជាងធម្មតា ដើម្បីឱ្យរាងកាយភ្ញាក់។ បើផឹកកាហ្វេភ្លាមៗ វានឹងបង្កឱ្យប្រព័ន្ធសរសៃប្រសាទ “overstimulate” ធ្វើឱ្យអ្នកកាន់តែតានតឹង ញ័រដៃ ខ្វះការផ្តោតអារម្មណ៍ ហើយធ្វើអ្នកកាន់តែងាយលែងលក់នៅពេលយប់។ ដូច្នេះសម្រាប់អ្នកដែលធ្លាប់មានបញ្ហាដូច៖ ការថប់បារម្ភ បញ្ហាគេងមិនលក់ សម្ពាធការងារខ្លាំង ងាយខឹង ឬឆាប់តានតឹង ការផឹកកាហ្វេពេលព្រឹកអាច “ធ្វើឱ្យស្ថានភាពអាក្រក់ជាងមុន”។ 

៤. អ្នកដែលមិនដែលញុំាអាហារពេលព្រឹក៖ មនុស្សជាច្រើនបានជ្រើសយកកាហ្វេ ដោយគិតថាកាហ្វេមួយពែងអាចជំនួសអាហារពេលព្រឹកបាន តែជាក់ស្ដែងការធ្វើបែបនេះដូចជាធ្វើបាបក្រពះខ្លួនឯងចឹង។ អ្នកមើលរំលងអាហារពេលព្រឹក ផឹកតែកាហ្វេជំនួសរាល់ថ្ងៃ ធ្វើឱ្យអាស៊ីតក្រពះកើនខ្លាំង ធ្វើឱ្យប្រព័ន្ធរំលាយអាហារដំណើរការមិនល្អ ហើមពោះ ឈឺក្រពះ និងអស់កម្លាំង។ ដូច្នេះ មុនផឹកកាហ្វេ ដូច្នេះមុនផឹកគួរតែញុំាអាហារជាមុនដូចជា ចេក ស៊ុត នំបុ័ង ឬទឹកដោះគោជូរជាមុន។

៥. កុមារ និងក្មេងជំទង់៖ ផ្អែកតាមគេហទំព័រ Times of India ជាតិកាហ្វេអ៊ីនមានឥទ្ធិពលខ្លាំងលើរាងកាយកុមារ។ វាអាចធ្វើឱ្យក្មេងពិបាកក្នុងការគេង កើតជំងឺថប់បារម្ភ និងធ្វើឱ្យអារម្មណ៍ឆាប់ប្រែប្រួលឡើងចុះ ចង្វាក់បេះដូងលោតលឿន។ អ្នកជំនាញណែនាំឱ្យ កុមារគួរតែជៀសវាងការផឹកកាហ្វេសុទ្ធ ហើយក្មេងជំទង់មិនគួរផឹកកាហ្វេដែលមានជាតិកាហ្វេអ៊ីនលើសពី 100 mg ក្នុងមួយថ្ងៃទេ៕

អត្ថបទដោយ៖ សារួ