បើយើងចង់បានសុខភាពល្អក្នុងការរស់នៅប្រចាំថ្ងៃរបស់យើង ពិតណាស់យើងចាំបាច់ត្រូវតែគិតគូជាពិសេសទៅលើ របបអាហារ ការធ្វើលំហាត់ប្រាណប្រចាំថ្ងៃ ការសម្រាកបានគ្រប់គ្រាន់ និងសុខភាពផ្លូវចិត្តផងដែរ។ នេះជាច្បាប់មាសទាំង៤ ដកស្រង់ពីគោលការណ៍ Ikigai អាថ៌កំបាំងអាយុវែង និងរីករាយរបស់ជនជាតិជប៉ុន គឺលោក Héctor García និងលោក Francesc Miralles បានលើកឡើងថា៖
១. ខំធ្វើការឱ្យសកម្ម កុំចូលនិវត្តន៍៖ ប្រជាជនជប៉ុនមានទម្លាប់ធ្វើការងារដោយថាមពលចេញពីចិត្ត ហើយបើទោះជាចាស់ទៅសម្រាកពីការងារក៏ពួកគេមិនចោលសកម្មភាពដែលខ្លួនស្រឡាញ់ដែរ ពួកគេមិនទុកឱ្យខ្លួនទំនេរនោះទេ តែងមានចលនាសកម្មជានិច្ច ដោយមិននៅតែលើគ្រែមួយកន្លែងនោះទេ ព្រោះវាមិនសូវឱ្យអំណាយផលដល់សុខភាព។
២. ផ្សារភ្ជាប់ខ្លួនឯងជាមួយធម្មជាតិ ពេលមានទុក្ខកង្វល់៖ ប្រជាជនជប៉ុនចូលចិត្តការដើរថ្មើរជើង និងការធ្វើដំណើរកម្សាន្ត ដើម្បីស្រូបយកខ្យល់អាកាសបរិសុទ្ធ លំហែខួរក្បាលខ្លះ ដែលវាអាចជួយបង្កើនផលិតភាពការងារ បង្កើនអារម្មណ៍រីករាយ និងធ្វើឱ្យការចងចាំប្រសើរឡើងជាងមុន។
៣. រស់នៅក្នុងបច្ចុប្បន្នឱ្យល្អ៖ ការរស់នៅមិនជាប់ជំពាក់នឹងអតីតកាល មិនបារម្ភហួសហេតុអំពីអនាគត រស់នៅថ្ងៃនេះឱ្យល្អ ធ្វើអ្វីដែលពួកគេមានអ្វីឱ្យអស់ពីលទ្ធភាព គឺជាសេចក្តីមួយរបស់ប្រជាជនជប៉ុន ធ្វើឱ្យពួកគេមានអាយុវែង មិនសូវមានទុក្ខកង្វល់ក្នុងចិត្ត។
៤. នៅក្បែរមិត្តល្អៗ៖ ប្រជាជនអាយុវែងរាប់សិបនាក់នៅកោះអូគីណាវ៉ា ប្រទេសជប៉ុន តែងផ្តល់អាទិភាពលើការចំណាយពេលជាមួយមិត្តល្អៗ ដោយធ្វើការប្រកួតកីឡាមិត្តភាពជាមួយគ្នា ក្នុងភូមិឬកន្លែងដែលពួកគេរស់នៅដើម្បីកម្ចាត់ទុក្ខកង្វល់។ នេះហើយជាមូលហេតុធ្វើឱ្យប្រជាជនជប៉ុនរស់នៅដោយសប្បាយចិត្ត និងធ្វើការរហូតដល់ចាស់ស្លាប់ក៏មាន៕