តាមលោក Dan Buettner ជាអ្នកជំនាញអាយុវែង បានស្រាវជ្រាវពីមនុស្សមានអាយុវែង ២០ឆ្នាំជាងមកហើយគាត់បានលើកឡើងថា មនុស្សមានអាយុវែង មានចំណុចសំខាន់រួមគ្នាគឺការចេះប្រមូលកម្លាំងគ្នារស់នៅជាសហគមន៍គឺចេះជួយយកអាសាគ្នាទៅវិញទៅមក ដែលធ្វើឱ្យពួកគាត់គ្មានអារម្មណ៍ឯការទេ ឬគ្មានអារម្មណ៍ថាគេបោះបង់ខ្លួនចោលនោះទេ។ វាជាកត្តាជម្រុញអារម្មណ៍របស់ពួកគាត់មានកម្រិតស្រ្តេសទាបជាងគេ។ ហើយក៏ជួយបង្កើតគុណតម្លៃផ្នែកអារម្មណ៍ដែរ។

ហើយលោក  Buettner បានលើកឡើងថាមូលហេតុជួយឱ្យមនុស្សរស់នៅមានអាយុវែង មានដូចជារបបអាហារគឺការហូបត្រឹមតែ ៨០%នៃក្រពះដែលមានអារម្មណ៍ថាឆ្អែកហើយ បន្ទាប់មកពួកគាត់ឈប់ហូបហើយ តាមភាសារខ្មែរគឺហូបអាហារគ្រប់គ្រាន់។ ហើយបុគ្គលមានអាយុវែងតែងមានទម្លាប់ធ្វើលំហាត់ប្រាណដើម្បីពង្រឹងសាច់ដុំ កុំឱ្យចុះខ្សោយតាមវ័យដែលមានអាយុច្រើន។ ហើយមានទម្លាប់ក្នុងការរស់នៅជាមួយគោលបំណងក្នុងជីវិត ជួយធ្វើឱ្យពួកគាត់មានថាមពលចេះតស៊ូ និងរីករាយជាមួយសកម្មភាពជាប្រចាំថ្ងៃ។ នេះជាទម្លាប់សាមញ្ញ តែមានអំណាចឱ្យមនុស្សយើងមានអាយុវែង មានសុខភាពរឹងមាំថែមទៀត។

មនុស្សដែលមានអាយុវែងមានទម្លាប់ល្អខាលើបែបនេះឯង ដើម្បីកាត់បន្ថយភាពតានតឹង។ ហើយពួកគាត់តែងទទួលទានសាច់តិចតួច ឬអាហារកែច្នៃតិចត្រឹមតែ ២ថ្ងៃប៉ុណ្ណោះ និងផឹកគ្រឿងស្រវឹងក្នុងកម្រិតមធ្យមឬមួយគឺអត់ផឹកស្រាតែម្តង។ ហើយពួកគាត់មិនធ្វើលំហាត់ប្រាណខ្លាំងក្លាទេ ប៉ុន្តែពួកគាត់ធ្វើចលនាជាប្រចាំថ្ងៃដោយការដើរ រត់តិចៗ ធ្វើការនៅក្នុងសួនបន្លែ និងធ្វើស្រែជាដើម។ មនុស្សអាយុវែងតែងពេញចិត្តការដើរជាងការបើកបរ។ ការថែសួនដែលពាក់ព័ន្ធនឹងការធ្វើចលនាកម្រិតស្រាលៗ ក្នុងជីវិតជាប្រចាំថ្ងៃជួយឱ្យពួកគាត់មានអាយុវែង៕ អត្ថបទដោយ៖ ទ្រ សុភាព