ពេលអ្នកមានអារម្មណ៍តានតឹងនឹងជីវិតប្រចាំថ្ងៃជាបញ្ហាទូទៅរបស់មនុស្ស។ ក្នុងនោះមនុស្សម្នាក់ៗមានវិធីសាស្រ្តកាត់បន្ថយភាពតានតឹងទាំងនោះ តាមទម្លាប់និងរបៀបរស់នៅរបស់ពួកគេរៀងៗខ្លួន។ ប៉ុន្តែបើអ្នកមានអារម្មណ៍ថា ខួរក្បាលស្រ្តេស និងអារម្មណ៍តានតឹងខ្លាំងនោះ តាមសកលវិទ្យាល័យ Harvard បានឱ្យដឹងថា​ អ្នកកុំធ្វើរឿងទាំង ៣នេះដើម្បីការពារស្រ្តេសលើសដើម៖

១.  ញុំាច្រើន៖ នៅពេលដែលស្រ្តេស មនុស្សភាគច្រើននឹងជ្រើសការញុំាជាវិធីបំបាត់ ហើយញុំាលឿនជាងធម្មតា ដោយមិនខ្វល់ថាញ៉ាំអ្វី ឬចំនួនប៉ុន្មាននោះទេ ដែលនេះជាហេតុផលដែលអាចនាំឱ្យឡើងទម្ងន់ ធ្វើឱ្យរាងកាយស្រ្តេសលើសដើម។ ចូរអ្នកងាកមករកទម្លាប់នៃការញ៉ាំអាហារដោយយកចិត្តទុកដាក់ ដកដង្ហើមវែងៗ ផ្តោតលើអាហារទំពារយឺតៗ ដោយមានបន្លែ និងផ្លែឈើ ឬផឹកទឹកឱ្យបានច្រើន។

២. ផឹកកាហ្វេច្រើន៖ សារធាតុដែលមានឥទ្ធិពលរំញោចលើប្រព័ន្ធសរសៃប្រសាទធ្វើឱ្យមនុស្សមានកម្លាំងគឺកាហ្វេអ៊ីន ដែលមាននៅក្នុងពែងនីមួយៗនៃកាហ្វេ។ ខណៈនោះក៏មានភស្តុតាងដែលថាការទទួលទានកាហ្វេអាចជួយ បន្ថយកម្រិតស្ត្រេស តែការទទួលទានកាហ្វេច្រើនពេកក៏អាចជះឥទ្ធិពលអវិជ្ជមានដល់សុខភាពផ្លូវចិត្តលើសដើមផងដែរ។  ចូរអ្នកជៀសវាងការផឹកកាហ្វេច្រើនលើសកម្រិតដើម្បីចង់កាត់បន្ថយភាពស្រ្តេស ព្រោះការផឹកកាហ្វេច្រើនលើសកម្រិតនឹងធ្វើឱ្យកាន់តែស្រេ្តស និងតានតឹងលើរាងកាយលើសដើម។

៣.អូសចុះអូសឡើងលើបណ្តាញសង្គម៖ ការប្រើប្រាស់គ្រឿងអេឡិចត្រូនិចច្រើន នឹងធ្វើឱ្យប៉ះពាល់ដល់សុខភាពភ្នែកនិងរាងកាយ ប៉ុន្តែការប្រើប្រាស់បណ្តាញសង្គមច្រើនហួសកម្រិត នឹងធ្វើឱ្យប៉ះពាល់ដល់សុខភាពផ្លូវចិត្ត។ អ្នកជៀសវាងការប្រើប្រាស់បណ្តាញសង្គមជ្រុល អូសចុះអូសឡើង នៅពេលអ្នកមានអារម្មណ៍ស្រ្តេសខ្លាំង ព្រោះបណ្តាញសង្គមគឺជាប្រភពរំខានដ៏ធំដែលបង្កឱ្យអារម្មណ៍អ្នកតានតឹងដោយមិនដឹងខ្លួន៕