​មានក្រុមការងាររបស់ខ្ញុំម្នាក់ចាបបៃតង បាននិយាយឱ្យខ្ញុំភ្ញាក់ស្មារតីទំតែងើបពីដេកមកចឹងថា មនុស្សយើងពេលរកលុយបានច្រើន ចាប់ផ្តើមមានអត្តចរិតរាងឡើងខ្មើត និងមានអំណាចចង់ឱ្យគេគោរពខ្លួន។ សូម្បីតែឪពុកម្តាយខ្ញុំក៏មានលក្ខណៈបែបហ្នឹងដែរ។ ពេលឪពុកខ្ញុំរកលុយបានចូលផ្ទះក្នុងថ្ងៃហ្នឹង គាត់ចាប់ផ្តើមមានអំណាចលើគ្រួសារ ហើយម្តាយខ្ញុំក៏យកចិត្តលើឪពុកខ្ញុំ និងអត់ហ៊ានជាមួយទេ។ ពេលគាត់និយាយនៅត្រង់នេះ ខួរក្បាលចាប់ផ្តើមគិតដល់គ្រួសាររបស់ខ្ញុំម្តងថា ហេតុអ្វីឪពុកខ្ញុំចូលចិត្តត្រួតត្រា ប្រើសម្តីធ្ងន់ៗ វ៉ៃកូន និងម្តាយរបស់ខ្ញុំ? ខ្ញុំយល់ពីការពិតមួយថា លុយគ្មានអំណាចដើម្បីបំផ្លាញគ្រួសារខ្ញុំបានទេ នៅពីក្រោយខ្នងរបស់លុយនោះ គឺអត្តានេះឯង ដែលធ្វើឱ្យមនុស្សមានអារម្មណ៍បែងចែកវណ្ណៈ និងត្រួតត្រាគ្នាតាំងពីក្នុងគ្រួសាររហូតឆ្លងមេរោគដល់សង្គមជាតិ។ ហៅថា ជំងឺអត្តា។ 

ពេលអ្នកផ្តោតអារម្មណ៍លើខ្លួនឯងខ្លាំងពេក អ្នកបែបជាគ្មានបេះដូងអាណិតអាសូរចំពោះអ្នកដទៃ ដៃគូរ និងគ្រួសារ។ ព្រោះអ្វី? គឺអ្នករវល់តែគិតពីខ្លួនឯង មើលឃើញតែបញ្ហាផ្ទាល់ខ្លួនឯងធំជាងអ្វីៗ ទាំងអស់។ ពេលនរណាម្នាក់ រស់ក្នុងអត្តា ពិបាកឧនក្បាលចុះណាស់ ពួកគេមានអារម្មណ៍ថាខ្លួនឯងអន់ គេមើលងាយ និងមិនសមក្រខ្សែភ្នែកអ្នកដទៃ។ អត្តានឹងប្រាប់គេថា ខ្លួនគ្មានខុសអ្វីទេ ខ្លួនអញជាបុគ្គលមានអំណាច អញមានលុយ... ហើយអត្តាជម្រុញអារម្មណ៍គេឱ្យចាប់ផ្តើមបញ្ចេញចង្គោមអំណាចធ្វើការគៀបសង្កត់គួរឱ្យស្អប់ និងគួរឱ្យខ្លាចណាស់មកលើក្រុមការងារ គ្រួសារ និងដៃគូជីវិត។ ការពិត អត្តាជាដើមចមនៃបញ្ហាទាំងអស់។ ហើយអត្តាគឺអញធំបែបនេះឯង កុំចង់ខ្លាំងជាមួយអញ...។

តាមលោក Ryan Holiday បានឆ្លងកាត់់អត្តាធ្វើឱ្យខ្លួនគាត់ជិតស្លាប់ជិតរស់រួចមកហើយ គាត់បានប្រាប់ថា “កុំយកអត្តាលើកតម្កើនខ្លួនឯង ចូរយកអត្តាចូលក្នុងការងារ”។ មានន័័យថា ចូរឈ្លក់វង្វេងនឹងការងារ កុំឈ្លក់វង្វេងលើកខ្លួនជាស្តេច។ ពេលអ្នកមានសតិធ្វើការឆ្លុះបញ្ចាំងភាពវក់វីក្នុងចិត្ត អ្នកនឹងឈានទៅឱ្យផុតចំណុចអត្តានេះ គេហៅថា រស់ក្នុងភាពសាមញ្ញ។ អ្នកនឹងមើលឃើញការពិតនៃជីវិតកាន់តែច្បាស់ ពេលអ្នកដកកញ្ចក់វេនតាអត្តាចេញពីកែវភ្នែក នៅបេះដូងរបស់អ្នកនៅសល់តែក្តីស្រមៃ សល់តែអាណិតស្រឡាញ់ និងស្នាមញញឹមមិត្តភាពក្នុងជីវិត។ នេះជាឥទ្ធិពលសតិបញ្ញាជាថ្នាំព្យាបាលជំងឺអត្តាឱ្យអ្នកមើលឃើញការពិតក្នុងជីវិត រស់ក្នុងសតិ រស់ក្នុងលំហូរចិត្ត។

 តាមព្រះពុទ្ធបានសម្តែងថា “នៅក្នុងមាគ៌ាពន្លឺត្រាស់ដឹងគ្មានការប្រកាន់វណ្ណៈនោះទេ មនុស្សគ្រប់រូបសុទ្ធតែស្មើភាពគ្នា។ ព្រោះឈាមរបស់មនុស្សម្នាក់ៗ សុទ្ធតែមានពណ៌ក្រហមនិងទឹកភ្នែកមានរសជាតិប្រៃទាំងអស់។ យើងត្រូវតែស្វែងរកដំណោះស្រាយឱ្យមនុស្សឱ្យមានការយល់ដឹងពីសេចក្តីថ្លៃថ្នូរនិងគោលបំណងរបស់គេ។ ផ្លូវរបស់យើងជាផ្លូវនៃសមភាព”។ គំនិតរបស់ព្រះពុទ្ធឱ្យយើងរស់ក្នុងក្តីស្រមៃ មិនមែនរស់នៅក្នុងអត្តាជាចិត្តគ្មានមេត្តាចំពោះគ្នានោះទេ៕ ដកស្រង់ចេញពីសៀវភៅ លំហូរចិត្ត។ អ្នកអាចអានសៀវភៅ លំហូរចិត្ត បន្ថែមបាន ហើយអ្នកអាចទិញសៀវភៅលំហូរចិត្ត តាមនេះ https://t.me/BusinessCambodiaBook